Македонија
Фон дер Лајен го потсети Мицкоски: Треба да поминат уставните промени, кои вашата држава се согласи дека ќе ги направи, а проширувањето ќе остане приоритет за ЕК во следните пет години
Добро е да се слушне дека сте толку посветени на вашиот пристапен пат кон ЕУ. Северна Македонија постигна многу и покажавте одлучност во преземањето секој чекор. Сакам да ја пофалам Севрна Македонија и да им одадам почит на луѓето. Сега работата навистина мора да продолжи, сакам да му оддадам почит и на фактот дека сте сто проценти усогласени со нашата надворешна и безбедносна политика и да ви се заблагодарам за поддршката за Украина, истакна претседателката на ЕК, Урсула фон дер Лајен, на заедничката прес-конференција со премиерот Христијан Мицкоски.
„Имаме јасна цел, а тоа е да се отвори кластерот фундаментални вредности што е можно побргу. Речиси сме таму, треба да поминат уставните промени, кои вашата држава се согласи дека ќе ги направи, и со заеднички дијалог се надевам дека сите политички сили ќе се здружат во земјата и ќе ги преземат потребните одлучни чекори за напредок и уверена сум дека можеме да ги надминеме пречките што постојат,“ рече таа.
Го увери премиерот дека проширувањето ќе остане врвен приоритет за ЕК во следните пет години.
Зборувајќи за планот за раст за Западен Балкан, Фон дер Лајен истакна дека тоа е заеднички патоказ за да се интегрираат економиите, а вратата на единствениот европски пазар, како што рече, е отворена за одредени компании од Северна Македонија. За возврат, како што порача, ние треба да спроведеме важни реформи за да има изедначено поле за игра, а тоа ќе биде придружено, како што нагласи, со дополнителни инвестиции од ЕУ во Северна Македонија.
„Северна Македонија заврши навистина добра работа, имаме одлични реформи и треба да добиете повеќе од 750 милиони евра според планот за раст. Младите луѓе никогаш нема да ни простат ако не одговориме на предизвикот. Треба да направиме Северна Македонија да биде дел од ЕУ“, нагласи Фон дер Лајен.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ: Апсењето на Равманоски е обид на власта да го покрие скандалот со помилувањата
СДСМ остро ја осудува, како што вели, последната фарса на власта и претседателката Гордана Силјановска-Давкова, која, наместо да преземе одговорност за скандалозните помилувања, се обидува со театрални потези да го смири гневот на јавноста.
„Претседателката лично ги потпиша одлуките за помилување на криминалци и членови на нарко-кланови, лица кои беа осудени за тешки кривични дела. Еден од тие помилувани лица, Акиф Бејадин Равманоски, кој е поврзан со нарко-кланот „Барон“, беше уапсен веднаш по неговото ослободување под сомнение за обид за убиство. Дали со ова апсење МВР се обидува да го покрие скандалот со помилувањата и да ја намали штетата од катастрофалната одлука на претседателката? Токму на ова предупредуваше СДСМ и опозицијата – дека криминалците кои ги ослободи Давкова претставуваат закана за јавната безбедност“, велат од СДСМ.
Како што додаваат, овие апсења не може да ја оттргнат одговорноста на Силјановска и ВМРО-ДПМНЕ – тие ги ослободија криминалците, и сега, кога тие повторно прават злосторства, се обидува да ја амортизира штетата со спектакуларни апсења.
СДСМ прашува: зошто беа помилувани лица осудени за обид за убиство и поврзани со нарко-кланови и кој го нарача тоа? Зошто овие опасни криминалци повторно се на улиците, наместо зад решетки? И дали ова е дел од планот на власта да ги заштити криминалците, додека граѓаните секојдневно се чувствуваат помалку безбедни?
„Претседателката Силјановска не може да се крие зад Комисијата за помилување. Таа е таа која има последен збор, и таа мора да одговори зошто ги ослободува овие лица и дали со ова директно ја загрозува безбедноста на граѓаните. Време е власта да престане да ги штити криминалците и да започне вистински да се грижи за граѓаните“, се вели во партиското соопштение.
Како што се додава, граѓаните заслужуваат вистинска одговорност и сериозен однос кон нивната безбедност.
Македонија
Средба Гаши – Форслунд на Самитот во Рига
Во рамки на Третиот парламентарен самит на Меѓународната кримска платформа во Рига, претседателот на Собранието на Република Северна Македонија, Африм Гаши, оствари билатерална средба со потпретседателот на Шведскиот парламент, Кенет Форслунд.
Претседателот Гаши се заблагодари за поддршката на нашата стратешка цел – полноправно членство во Европската Унија и во тој контекст изрази благодарност до Кралството Шведска за континуираната поддршка за демократскиот и економскиот развој на нашата држава преку бројни развојни проекти во повеќе сфери.
Потпретседателот Форслунд го поздрави формирањето Група за соработка како пандан на Групата на Шведскиот парламент, особено продолжение на соработката за демократски развој меѓу двата Парламента и искажа уверување дека двете Групи за соработка ќе бидат добра основа за дополнително интензивирање на парламентарната размена соработка на сите нивоа.
Соговорниците се осврнаа и на новиот Деловник на Собранието и се согласија дека Собранието е столб на демократското општество и клучен актер во процесот на пристапување и затоа клучно е да се продолжи со интензивна реализација на сите активности за европеизација на земјата и нејзиното приближување кон Европската Унија.
Македонија
Гаши – Цамај: продлабочување на парламентарната соработката
Денеска во Рига, претседателот на Собранието на Република Северна Македонија, Африм Гаши, оствари средба со потпретседателот на Парламентот на Црна Гора, Никола Цамај.
На средбата се дискутираше за соработката меѓу двата Парламента, вклучувајќи размена на практики и посети на службата, како и можностите за продлабочување на соработка во иднина.
Исто така, двајцата претставници разменија мислења за процесот на интеграција во Европската Унија на Северна Македонија и Црна Гора, нагласувајќи ја улогата на парламентите во процесот на усогласување на законодавството со европското.
На крајот од средбата, Цамај изрази подготвеност да го посети Собранието на Северна Македонија во блиска иднина.