Претседателот на Собранието на Република Северна Македонија, Африм Гаши, денеска оствари средба со Јан Борг, претседавач на ОБСЕ, заменик-претседател на Владата и министер за надворешни и европски работи и трговија на Малта, во рамките на неговата работна посета на земјава. На средбата присуствуваа пратениците: Моника Зајкова, шеф на Делегацијата во Парламентарното собрание на ОБСЕ; Никола Мицевски и Халил Снопче, членови на Делегагацијата, како и Марина Димовска, генерална секретарка на Собранието.

Претседателот Гаши оцени дека средбата претставува уште една потврда на значењето што Малтешкото претседавање со ОБСЕ го придава на парламентите и парламентарната дипломатија. Тој нагласи дека Собранието на Република Северна Македонија активно учествува во работата на Парламентарното собрание на ОБСЕ, кое врши улога на витална врска меѓу владиниот дел на ОБСЕ и пратениците кои се директно избрани од граѓаните. Истовремено, тој информираше дека членовите на Делегацијата во ПС на ОБСЕ ги набљудуваа изборите во САД, кои се одржаа на 5 ноември годинава.

Претседателот на Собранието истакна дека како земја домаќин на првата теренска мисија на ОБСЕ, која сè уште е активна, Република Северна Македонија може од прва рака да посведочи за придобивките од теренското присуство на ОБСЕ. Во изминатите години, Мисијата на ОБСЕ во Скопје одигра значајна улога во спроведувањето на реформските процеси во земјава во бројни области. Претседателот Африм Гаши се осврна и на претседавањето на Република Северна Македонија со ОБСЕ во 2023 година, кое го оцени како круна на нашата соработка со Организацијата.

Претседавачот со ОБСЕ, Јан Борг, информираше за активностите на Малтешкото претседателство со Организација, при што се осврна на напорите за постигнување консензус за буџетот и за избор на генерален секретар, претставник за слобода на медиумите, висок комесар за национални малцинства и директор на Канцеларијата на ОБСЕ за демократски институции и човекови права (ОБСЕ/ОДИХР). Тој оцени дека Парламентарното собрание на ОБСЕ е една од најзначајните институции на Организацијата, а пратениците, со своето влијание врз претставниците на владите, можат да придонесат за разрешување на предизвиците со кои се соочува ОБСЕ.

Министерот Борг, исто така, се осврна на европската интеграција на Република Северна Македонија и нагласи дека Малта отсекогаш ја поддржува политиката на проширување на ЕУ.

Шефот на Делегацијата во Парламентарното собрание на ОБСЕ, Моника Зајкова, нагласи дека претседавањето со најголемата регионална организација за безбедност и соработка во турбулентни времиња претставува чест и предизвик и му посака на министерот Борг успешно завршување на Малтешкото претседателство со ОБСЕ. Таа оцени дека пратениците можат да одиграат значајна улога во генерирањето политичка доверба и промовирањето на улогата на ОБСЕ.

Пратеникот Халил Снопче се задржа на позитивната улога на ОБСЕ во регионов и на значењето на Парламентарното собрание на ОБСЕ, кое редовно дискутира на важни теми за подобрување на животот на луѓето, кои се крајни корисници на услугите на ОБСЕ.

Соговорниците изразија уверување дека и во иднина ќе продолжи отворениот дијалог и плодната соработка на Собранието на Република Северна Македонија со ОБСЕ и со сите нејзини институции и структури.

Претседателот на ЗЕЛС и градоначалник на општина Кисела Вода Орце Ѓорѓиевски, денес во просториите на ЗЕЛС одржа средба со министерот Цветан Трипуновски и градоначалникот на општина Струмица Костадин Костадинов, за проблемите на струмичани и изнаоѓање на заеднички решенија. На состанокот се усвоија неколку заклучоци, а Ѓорѓиевски истакна дека ЗЕЛС е обединет и додека е тој претседател, сите проблеми ќе се решаваат на заедничка маса.

-Со добра волја и на заедничка маса, да дојдеме до заедничко и прифатливо решение за сите – беше нотирано денес на средбата во просториите на ЗЕЛС, која ја одржавме заедно со министерот Цветан Трипуновски и колегата Костадинов од Струмица.

