Производството на храна и секторот земјоделство, се сектори кои се битни за сите граѓани и во кои не смее да има поделби, за кои мораме да се усогласиме дека навистина ги таргетираат сите граѓани и за кои треба да анализираме, да дискутираме сериозно, а не да зборуваме за се и сешто, а најмалку за тоа што се факти и аргументи, истакна пратеникот на СДСМ Љупчо Николовски, во рамките расправата во собраниската комисија за финансирање и буџет.

Николовски нагласи дека треба да се продолжи со добрите политики, со реализација на започнатите проекти, но и да се обезбеди што поголема поддршка на производителите.

Во предложениот буџет, за жал, буџетот за земјоделство, шумарство, лов и риболов за разлика од 2023 и 2024 се намалува. Споредбено со последниот ребаланс, овој буџет се намалува за 15,7%, нагласи Николовски, додавајќи дека намалувањето се должи, пред се на драстично намалување на инвестициските програми, програмата за рурален развој, а има исто ниво на пари за директни плаќања, што значи дека нема за поголеми субвенции, што тутунарите многу добро го видоа, дека не само што нема зголемување, туку има намалување.

Николовски нагласи дека има огромно кратење кај инвестициските програми за малите производители, како најуспешна, сосема нова политика, во чии рамки денес има регистрирани 4.000 производители на храна, а пред 3 година беа 0.

Оваа програма за рурален развој се намалува за 10 пати. Во 2023 за оваа програма се обезбедни 850 милиони денари, а за 2025 година 150 милиони денари, што е намалување над 80%, иако претставува вистинска поддршка на малите производители, потенцираше Николовски, додавајќи дека намалувањето на капиталните расходи е спротивно на политиките на ЕУ, каде што трендовите говорат дека програмата за рурален развој, е најголема и опфаќа над 40% од буџетот.

Николовски нагласи дека нема нова мерка и политика што земјоделците можат да ја очекуваат наредниот период, сите програми се воведени од претходната влада.

За пет месеци нема јавен повик од програмата за рурален развој, преку платежната агенција, а има пренесени обврски од претходната година кои земјоделците ги инвестирале и ќе бараат поврат, а во 2025 со овие средства не се покрива ниту една мерка, да бидат исплатени земјоделците за претходната година, нагласи Николовски.

Тој истакна дека руралната програма е многу битна за младите земјоделци, за набавка на добиток, нова механизација, но и за инвестиции во проекти на општините.

„Многу галама се крева во јавноста, околу тие проекти за општините, колку биле 250,100 милиони евра, а гледаме дека ни 60 милиони не се склучени, а камоли да бидат реализирани, а тоа со заеми, камати, кои и не знаеме ни колку ќе бидат, а со оваа програма за рурален развој во последните 4 година, без денар заем, имаме реализирано 204 проекти, водоводи, канализации, културни домови, плоштади, театри, се она што ќе финансира од заемот од Унгарија, сега со заем“, истакна Николовски.

Тој прецизираше дека со оваа програма, секоја општина рамномерно има добиено 3 или 4 проекти, во вкупен износ од 49 милиони евра, коишто веќе се исплатени.

Само преку оваа програма што денеска се крати од 850 на 150 милиони годишно, претходната влада реализира 204 проекти во последните 4 години и тоа и преку една програма за рурален развој, за којшто ако бевме паметни, ЕУ ни нуди до 2030 година една милијарда 147 милиони евра токму за оваа програмата, грант, фондови, неповратни средства и наместо тоа ние одбираме да се задолжуваме, да ги задолжуваме следните генерации, нагласи Николовски.

Во однос на системите за наводнување, за кои владата најавуваше дека ќе и бидат приоритет, Николовски рече дека и тука средствата се намалуваат.

Николовски нагласи дека несериозно е што се намалува и ИПАРД поддршката.

Тој ги повика пратениците од мнозинството да ги поддржат амандманите на СДСМ, со кои се исправаат политиките кои повторно ќе бидат и во интерес на владата, на граѓаните и на државата.

Земјоделците ги интересира зошто е скратена програмата за рурален развој за 10 пати, зошто е скратена ИПАРД програмата, земјоделците ги интересира дали ќе добијат авансна исплата до крајот на годината, ги интересира зошто нема ни една нова мерка и политика, зошто се копираат сите мерки, коишто беа спроведени во претходниот период, а да не правиме споредба што е направено во првите 100 дена во 2017 и што е направено сега, истакна пратеникот на СДСМ Љупчо Николовски, пред собраниската комисија за финансирање и буџет.

„Мој впечаток е дека граѓаните многу малку знаат за ГДП проценти и компарации, меѓутоа многу добро разбираат што е несигурност, небезбедност, непредвидливост, мртов систем, лага или кражба“, истакна пратеничката од ВМРО-ДПМНЕ Рашела Мизрахи на денешната собраниска комисиска седница за финансирање и буџет.

Таа продолжи и додаде:

„Кога зборуваме за буџет ќе зборуваме за прв реален буџет кој го имаме. Зошто? Заради тоа што позади ковид пандемијата почнала и друга пандемија, а тоа е коруптивна пандемија“, вели Мизрахи.

„И ДЗР, но и неформалните средби со директорите од здравствениот систем укажуваат на ваквиот факт. Скриената пандемија граѓаните ја почувствуваа преку пандемијата ковид-19, недостатокот на маски, лекови и модуларните болници“, кажа Мизрахи.

Pосочи дека корупцијата е дефинирана како злоупотреба на јавните средства за приватни цели.

„Корупцијата е дефинирана како злоупотреба на јавните ресурси за приватна корист која го задава најголемиот и најтешкиот удар на македонското здравство. Се проценува дека 6% од здравствените распределби се предмет на корупција и тоа е според Транспаренси интернешнал“, укажа Мизрахи.

„Предлог буџетот за 2025-та година е буџет кој е домаќински и внимателно изработен, со силен фокус кон подобрување на економската состојба во државата. Овој предлог-буџет се темели на дисциплина, мерење на резултати, проверки, ефикасност, ефективност, стратешко планирање“ , истакна пратеничката од ВМРО-ДПМНЕ Бисера Златеска во своето излагање на денешната расправа за предлог-буџетот за 2025 година.

Златеска додаде дека нефункционалниот систем кој го оставила претходната влада е веќе минато и дека довербата којашто ја имаат од граѓаните нема да ја изневерат. Односно, искрено и чесно ќе следуваат позитивни промени во корист токму на граѓаните.

„Пропаднато здравство, нефункционални институции, лудо растечки цени на производи, безредие, непотизам, лаги, корупција, бркање на младите што подалеку од тука. Ова е мракот што не снајде. Мрак од кој ќе излеземе благодарение на искрена и чесна работа, и сето тоа поради нашата должност и обврска кон македонскиот народ кој својата доверба ја стави во наши раце. И преку нас, неговите избраници, токму тука се бори за подобар живот“, децидна е Златеска.

Напомена дека токму буџетот ќе ја има главната улога во исполнување на барањата на граѓаните. Дополнително, напомена дека ВМРО-ДПМНЕ нема да дозволи донесување на погрешни политики затоа што граѓаните најмалку не го заслужуваат истото.

„Во креирањето на сето ова, главна улога има буџетот на државата. Во состојбата во која се наоѓа, на нашата држава и треба помош, а ние сме тука да и ја пружиме. Ние не смееме да се расфрламе со погрешни зборови, ниту со погрешни дела, затоа што на Македонија и на македонскиот народ му е преку глава од грешки и лаги“, заклучи Златеска.