Возачот на Дукати, Франческо Бањаја, изјави дека не е подготвен да се трка во Валенсија по катастрофалните поплави што го погодија регионот, дури и ако тоа го чини титулата.

Регионот на Валенсија беше тешко погоден од овонеделното невреме, во кое животот го загубија над 150 луѓе.

Патеката „Рикардо Тормо“ треба да биде домаќин на последната трка од сезоната од 15 до 17 ноември, а иако патеката е недопрена, пристапниот пат претрпе сериозна штета поради што е доведено во прашање одржувањето на трката. И не само поради тоа, туку поради фактот што целиот регион треба да се вклучи во трката во време кога има многу поважни работи.

Италијанскиот „Скај Спорт“, во петокот објави дека приоритет на Дорна е да се одржи трката за Големата награда на Валенсија, со потенцијално одложување од една недела. Првиот човек на Светската мотоциклистичка федерација, Јоргос Виејас изјави дека доколку трката не се одржи, тоа ќе биде голем удар за регионот на Валенсија.

Актуелниот шампион Пеко Бањаја, во Малезија, по првиот официјален тренинг на кој го постигна најдоброто време, јасно го истакна својот став во интервју за италијанските медиуми.

„Сè зависи од тоа каде ќе биде трката, бидејќи мислам дека нема да биде фер да се одржи во Валенсија“, рече Бањаја, „Искрено се надевам дека ќе го земат предвид тоа, етички и поради се што се случува, тоа не е исправно. Дури и поради тоа да останам без титулата, не сум подготвен да возам во Валенсија“.

На две трки и два спринта до крајот на сезоната, Бањаја заостанува 17 бода зад возачот на Прамак Хорхе Мартин.

Возачот на Мекларен, Ландо Норис, вели дека неговиот конкурент за титулата во Формула 1, Макс Ферстапен од Ред Бул, треба да го промени својот пристап кон трките.

Тој исто така додаде дека очекува почиста борба на претстојната трка за Големата награда на Бразил во Сао Паоло. Норис и Верстапен се борат за титулата, а трикратниот светски шампион доби две казни од по 10 секунди и два казнени поени во двата контроверзни инциденти на трката во Мексико минатата недела поради агресивно возење во борба за позиција со Британецот.

Вториот инцидент Норис на радио го нарече опасен, а Ферстапен доби многу критики за неговото возење.

Норис изјави дека не разговарал со Ферстапен за инцидентите во Мексико и дека многу го почитува актуелниот светски шампион, но не и неговите постапки на последната трка.

„Тоа не е нешто за што треба да разговарам со Макс. Макс е веројатно еден од најспособните возачи во конкуренцијата, ако не и најспособниот. Тој знае што може, а што не може и каде се границите. знае што треба да промени“, рече Норис.

Во четвртокот во Сао Паоло, Ферстапен ги отфрли критиките како здодевни и пристрасни и рече дека знае што прави.

Норис и Ферстапен се добри пријатели надвор од патеката откако британскиот возач му се приклучи на Мекларен во 2019 година.

Се чини дека инцидентите на трките во Австрија и Остин немаа да влијаат на пријателството, но Норис рече дека тоа може да се промени до крајот на сезоната.

Ферстапен има 47 поени предност пред Норис на четири трки до крајот. Британецот има освоено повеќе поени од конкурентот на четири од последните пет трки, но ќе треба да има просек од 11,75 поени повеќе по тркачки викенд за да ја освои титулата.

Норис изјави дека добрата работа на целиот тим му дава надеж дека може да ја освои првата титула, но дека мора да се поклопат и други работи, меѓу кои и лошите резултати на Ферстапен и Ред Бул.

Спринт трката во Бразил започнува во сабота во 15:00 часот, а Големата награда на Бразил во Сао Паоло е закажана за недела во 18:00 часот.

Ливерпул серизно е заинтересиран за репрезентативецот на Египе, Омар Мармуш, инаку играч на Ајнтрахт Франкфурт.

Иако веќе има 25 години, минатата сезона само навести, а оваа сезона целосно го потврди својот неверојатен фудбалски талент.

Мармуш на 13 натпревари постигна 11 гола и забележа седум асистенции, па јасно е зошто стана приоритет за Ливерпул.

Со девет гола тој е најдобар стрелец во Бундеслигата, а повеќе голови во „топ пет“ првенства имаат само Роберт Левандовски и Ерлинг Халанд. Импресивно е што постигнува гол на секои 66 минути.

Ајнтрахт за него бара помеѓу 50 и 60 милиони евра, тврди новинарот на „Скај Спорт Германија“, Флоријан Плетенберг.

Новинарот открива дека од Ливерпул веќе стапиле во контакт со претставниците на Мармуш, а за тоа се свесни и во клубот од Франкфурт.

Доколку клубовите ги договорат финансиските детали, Мармус би потпишал веднаш бидејќи има голема желба да игра во Премиер лигата, додава Плетенберг.

Според податоците на „Трансфермаркт“, Мармуш својата професионална кариера ја започнал во египетскиот клуб Вади Дегла.

Во 2017 година пристигна во вториот тим на Волфсбург, три години подоцна премина во првиот тим, за кој на 48 натпревари постигна шест гола со една асистенција. Бил на позајмици во Сент Паули и Штутгарт, за двата клуба одиграл само 21 натпревар, постигнал вкупно 10 гола.

Минатата сезона како слободен играч пристигна во Ајнтрахт. Во клубот од Франкфурт одигра вкупно 54 натпревари, на кои постигна 28 гола и забележа 13 асистенции.

За репрезентацијата на Египет има 34 настапи и шест гола во која настапува со Мохамед Салах, најголемата ѕвезда на Ливерпул.

Мармуш има договор со Ајнтрахт до 2027 година.