Со разговор секогаш се доаѓа до целта, па така оваа плодна средба ќе вроди со плод, бидејќи веќе ги зацртавме правците на траекторијата за трајно решавање на проблемите на граѓаните од Струмица. Како што истакнав на моите претходни излагања, кај мене не постои поделба по ниту една основа и ќе бидам медијатор во решавање на сите процеси.Политика мора да стои настрана, граѓаните се приоритет.

На состанокот ги договоривме следните точки:

Формирање на комисија од повеќе научни институции за следење на фактичка состојба на браната Турија и причините за неодамнешното појавување на манган во водата.
Долгот кој што го има општина Струмица спрема АД ,,Водостопанство” ќе биде сервисиран согласно утврдена динамика, а АД ,,Водостопанство”ќе ги извршува сервисирањата и услугите од својата надлежност.

Дискутиравме за квалитетот на водата која што во моментов според надлежните институции е исправна и чиста за пиење.

Драго ми е и што колегата Костадинов го промени својот став и ЗЕЛС останува обединет.
Од сега па натаму, додека јас сум претседател, проблемите ќе се решаваат на маса, а комуникацијата помеѓу институциите ќе биде на највисоко ниво.“, изјави Ѓорѓиевски.

Експертите и јавните лица се едногласни во однос на ставовите дека родителството е посебна животна улога која носи голема одговорност и која подразбира безусловна љубов, силна грижа, огромна храброст и безброј компромиси.

Водителот Жарко Димитриоски и хрватската актерка и амбасадор на УНИЦЕФ Мирна Медаковиќ-Степинац ја отворија првата регионална конференција на Becutan, која броеше близу 200 посетители од Македонија и од регионот.

Разбирајќи ги потребите на модерните текови и предизвици на современото родителство, Becutan со особено задоволство го организираше овој несекојдневен настан, во чиј фокус не беше негата, туку грижата за секое дете уште од првиот ден на раѓањето.

Конференцијата беше посветена на сите деликатни теми и важни предизвици со кои се соочуваат родителите денес, а за кои средината, под влијание на социјалните медиуми, сѐ почесто креира илузија на совршена слика. Дали има совршена мера за неизмерната родителска љубов при воспитувањето и дали таа има граници? Како се менувал пристапот во родителството низ децениите? Дали воопшто постојат точни одговори за
многуте родителски дилеми? Ова беа само дел од темите за кои без задршка дискутираа јавни лица и експерти од повеќе сфери поврзани со детскиот развој од Македонија и од регионот.

ПАНЕЛ 1: „Дали мама или баба знае подобро?“
Бебето не доаѓа на свет со упатство за употреба – родителите го имаат првиот потег!

Докторите, здравствените професионаци, експертите за ран детски развој и психолозите се едногласни дека родителството денес се перципира многу покомплексно одошто порано.

Д-р Амра Јузуновиќ-Каљиќ, спец. педијатар, подвлекува дека мора да постои НЗС низ паралелата на семејните улоги некогаш и денес. „Она што сите нè поврзува е љубовта спрема децата. Иако можеби имаат различни методи, мама и тато, како и баба и дедо имаат една иста цел најдоброто за своите деца и внуци.“

Учесници на панелот(од лево кон десно):д-р Натко Бек, специјалист педијатар и водител на емисијата на HTV „Dr.Beck“ (Хрватска); прим. д-р Марина Поп-Лазарова, специјалист неонатолог (Македонија); д-р Ивана Бралиќ, специјалист педијатар (Хрватска); д-р Горан Вукомановиќ, специјалист педијатар (Србија); д-р Амра Јузуновиќ-Каљиќ, специјалист педијатар (Босна и Херцеговина)

прим. д-р Марина Поп-Лазарова, специјалист неонатолог, во својата дискусија ја потенцираше суштинската улога на фактот дека секое дете е различно, па оттука генерализациите за совршено родителство најчесто се само извор на дополнителен стрес и притисок врз самите родители.

Д-р Ивана Бралиќ, специјалист педијатар, ја потенцираше важноста на индивидуалниот пристап во процесот на растење дете, без притисок од императивот на денешното родителство „да се биде модерен“.

ПАНЕЛ 2: И ЉУБОВ И ГРАНИЦИ
Во воспитувањето по мерка само љубовта треба да биде неизмерна!

