Цените во октомври месец биле намалени за само 0,1%, објави Државниот завод за статистика, реагираат од СДСМ.

„Ете толку е ефикасноста на мерката на владата за намалување на цените, нула. Месечната кошничката се намали само 57 денари. Прес-конференциите на владата и фалењето со намалени цени потонаа, а реалноста ја чуствуваат граѓаните секојдневно во маркетите. Намалување на цени нема и затоа Владата мора итно да го прифати предлог законот за ДДВ на СДСМ со кој граѓаните реално ќе штедат до 2.000 денари месечно“, се нагласува во нивното соопштение.

СДСМ, како што додаваат, има пакет од три закони кои ќе значат повеќе пари во џебот на секој граѓанин, поевтини ценина производи и повисоки плати.

Ова, појаснуваат во опозициската партија, е во интерес на сите граѓани и само од политички инает ВМРО-ДПМНЕ не ги прифаќа овие политики.

„Жално е што ВМРО-ДПМНЕ е подготвена на штета на граѓаните да води политики на отфрлање на добрите решенија. Од една страна Мицкоски зборува за обединување, од друга страна не прифаќа ништо што значи повеќе пари за граѓаните. СДСМ уште еднаш повикува на разум кај Владата и подава рака за соработка. Ако околу нешто треба да се обединиме тоа е подобар животен стандард и поддршка во време кога животот станува се потежок“, велат од СДСМ.

Според владината портпаролка Марија Митева, со новата Влада, наставниците почнуваат да се чувствуваат сигурни и помотивирани продолжуваат да ја извршуваат својата работа. Тоа, како што кажа, е особено важно за подигнување на квалитетот на наставата и за континуитет во создавање нови и добро подготвени генерации.

Митева најави дека првото најавено покачување почнува да се реализира.

„Октомвриската плата, која се исплаќа овој месец, зголемена е за 5%. Расте нивната економска стабилност, како резултат на постигната спогодба помеѓу Владата и Самостојниот синдикат за образование, наука и култура, од минатиот месец, која предвидува кумулативно покачување на платите на наставниците помеѓу 46 и 60% во следните 4 години, а истото ќе зависи од степенот на инфлацијата.

Од март следната година ќе има ново покачување за 7%, за што, во буџетот на Министерството за образование и наука за 2025 година се предвидени зголемени блок дотации кон општините за 1 милијарда и 500-тини милиони денари, споредбено со блок дотации од тековна година. Во апсолутен износ блок дотациите за 2025 година ќе изнесуваат речиси 24 милијарди денари“, икстакна Митева.

Потсети дека годинава, со самиот ребаланс на Буџетот се обезбедени дополнителни 900 милиони денари за да може нормално да продолжи исплатата на платите во образованието. според неа, претходното раководство целосно го имало потрошено буџетот за оваа намена.

„Но, тоа е зад нас. Состојбите се менуваат и постепено се враќа дигнитетот на наставникот и неговата вредност во општеството. Следува уште поголема грижа не само за економскиот стандард, туку и за подобри услови за работа и континуиран кариерен и професионален развој“, нагласи Митева.

Откривме дека коцкарскиот монопол во државата под контрола на српско-бугарската приватна компанија го финансирала новиот директор на Лотаријата, Климовски, со над 140.000 евра, а тие за себе заработиле над 100 милиони евра на сметка на државата и граѓаните. Откривме и дека оваа добивка, омилената српско-бугарска компанија на Изет, „Мегавин Меџити“, и Арбен Таравари ја имаат постигнато со целосно незаконски договор, потсетуваат од ДУИ.

„Власта во брзање да го врати и обезбеди монополот на српско-бугарското казино по налог на српскиот сопственик, во Собранието одобри автентично толкување кое на површина го извади целиот криминал на спонзорите на Изет МегаВин Меџити. Замислете го апсурдот, пратениците побараа толкување на членот 7 од законот за игри на среќа, а Владата одговори со толкување на членот 165 како преодна одредба од истиот закон. И покрај одлуките на Уставниот суд бр. 87 од 2011 година и бр. 156 од 2019 година како и во бројните претходни мислења на Министерството за финансии и Владата како и во стручното мислење, моноетничката Влада и собранието арбитрарно одлучија дека никој, ниту една компанија, немала право да организира онлајн коцкање од 1 јануари 2017 година. Ова автентично мислење од 13 август 2024 година, обзнани дека омиленото српско-бугарско казино на Изет, ‘Мегавин Меџити’, целосно нелегално организирала онлајн-коцкање преку нивната интернет-платформа 2win.mk од 1 јануари 2017 година, кога владата била предводена од ВМРО-ДПМНЕ, сè до 2024 година, оштетувајќи ја државата за десетици милиони евра“, реагираат од партијата на Ахмети.

Ги повикуваат институциите, Обвинителството, финансиската полиција, Министерството за внатрешни работи и антикорупциската комисија веднаш да дејствуваат.

Според Крешник Бектеши, само „Вреди“ ја брани српско-бугарската приватна компанија бидејќи, како што велат, „Изет Мегавин Меџити“ заедно со Арбен Таравари се стави во целосна услуга на монополот на српско-бугарската приватна компанија и директорот на Лотаријата, Александар Климовски, во коцкарската индустрија затоа што се финансирани од нивните валкани пари.

„’Вреди’ ги измами Албанците, го назначи Амет Мифтар за заменик-директор на Лотаријата, не затвори ниедно казино или обложувачница, дури ни онлајн-коцкањето не го затвори, а двапати по ред гласаше против нивното затворање во Собранието, и продолжува слепо да ѝ служи на коцкарската индустрија“, додаде Бектеши.