Бугарските граѓани денес одат на седмите предвремени избори во последните четири години, додека поделените политички партии во земјата се борат да формираат стабилна коалиција, а гласачите стануваат сè поапатични.

Бугарија, најсиромашната членка на Европската унија и една од нејзините најкорумпирани држави, се бори со ротирачки влади од 2020 година, кога антикорупциските протести помогнаа да се собори коалицијата предводена од централнодесничарската партија ГЕРБ, објави Ројтерс.

Последните анкети покажуваат дека нема јасен победник и очигледни опции за солидна коалиција.

Гласањето завршува во 20 часот во недела, а во исто време треба да се знаат и резултатите врз основа на излезните анкети.

Конечните резултати ќе бидат познати неколку дена подоцна. Доколку не се појави неочекувано политичко партнерство или силен лидер за обединување на коалицијата, повеќето аналитичари предвидуваат дека земјата повторно ќе оди на избори на почетокот на следната година.

Бугарскиот претседател Румен Радев и даде мандат на ГЕРБ да формира влада по последните избори во јуни, на кои партијата освои најмногу гласови и обезбеди 68 места во 240-члениот парламент.

ГЕРБ, сепак, не успеа да формира мнозинска коалиција.

Мандатот потоа им беше понуден на другите партии, но и тие не успеаја да направат мнозинска коалиција, поради што беа организирани нови избори.

Анкетата објавена деновиве од агенцијата за истражување на јавното мислење Алфа Рисрч покажа дека ГЕРБ води со 26,5 отсто од гласовите.

Реформистичката партија Продолжуваме со промени (ПП) има 14,9 отсто, а ултранационалистичката проруска партија Препород со 14,2 отсто од гласовите.

Според Алфа Рисрч, се очекува излезноста да биде меѓу 30 и 32 отсто. Тоа е пад од повеќе од 75 отсто во однос на 1990-тите и околу 50 отсто од пред само три години.

Претседателката на Европската комисија, Урсула фон дер Лајен денеска во Подгорица изјави дека Црна Гора многу напреднала на својот европски пат и затвора поглавје по поглавје во преговорите.

Таа се сретна со црногорскиот премиер Милојко Спајиќ и со претседателот Јаков Милатовиќ.

„Црна Гора многу напреднала на својот европски пат. Сега затвораме поглавје по поглавје (од преговорите). Можете да го поминете целиот пат“, напиша Фон дер Лејен на својот профил на Икс.

Таа додаде дека се очекува земјава да добие над 380 милиони евра од Планот за раст за Западен Балкан, почнувајќи од 27 милиони евра до крајот на годинава.

„Имате добра причина да бидете горди на постигнатото, до крајот на годината можете да затворите четири поглавја“, рече Фон дер Лајен на прес-конференцијата по средбата со Спајиќ, цитирана од црногорската национална ТВ РТЦГ.

„Подготвени сме да понудиме секаков вид помош“, додаде таа.

Фон дер Лајен на 23 октомври ја почна својата турнеја низ земјите од Западен Балкан. Таа ги посети Албанија, Босна и Херцеговина, Србија, Република Северна Македонија и Косово. Црна Гора е нејзината последна станица.

Братот и сестрата Миланка и Јован Маџгаљ се убиени синоќа во селото Бијело Поље, додека осомничениот за тоа двојно убиство Алија Б.(64) е во бегство. Од полицијата велат дека сите расположливи единици се на терен, а до граѓаните е упатен апел да бидат внимателни.

Обвинителката Љубица Цаковиќ утринава за ТВЦГ изјави дека синоќа околу 22 часот дежурниот обвинител бил известен од полицијата дека во градот Соколац се пронајдени две тела.

– Сите мерки и дејствија ги преземаат полицијата и обвинителството. За денеска е планирана истрага – изјави за ТВЦГ обвинителката Љубица Цаковиќ.

Шефот на Регионалниот безбедносен центар „Север“, Харис Ѓурѓевиќ,  изјави дека сите полициски екипи се на терен, зајакнат е целиот работен систем во областа Вранешка долина. ТВЦГ јавува дека се ангажирани и силни полициски сили, хеликоптер и беспилотни летала.

Полицијата синоќа соопшти дека кај Томашев во Бијело Поље биле убиени две постари лица.

Оттаму додадоа дека околу 21:10 часот полицијата во Бијело Поље била известена дека во селото Соколац кај Томашево се убиени две постари лица, чии тела биле пронајдени во куќата, а насилникот побегнал вооружен.

Вишото обвинителство во Бијело Поље синоќа потврди дека се убиени две лица. Според првичните информации, во куќата биле пронајдени две тела. Полицијата идентификуваше едно лице за кое се сомничи дека е сторител на ова дело. Има информации дека тоа би можело да биде Алија Б.(64). Станува збор за повеќекратен повратник од затвор кој последниве денови е виден во тоа село.

За кражба на пушка, како што пишуваат црногорските медиуми, полицијата 15 дена трага по осомничениот Алија Б. Според неофицијални информации, вчера убиецот ручал во куќата во која се вратил и ги убил братот и сестра си.