Постои ли баланс меѓу емоциите и поставувањето граници во процесот на воспитување? Колку често родителите се преиспитуваат дали постапиле правилно? Дали родителите се најдобрата верзија на себе пред своите деца и дали идеализирањето на улогата на мајката го зголемува притисокот за тежнеење кон совршено родителство?. Ова беа некои од темите на кои дискутираа мајките и експертите изнесувајќи ги своите ставови околу вечните родителски дилеми.

„Не сметам дека поставувањето граници, па и наменското казнување во воспитниот процес значат емоционално дистанцирање од децата. Напротив, граници мора да постојат, но тоа бара комплетно индивидуален пристап. Секое време си носи свои предизвици. Ако за мене најголема казна во детството била дека не смеам да играм надвор, за моите деца тоа не би имало никаков ефект“, истакна водителката Сања Кужет.

Јелена Холцер, педагог и основач на „Училиште за родители“, истакна:

„Нашите баби и дедовци и нашите родители биле многу поедноставни во процесот на пренесување вредности кон децата. Во тој поглед, тие имаат блага предност во таа родителска улога, во однос на нас. Нашите деца денес, како резултат на огромната достапност на информации (интернет), можат сами да дојдат до одговори на одредени прашања. Или ако од вас го добијат одговорот кој не им е по мерка, посегнуваат кон друг, сопствен извор на информации.“

Д-р Бек пак нагласи: „Во процесот на воспитување ние сме граница. Нашиот пример е она кое им покажува на децата до каде можат да одат“.

Учесници на панелот (од лево кон десно): Мирна Медаковиќ-Степинац, хрватска актерка и амбасадор на УНИЦЕФ (модератор на панелот); Ружица Максимовска, уредник на магазинот „Портрет“ (Македонија); д-р Натко Бек, специјалист педијатар и водител на емисијата на ХТВ„д-р Бек“(Хрватска); Лејла Филиповиќ, водителка и модел (Хрватска); Сања Кужет, водителка (Србија), и Јелена Холцер, педагог и автор на програмата „Училиште за родители“ (Србија).

ПАНЕЛ 3: ТАТО Е ХЕРОЈ
Татковството не е должност туку љубов!

Завршниот панел на Првата регионална БЕКУТАН конференција, кој беше посветен на татковците и на нивната посебна улога во текот на растењето и развојот на децата, даде искрени одговори на прашањата за емотивната трансформација во осознавањето на татковската улога, но и цврсти ставови за општо прифатената валоризација на главната улога на мајката.

Учесници на панелот (од лево кон десно): Жарко Димитриоски, водител и модератор на панелот (Македонија); Сашко Коцев, актер (Македонија); Петар Бенчина, актер (Србија); Тарик Филиповиќ, актер и водител (Хрватска)

„Прашањето од типот дали таткото помага е сосема погрешен наратив. Банално е поистоветувањето на грижата за сопственото дете со некаква помош за сопругата. Татковската улога е сосема комплементарна во едно семејно секојдневие“, истакна актерот Петар Бенчина.

Согласни дека цврстата врска меѓу таткото и детето започнува од првиот ден на раѓањето, панелистите низ сопствените искуства говореа за татковската улога во емоционалниот детски развој.

„Во моментот кога станав татко сфатив дека животот се сведува на периодот ‘пред’ и ‘потоа’. Тогаш сфатив и дека ми недостасувале вистински грижи во животот“, истакна актерот и водител Тарик Филиповиќ.

Актерот Сашко Коцев беше дециден дека клучот за здрав родителски пристап е непосредноста во семејните, односно партнерските односи кога е во прашање поделбатана обврските:

„Родителството не е ексел-табела. Спонтаната организација во зависност од обврските на двајцата родители, веројатно, е некаква тајна на успехот. Природно е да ја преземам грижата околу детето кога сопругата има дежурство на работа; исто и таа кога јас сум на снимање. Не требаат потпис и печат за успешно родителство. Напротив!“ изјави Коцев.

Жарко Димитриоски, кој беше и модератор на татковскиот Becutan-панел, низ сопственото искуство на тазе татко, потенцираше дека татковската улога е клучна, особено во првите денови по раѓањето на бебето, кога воедно и се формираат навиките за здраво родителство.

ПР