Извештаите покажуваат дека кампањата на американската потпретседателка, Камала Харис, е во долг од 20 милиони долари по недамнешните претседателски избори. Се очекува таа да им се обрати на финансиските директори на Демократскиот национален комитет среде оваа финансиска криза.

Главниот политички донатор Џон Морган изрази загриженост за трошењето на кампањата, нагласувајќи дека донаторите сакале да го поразат Трамп, а не нужно да ја изберат Харис. Тој верува дека преголемото трошење, вклучувајќи 15 милиони долари за продукција на настани и 4 милиони долари за приватни авиони, е доказ дека Харис не треба да се кандидира повторно.

„Мислам дека ова ја дисквалификува засекогаш. Ако не можете да водите кампања, не можете да ја водите ниту Америка“, рече тој и навести дека тоа може негативно да влијае на кариерата на Камала Харис, бидејќи донаторите се прашуваат каде отишле парите.

Додека извештаите за долгот се вознемирувачки, кампањата на Харис тврди дека нема неплатени долгови или сметки.

Линди Ли, член на финансискиот комитет откри дека внатрешните борби довеле до тоа некои членови да ја напуштат партијата.

Министерот за надворешни работи на Русија го критикуваше НАТО за изјавите за можноста за превентивни удари врз Русија

Тој денес на состанок со шефовите на безбедносните агенции и разузнавачки служби соопшти дека шефот на воениот комитет на НАТО, Роб Бауер ги објавил вистинските намери на Алијансата, кога рекол дека размислува за изведување на превентивни удари врз Русија во случај на можен вооружен конфликт, пренесува ТАСС.

„Шефот на воениот комитет на НАТО отворено рече дека, за да ги остварат целите на заштита и одбрана на земјите-членки на НАТО, треба превентивно да изведат напади врз цели во Русија кои, според мислењето на НАТО, можат да претставуваат закана за земјите-членки на Алијансата. Мислам дека тука нема што да се коментира. Ја преминаа границата на секоја пристојност и веќе јавно ги изнесуваат вистинските намери“, рече Лавров.

Претходно, на конференција во Центарот за европска политика во Брисел, шефот на Воениот комитет на НАТО, Роб Бауер, повика на производство на повеќе оружје за да се извршат прецизни удари длабоко во Руската Федерација во случај на конфликт, пренесе ТАСС.

Кина го предупреди Вашингтон дека никој нема да победи во трговската војна, додека Доналд Трамп се заканува дека ќе воведе дополнителни царини од 10 отсто за стоките што доаѓаат во САД.

Ова не се царините од 60 отсто што Трамп вети дека ќе ги воведе за кинеските производи за време на неговата кампања, па некои компании кои извезуваат телефони, чанти и мебел, а кои веќе претрпеа големи загуби од првата трговска војна, може да здивнат.

Други, најверојатно, стравуваат дека ова е само воведен удар на Трамп и оти наскоро ќе следат дополнителни царини.

Кинеските државни медиуми ја опишаа заканата како „неодговорна“, додека Министерството за надворешни работи во Пекинг рече дека Кина презела значителни чекори за да го запре нелегалниот увоз на дрога, вклучително и фентанил, во САД.

„Кина е една од земјите со најстроги и најтемелни политики во борбата против дрогата во светот“, вели портпаролот на Министерството.

Но, Пекинг го очекуваше ова. Имаше време да се подготви за вториот мандат на Трамп и Кина ги научи лекциите од неговиот прв мандат во Белата куќа, пишува „Би-Би-Си“.

Голем дел од нејзиниот земјоделски увоз сега доаѓа од Бразил, Аргентина и Русија, а Кина почна да извезува повеќе производи во земји кои не се сојузници на САД.

Последното нешто што му треба на Пекинг е уште една трговска војна бидејќи се бори со слабиот економски раст, кризата со недвижностите и високата невработеност кај младите.

Засега овие тарифи се само закана. Покрај построгите мерки против фентанил, Трамп можеби се надева дека ќе го убеди претседателот Кси да престане со големото субвенционирање на кинеските производствени индустрии, што тој го гледа како нелојална конкуренција.

Но, оваа тактика не функционираше во минатото, а Пекинг веројатно подготвува свои силни контрамерки.