Спорт
Владимир Кличко му се враќа на боксот?

Саудискиот боксерски промотер Турки Алалших откри дека би сакал Владимир Кличко да се врати во рингот. Познатиот украински боксер, еден од најдобрите на сите времиња, има 48 години, а евентуално враќање во рингот би се случило во борбата за појасот на шампионот во тешка категорија против Тајсон Фјури. За такво нешто треба да се поклопат неколку работи.
Владимир Кличко, братот на Виталиј Кличко, исто така поранешен шампион, а денес градоначалник на Киев во воено окупирана Украина, прво треба да се согласи да се бори за да почне да се реализира планот на промоторот. Дополнително, би било неопходно Британецот да го победи Олександар Усик во реваншот на 21 декември.
„Сонувам да ја видам оваа борба. Ако прифати, би сакал да го видам Владимир Кличко да има шанса да стане најстариот шампион во тешка категорија на сите времиња. Се разбира, тој нема да биде во рингот против Усик ако Усик победи бидејќи тие се и двајцата херои од Украина и нема да се борат меѓу себе“, рече Алалших.
Најстариот шампион во тешка категорија е Џорџ Форман, кој го нокаутира Мајкл Мурер во 10. рунда во ноември 1994 година во борба за титулата. Форман тогаш имаше 45 години. Кличко во март следната година ќе го прослави својот 49 роденден.
Виталиј и Владимир Кличко беа шампиони на сите најважни промоции во „Кличко ерата“ од 2004 до 2015 година. До 2015 година, Владимир имаше учинок од 64 победи и три порази, а потоа на крајот на таа година му ги предаде појасите ВБА (Супер), ИБФ, ВБО и ИБО на Тајсон Фјури по едногласна одлука на судиите во корист на Британецот.
Тој се врати во рингот две години подоцна во мечот против Ентони Џошуа. Загуби во 11. рунда од борбата за појасите во тешка категорија на ИБФ, ВБА и ИБО.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Спорт
Раниери ја одби Италија

Клаудио Раниери (73) ја одбил понудата да биде селектор на италијанската репрезентација по заминувањето на Лучијано Спалети (66).
„Му се заблагодарувам на претседателот на Италијанската фудбалска федерација, Габриеле Гравина, за оваа можност. Тоа е голема чест, но по внимателно разгледување, решив целосно да останам на располагање на Рома во мојата нова улога“, рече Раниери.
„Фридкинс (сопствениците на Рома) ми дадоа целосна поддршка за секоја одлука што би ја донел во врска со националниот тим, но ова е исклучиво моја одлука“, додаде Раниери.
Раниери, кој во својата кариера ги водеше Интер, Јувентус, Атлетико Мадрид, Челзи, Лестер, со кого ја освои титулата во англиската Премиер лига во 2016 година, и Монако, неодамна ја презеде улогата на стратешки советник на американските сопственици на Рома.
Минатиот ноември ја прекина пензијата за да ја спаси Рома, која се мачеше во Серија А. Раниери беше фаворит да го наследи Спалети, кој последен пат ја водеше италијанската репрезентација во победата од 2:0 над Молдавија во понеделник.
Спорт
Тудор и следната сезона ќе го предводи Јувентус

Игор Тудор ќе остане тренер на Јувентус и следната сезона. Тудор среде сезоната го замени Тијаго Мота и успеа да го освои четвртото место.
„Одлучивме да ја продолжиме соработката со Игор за Светското клупско првенство, но и за следната сезона, а се надевам и подолго од тоа“, изјави новиот генерален директор на Јувентус, Дамиен Комоли, на својата прва прес-конференција.
Ова е крај на долга сага во која се шпекулираше со иднината на хрвастскиот тренер.
Во март тој потпиша договор до крајот на сезоната, со клаузула дека автоматски ќе биде продолжен за една година доколку избори пласман во Лигата на шампионите.
Во девет натпревари со Јувентус, Тудор постигна пет победи, три нерешени резултати и еден пораз, а неговиот следен тест е Светското клупско првенство овој јуни и јули. Јувентус е во група со Манчестер Сити, Ал Аин и Видад Казабланка.
За потсетување, Тудор помина девет години како играч во Јувентус, додека во сезоната 2020/21 му беше помошник на Андреа Пирло. Потоа, тој ги водеше Верона, Марсеј и Лацио. Претходно во својата кариера, тој двапати ги тренираше Хајдук и Удинезе, а исто така ги водеше и ПАОК, Карабукспор и Галатасарај.
Спорт
Кипар ги одби Макаби и Хапоел

Властите на Кипар нема да дозволат израелските клубови да бидат домаќини во нивната земја. Планот на екипите од Евролигата, Макаби и Хапоел, беше во новата сезона да бида домаќини на Кипар. Макаби изминатите две сезони, беше домаќин во Белград.
Грчките медиуми објавија претходно дека Лимасол ќе биде градот каде што израелските клубови ќе ги играат своите домашни натпревари во елитното натпреварување.
Сепак, според грчките медиуми, дошло до пресврт. На израелските клубови им е забрането да бидат домаќини поради безбедносните мерки и технологијата што ги придружува ваквите натпревари.
Се пишуваше дека Израелците размислуваат и за Родос, додека Белград беше нивниот безбеден дом во претходниот период.
Останува да се види каде Макаби и Хапоел ќе ги играат своите домашни натпревари.