Израелскиот премиер, Бенјамин Нетанјаху, сака неговиот син Авнер да ја одложи венчавката поради безбедносни причини, поради војната на неколку фронтови и заканата од дронови, објави денеска израелскиот јавен сервис Кан.

Свадбата на Авнер Нетанјаху е планирана за 26 ноември во регионот Шарон, северно од Тел Авив.

Кан ги цитира зборовите на премиерот на Израел кој им рекол на соработниците дека настанот може да претставува ризик за сватовите

Кабинетот на премиерот на Израел не одговори на извештајот, според „Тајмс оф Израел“.

Беспилотно летало на милитантниот Хезболах удри во спална соба во домот на Нетанјаху во Цезареја претходно овој месец, предизвикувајќи штета, а неговото семејство во тоа време не беше таму.

Египет бара враќање на светски познатата биста на кралицата Нефертити, која се наоѓа во Новиот музеј во Берлин повеќе од сто години. Германските власти го одбиваат ова и велат дека скулптурата ќе остане таму каде што е. Вредноста на скулптурата се проценува на 400 милиони евра и е еден од најпознатите артефакти на древниот Египет. Но, од 1922 година, бистата на кралицата Нефертити стара 3.370 години е во Берлин.

Сега, не за прв пат, има барање од Египет, Германија да ја врати.

Захи Хавас, поранешниот египетски министер за антиквитети, активно се залага за враќање на Нефертити од 2011 година. Неодамна, тој го интензивираше својот ангажман. Покрена петиција со која се повикува Германија да ја врати познатата биста, која моментално се наоѓа во берлинскиот музеј Нојес.

„Оваа биста, извонредна и единствена во историјата поради нејзината историска и естетска вредност, сега е во Германија, но време е да се врати дома во Египет“, се вели во петицијата.

Германски археолошки тим ја откри насликаната биста од варовник во 1912 година и ја испрати во Европа една година подоцна. Нефертити стана важна туристичка атракција.

Бистата, за која се верува дека е направена во 1345 година п.н.е., колоквијално се нарекува амбасадор на Египет. Но, египетскиот археолог Моника Хана на тоа гледа поинаку. „Амбасадорот подразбира дипломатска размена“, изјави таа за „Дојче Веле“.

„Ако испратите амбасадор само во една насока, тој е заложник“.

Археологот јавно повика на „деколонизација на египетската археологија“.

Петицијата на Хавас не е само за Нефертити –  исто така повикува на враќање на Каменот од Розета и Зодијакот на Дендера, египетските антиквитети лоцирани во Франција и Велика Британија. Каменот од Розета, изложен во Британскиот музеј во Лондон, е древен египетски камен со натписи на неколку јазици и писма – кој служел како клуч за читање на тајните на хиероглифското писмо. Зодијакот на Дендера е огромен камен дијаграм од египетски храм кој датира од средината на 1 век п.н.е.,  а моментално се наоѓа во музејот Лувр во Париз.

Пруската фондација за културно наследство, која ги надгледува музејските збирки во Берлин, во минатото призна дека во нејзините збирки има украдени уметнички дела, како што се некои бронзени скулптури од Бенин. Некои потоа беа вратени во Нигерија во 2022 година.

Сепак, се вели дека бистата на Нефертити била легално добиена од Египет, откако била откриена во остатоците од градот Амарна, краткотрајната престолнина на фараонот Ахнатон, сопругот на Нефертити. По неговата смрт, градот на источниот брег на Нил бил напуштен.

„Бистата на Нефертити беше пронајдена за време на ископувањата одобрени од египетската управа за антиквитети“, вели Стефан Михлер, портпарол на пруската фондација за културно наследство

„Таа дојде во Берлин врз основа на тогашната вообичаена поделба на наоди кои вклучуваа многу други предмети. Бистата е легално изнесена од земјата и нема барање за нејзино враќање од египетската влада“, рече Михлер во писмената изјава за ДВ.

Михлер зборува за договорот со египетските власти кој предвидува поделба во однос 50:50 од околу 10.000 пронајдени артефакти во замена за финансирање обезбедено од германскиот магнат за памук и текстил Џејмс Сајмон. Германските уметнички експерти велат дека претставник на египетската влада избрал половина од предметите, додека другата половина била однесена во Германија, вклучувајќи ја и бистата која неколку години подоцна била изложена во музејот Нојс.

Некои ја оспоруваат оваа презентација на настаните. Хавас пишува дека бистата на Нефертити „била дрско украдена од Египет од страна на Германците во 1913 година, кога била скриена и прошверцувана надвор од земјата и покрај законите кои забрануваат извоз на исклучителни археолошки наоди од Египет“.

Египетски археолог тврди дека германскиот египтолог Лудвиг Борчард, водачот на ископувањата, под лажни изговори ја однел Нефертити од земјата.

Според веб-страницата Returning Heritage, која известува за дискусиите за културна реституција, „египетската држава во тоа време имаше право на вето врз сите предмети што ги сметаа за премногу важни за да ја напуштат земјата“. Но, можно е Борчард „погрешно ја претставил важноста“ на бистата, забележа авторот на извештајот Луис Мекнаут.

Отстранувањето на скулптурата на Нефертити се случи пред откривањето на гробницата на Тутанкамон во 1922 година. Историското откритие го натера Египет да ги отповика сите права „дадени на странските истражувачи да ги донесат главните наоди дома“, рече Мекнаут во својот извештај.

Експертот верува дека е „многу малку веројатно“ Хавас да успее во својата кампања за враќање на Нефертити, освен ако тој или египетските власти „не презентираат нови докази за намерна измама“.

„Како во тоа време се делел пленот од таквите ископувања е често (ако не и секогаш) обвиткан со мистерија“, изјави Луис Мек Нут за „Дојче Веле“.

На жените во Авганистан им е забрането да се молат или гласно да го рецитираат Куранот пред други жени, според талибанскиот министер во владата.

Ова е последното ограничување за жените таму бидејќи веќе постојат закони кои ги спречуваат да го кренат гласот и да го откриваат своето лице надвор од домот. Веќе по шесто одделение се исклучени од образованието, многу јавни простори и повеќето работни места. Никој од Министерството за порок и доблест не беше достапен да ги појасни забелешките на функционерот или да потврди дали и забраната ќе стане дел од законот за моралност.

За време на настан во источната провинција Логар во неделата, заменик-министерот Калид Ханафи рече: „Забрането е возрасна жена да рецитира стихови од Куранот пред друга возрасна жена. Дури и извикувањето на фразата „Алаху Акбар“ е не е дозволено“.

Тој потсети дека на жените не им е дозволено да изведуваат езан. Нема дозвола за пеење“, нагласи тој. Министерството ја сподели аудио снимката од неговиот говор на социјалните мрежи, но подоцна ја избриша, пишува „Асоушиејтед прес“.

Министерството соопшти дека во тек е национална програма за подигање на свеста за законите.

„Организирањето вакви програми ќе придонесе за обликување на јавната перцепција и зголемување на свеста за божествените одлуки“, додаваат тие.

Авганистанските провинции веќе им забрануваат на медиумите да прикажуваат фотографии од живи суштества, уште една контроверзна и нашироко критикувана карактеристика на законот за моралност.

Талибанците основаа министерство за „пропагирање на доблест и спречување на пороци“ по преземањето на власта во 2021 година. Оттогаш, министерството ги спроведува декретите издадени од раководството на Талибанците. Станува збор за прописи кои имаат непропорционално влијание врз жените и девојчињата, како што се кодекс на облекување, посебно образование и наоѓање машки старател при патување.