Македонија
(Видео) Во Аеродром отворена канцеларија за услуги за граѓаните
Претседателот на Владата, проф. д-р Христијан Мицкоски, министерот за дигитална трансформација, Стефан Андоновски и градоначалникот на Општина Аеродром, Дејан Митески, денеска го отворија новиот Центар за услуги во Општина Аеродром.
Со тоа ќе биде овозможен пристап до административните услуги на едно место, меѓу кои од МВР, Катастарот на недвижности, Централен регистар, Фонд за здравство, Фондот за пензиско и инвалидско осигурување, Агенцијата за вработување.
Премиерот Мицкоски рече дека ваквите канцеларии кои кога ќе се отворат на целата територија на државата, тогаш ќе може да се зборува дека во Македонија има реална борба против корупција.
„Дигитализирањето, транспарентните услуги, сето ова што се случува ја намалува можност за корупција. Знаете како беше, тоа не така одамна, кога за 500 денара требаше да ви направи некој услуга и да извадите извод од родените. Така од прилика тоа функционираше. Исто така ќе ве потсетам на сите оние гужви и понижувачки моменти за македонските граѓани, кога мораше да вадат патни исправи, лични карти, возачки дозволи, сето тоа. Сега сето тоа е минато за многу кратко време, за 4 месеца, успеавме сето тоа да го сведеме во рамките на законскиот рок“, рече Мицкоски.
Mинистерот за дигитална трансформација, Стефан Андоновски, рече дека како жител на оваа општина, точно знае со што се соочуваат граѓаните од Аеродром, а тоа е да не можат ниту една услуга да добијат во рамки на својата општина и покрај тоа што станува збор за една од најбрзорастечките општини во државата со преку 70.000 жители.
„Од огромно значење е што првиот од најавените Центри за услуги го отвораме токму тука, ќе бидат достапни повеќе од 100 услуги, од Фондот за здравство, Катастарот на недвижности, Фондот за пензиско и инвалидско осигурување како и многу други институции. ” истакна Андоновски.
“Овој центар не е само место за издавање документи. Тука ќе имате обучени службеници кои ќе ви помогнат да научите како сами да ги користите електронските услуги. За оние на кои технологијата им претставува предизвик, нашите службеници ќе бидат тука да помогнат во целиот процес”, додаде министерот.
Градоначалникот на Општина Аеродром, Дејан Митески изјави дека во рекордно кратко време успеале да создадат услови за да се отвори оваа канцеларија каде што граѓаните на Аеродром ќе можат да добиваат услуги од институциите.
Во следната фаза е предвидено да се поврзат и општините на националниот портал за услуги, што значи дека и општинските услуги ќе бидат поблиску до граѓаните преку ваквите Центрите за услуги.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
СДСМ смета дека Мицкоски и Силјановска се кријат зад Комисијата за помилувања која поднесе колективна оставка
Оставката на Комисијата за помилувања е само уште една потврда за одговорноста на Силјановска која треба да се одважи и да ја преземе, велат од Социјалдемократскиот сојуз по колективната оставка.
„Повеќе од јасно е дека таа ги дава помилувањата и последната одлука е токму нејзина. Наместо да се кријат таа и Мицкоски зад комисијата, треба да излезат и да кажат во каков договор се со помилуваните нарко босови. Нарко босовите лично и се заблагодарија на Силјановска за помилувањата и ниедна оставка не може да ја спаси од одговорност. Обидот на Мицкоски да ја префрли вината на СДСМ пак е доказ за манипулациите и лагите на кои е спремен премиерот кога е фатен во тесно.
Од Мицкоски одговорност и чесно признание на криминалите во кои е фатен граѓаните нема никогаш да видат. Станува збор за човек кој нема чуство за лидерство и правда и ова е само најава дека за секој следен случај тој ќе ја обивнува СДСМ. Ова е одлика на слабите лидери и лоши политичари каков што е Мицкоски. Со вакво однесување ниту правда, ниту одговорност ќе има во државата и владините функционери.
