Македонија
Стојаноски: Владата со новиот буџет ќе инвестира во автопатската мрежа, за разлика од претходната власт која остави испокраден буџет

На денешната собраниска Kомисија за финансирање и буџет на амандманската расправа за Предлог-буџетот за 2025 година, се обрати пратеникот од ВМРО ДПМНЕ, Бојан Стојаноски кој истакна дека е за поздравување тоа што на ова расправа за прв пат има владејачко мнозинство коешто не бега од дебата, но покрај ова тој ја образложи и наследената катастрофална состојба на буџетот од претходната власт.
„Ова е прво владино мнозинство коешто не бега од дебата за амандмани во буџет, покрај другото и да ве гледа народ дека ништо не сте научиле од лекцијата и со таа ароганција, со тоа лажење со таа замена на тези, но за среќа постојат тука луѓе коишто ги разбираат работите. За тоа што го кажавте за проектите ќе биде 136 милиони евра од наредната година кога ние можеме вака да планираме буџет, зошто сега е 50 милиони евра, затоа што буџетот кога дојдовме на власт беше испокраден, 71% од дефицитот беше исполнет, требаше да исплатиме четири или пет плати на две, три институции, немаше 5 милијарди денари да обезбедиме за уште една пензија“, вели Стојаноски.
Тој ги наведе и институциите коишто тонеле во долгови, а за кои оваа власт нашла решение за да имаат можност тие претпријатија да ги сервисираат основните услуги и обврски кон граѓаните, исто така тој посочи дека до година ќе има инвестиции во автопатската мрежа односно ќе се работи на повеќе точки за изведување на автопатските делници.
„Македонски железници беа 5 милијарди во долг, Министерството за образование беше 5 милијарди во долг, ЕСМ беше 5 милијарди во долг ,и сите тие така беа во долгови ,затоа не можевме да смогнеме сили да направиме 136 милиони евра од аспект на осумстотини точки. Во еден момент во државата ќе почне со реализација над осумстотини точки само по основ на овие средства а тука да не ги бројам автопатите, ете да најавам до година во оваа држава ќе се работи на пет точки од еднаш во изведување на автопатски делници“, рече Стојаноски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утрово ведро и посвежо, преку денот ќе биде сончево и потопло

Во поголем дел од земјава утрово ќе биде ведро и посвежо, во источните делови променливо облачно со услови за слаб локален дожд. Преку денот времето ќе биде сончево и потопло со мала до умерена облачност. Ќе дува умерен, долж Повардарието и во источните делови засилен ветер од северен правец (над 70 km/h).
Минималната температура ќе биде во интервал од 3 до 11, а максималната ќе достигне од 16 до 24 степени.
Во Скопје, сончево и потопло со мала до умерена облачност. Ќе дува умерен до засилен северен ветер. Минималната температура ќе се спушти до 7, а максималната ќе достигне до 24 степени.
Времето во наредните денови
Во следните денови времето ќе биде променливо облачно и нестабилно со локален пороен дожд, грмежи и засилен ветер, а дневните температури ќе бидат во постепен пораст.
Македонија
Дел од општина Ѓорче Петров денеска без струја

Од ЕВН Македонија АД известуваат дека денеска без електрична енергија ќе останат:
· во периодот од 11 до 13 часот, корисниците од викенд населба село Кучково, општина Ѓорче Петров.
Македонија
Тошковски за тендерот за униформите: Се фокусиравме на квалитетот и цената, нема неправилности

Министерот за внатрешни работи, Панче Тошковски, реагира на обвинувањата за тендерот за униформите за припадниците на полицијата, велејќи дека постапката била предмет на задолжителна управна контрола од Бирото за јавни набавки, при што не биле најдени никакви неправилности.
По обвинувањата од опозициската СДСМ дека тендерот го добиле две фирми, од кои едната со двајца вработени, а другата отворена 20 дена пред постапката, Тошковски образложи дека нивната логика е поттикнување на конкуренцијата и фер пристап.
Премногу строги критериуми, вели Тошковски, често ги елиминираат малите и средни претпријатија, кои во Македонија се најконкурентни и често можат да понудат најдобри цени. Наша цел, додава министерот, е да добиеме најдобар квалитет по најповолна цена, а тоа го постигнуваме со овозможување на поширок круг на понудувачи.
„Законот за јавни набавки не предвидува исклучување на фирма само поради тоа што е новорегистрирана или има помал број вработени и ние целосно постапуваме согласно неговите одредби“, дециден е Тошковски.
Министерот појасни и дека МВР нема склучено договор за директна, еднократна исплата на наведената сума одеднаш, туку склучена е рамковна спогодба која претставува максимална вредност за набавки во наредните три години. Самата рамковна спогодба, вели тој, не предизвикува директна финансиска обврска за Министерството, односно финансиски обврски се преземаат само кога ќе има реална потреба и се склучуваат посебни, поединечни договори за конкретни нарачки, со динамика на испорака според потребите.
„Наместо само на историјат на понудувачите, ние се фокусиравме на она што е најважно, реалниот квалитет на производот. Затоа, клучните услови беа задолжителна достава на мостри и лабораториски анализи. Секој понудувач мораше да достави примероци од униформите и делови од униформа, а мострите беа предмет на лабораториски анализи и испитувања од независни акредитирани лаборатории. Важно е да се нагласи и дека техничките спецификации за униформите и нивните делови се уредени со Правилник кој е јавно објавен во Службен весник. Тоа значи дека тие се стандардизирани и нема можност за какво било влијание врз нивната содржина, што обезбедува еднаков пристап за сите економски оператори“, се вели во реакцијата.
Покрај квалитетот, како што се додава, клучен фактор е и цената. Анализата покажала дека разликата помеѓу највисоката и најниската понудена цена во постапката е 14,4 отсто за дел 1 и 27,9 отсто за дел 2 од набавката, што ја потврдува конкурентноста на тендерот и добиените поволни цени.
Во врска со тоа дека обвинувањата доаѓаат од СДСМ, Тошковски рече дека токму тие што ги оставија полицајците без униформи, принудени сами да си крпат, шијат или позајмуваат делови од пензионирани колеги имаат образ да зборуваат за наводни криминални тендери.