Свет
Шефот на ОН се ракува со Путин, па повика на мир во Газа, Либан, Украина и во Судан
Генералниот секретар на ОН Антонио Гутереш им порача на лидерите на БРИКС, вклучувајќи го и рускиот претседател Владимир Путин, дека на светот му е потребен мир во Газа, Либан, Украина и Судан.
„Генерално, ни треба мир“, рече Гутереш на самитот на БРИКС во рускиот град Казан.
„Ни треба мир во Украина. Праведен мир во согласност со Повелбата на ОН, меѓународното право и резолуциите на Генералното собрание на ОН“, посочи тој.
Кабинетот на Гутереш подоцна објави соопштение во кое се вели дека тој се сретнал со Путин на маргините на состанокот на БРИКС и го повторил својот повик за мир.
Во соопштението се наведува дека Гутереш го повторил својот став дека руската инвазија на Украина во 2022 година е „прекршување на Повелбата на Обединетите нации и меѓународното право“.
Според соопштението, Гутереш исто така рекол дека слободата на пловидба во Црното Море е „од најголема важност“ за Русија, Украина и севкупната безбедност на храната и енергијата.
Двајцата лидери, како што се наведува, разговарале и за „апсолутната потреба од прекин на огнот во Газа и Либан, како и за потребата да се избегне понатамошна регионална ескалација“.
БРИКС, акроним за Бразил, Русија, Индија, Кина и Јужноафриканската Република, сочинува 45 отсто од светското население и 35 отсто од светската економија.
Египет, Етиопија, Иран и Обединетите Арапски Емирати, исто така, се приклучија оваа година во групата која сака да биде одговор на политичката и економската моќ на богатите нации од Северна Америка и Западна Европа. Саудиска Арабија исто така треба формално да се приклучи.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Јапонија сериозно загрижена за испраќањето севернокорејски војници во Русија
Јапонија денеска изрази сериозна загриженост поради објавеното испраќање севернокорејски војници во Русија за потенцијално учество во војната во Украина.
Главниот секретар на кабинетот Јошимаса Хајаши, исто така, рече дека неодамнешното продлабочување на воената соработка меѓу Северна Кореја и Русија е загрижувачко, со оглед на неговото влијание врз безбедноста на регионот околу Јапонија.
„Владата со сериозна загриженост го следи испраќањето на севернокорејски трупи во Русија, вклучително и можноста војниците да учествуваат во руската инвазија на Украина“, рече Хајаши, пренесува Кјодо.
Тој додаде дека е длабоко загрижувачки што неодамнешниот напредок во продлабочувањето на воената соработка меѓу Русија и Северна Кореја ќе ја влоши ситуацијата во Украина и ќе влијае на безбедноста на регионот околу Јапонија.
Јапонија ќе работи со други земји за да донесе мир во Украина во најкус можен рок на „фер и траен начин“, нагласи Хајаши, пренесува Танјуг.
Севернокорејски војници влегоа во западниот руски регион Курск во близина на украинската граница по завршувањето на обуката, соопшти Украина во четвртокот.
Рускиот претседател Владимир Путин не негираше дека севернокорејски војници биле испратени во Русија, како што тврдат владите на САД и Јужна Кореја врз основа на сателитски снимки и други разузнавачки податоци, пренесуваат медиумите.
Свет
Шолц за поканата на Украина за НАТО: „Нема да го сменам ставот, нема да дозволам да ме поколебаат“
Германскиот канцелар, Олаф Шолц, изјави дека во моментот нема можност Украина да биде поканета во НАТО бидејќи, како што наведе, според него, земја во воена состојба не може да стане членка на Алијансата и сите се согласуваат со тој став.
Според Шолц, во моментов се разговара за безбедносните гаранции по завршувањето на тековната војна во Украина.
Шолц истакна дека руското кршење на меѓународното право бара посебни дејствија.
Според неговите зборови, од една страна треба да се поддржи способноста на Украина да се брани, а од друга да се спречи војната да прерасне во конфликт од поголеми размери, односно во војна меѓу Русија и НАТО.
„Ова е моја одговорност и тоа е нешто што јасно го разбирам. И нема да го сменам ставот, нема да дозволам да ме поколебаат“, изјави Шолц.
Во овој контекст, тој повтори дека не се согласува со префрлање во Украина на германски крстосувачки ракети „Таурус“ и друго оружје што може да придонесе за ескалација.
Шолц оцени дека е дојден моментот, вклучително и на бојното поле, кога е неопходно да се погледне како да се стави крај на војната и да се создадат перспективи за праведен мир за Украина што е можно поскоро.
Тој исто така изрази надеж дека ќе се одржи втор глобален мировен самит за Украина, овојпат со учество на Русија.
Свет
Трамп: Ако Камала биде избрана, Шји Џјинпинг ќе ја третира како бебе
Доналд Трамп, републиканскиот кандидат за претседател на Соединетите Американски Држави, рече дека кинескиот претседател Шји Џјинпинг ќе се однесува кон потпретседателката Камала Харис „како бебе“ доколку биде избрана во Белата куќа и дека тоа би било како „голем шаховски мајстор играјќи со почетник“.
„Ако Камала некако победи, ќе мора да се справи со Шји Џјинпинг“, рече Трамп, кој е и поранешен претседател на САД, говорејќи во радио емисија за кинескиот претседател, пренесе АП.
На прашањето на водителот како кинескиот претседател би манипулирал со Харис, Трамп одговори „како бебе“.
„Многу брзо би и ги одзел сите слатки. Таа нема да има поим што се случило. Тоа би било како голем шаховски мајстор да игра со почетник“, рекол Трамп, пренесува Танјуг.