Јавно ги повикуваме Мицкоски и Силјановска – излезете признајте ја вината и извинети им се на граѓаните што ослободивте опасни криминалци, ако веќе немате намера да признаете кој е договорот со нив“, се вели во соопштението.
Македонија
Членовите на Комисијата за помилување поднесоа колективна оставка
Членовите на Комисијата за помилување поднесоа колективна оставка, соопшти професорот Гордан Калајџиев.
„Ја известуваме јавноста за нашата колективна оставка од позициите членови на Комисијата за помилување. Оваа одлука ја донесовме во согласност со нашите лични и професионални принципи“, се вели во објавата на која стојат потписите на проф. д-р Методија Каневчев, Проф.д-р. Гордан Калајџиев, Проф.д-р. Арлинда Кадри Шахиновиќ, д-р. Зора Митиќ, М-р Ана Ѓорѓиева Ивановска, Ајтен Шаќири.
Oставките се случуваат откако помилувањата кои ги потпиша претседателката Гордана Сиљановска-Давкова предизвикаа бројни реакции во јавноста.
Меѓу помилуваните, најмногу прашина крена името на Акиф Бејадин Равмановски, за кого се пишуваше дека е припадник на скопскиот нарко клан Барон, но и еден од групата која само една седмица претходно, учествуваше во пукање во скопската населба Чаир, кога повреден беше скопјанец. Равмановски беше повторно приведен по објавата на помилувањата, и тоа на излегување од „Идризово“ за случајот со пукањето.
Meѓу помилуваните е и поранешниот градоначалник на Битола, Владимир Талевски, кој беше во затвор обвинет во случајот Транспортер и Маријан Ефремов првоосомничен во аферата Шпион. На листата се најде и Шенол Маслани од Арачиново, брат на познатиот Шенки Версаче, кој беше уапсен во голема акција кога полицијата заплени пушки, пиштоли, луксузни автомобили, пари и дрога.
Одлуките за помилување на осуденици, претседателот на државата ја носи по препорака на Комисијата за помилување, која е постојано работно тело во служба на претседателот.
Премиерот Христијан Мицкоски, претходно денес, одговарајќи на новинарски прашања ја обвини претходната владејачка гарнитура за случајот со Акиф Равманоски, коментирајќи дека тој е случај е од минатото, од претходната Влада, снесен како кукавичко јајце, коешто треба да имплодира во овој период. За опозициската СДСМ изјавата на Мицкоски е комична и во стилот „јас не сум од тука“.
Македонија
Борисов повеќе од Петков – Мицкоски пред изборите во Бугарија откри чија победа посакува и зошто
Премиерот Христијан Мицкоски, одговарајќи на новинарски прашања ги коментираше претстојните избори во Бугарија, пришто истакна дека е логично да посака победа на ГЕРБ, на Бојко Борисов, со која се дел од Европската народна партија.
„Со партијата ГЕРБ што ја води Бојко Борисов сме во исто политичко семејство, во Европската народна партија. Изборот е логичен“, рече Мицкоски, прашан кого би издвоил како подобар соговорник, дали Бојко Борисов од ГЕРБ или Кирил Петков од Продолжуваме со промената (ПП).
Мицкоски, сепак, е уверен дека бугарските граѓани најдобро знаат кого да го изберат за да ги претставува во институциите. Македонскиот премиер им посака на успешни, фер и демократски избори, да ја изберат најдобрата влада која ќе работи во нивните интереси и ќе се заложи за добрососедските односи.
Бугарските граѓани утре по седми пат во последните три години ќе гласаат на избори.
Што се однесува до спорот помеѓу Македонија и Бугарија, и Борисов, но и неговиот опонент од Продолжуваме со промената (ПП) Кирил Петков, неодамна повторија дека само со внесување на Бугарите во Уставот, Северна Македонија може да продолжи на патот кон Европската Унија.