Градоначалникот на општина Кисела Вода, Орце Ѓорѓиевски, денес оствари нова средба со министерот за внатрешни работи Панче Тошковски, со цел подетално разгледување на проектот за изградба на нова полициска станица во населбата Кисела Вода.

Имено, Општина Кисела Вода е во завршна фаза со подготовката на проектна документација што ќе овозможи реализација на овој проект кој е приоритет за унапредување на безбедноста во општината, се истакнува во соопштението.

Состанокот беше фокусиран на дефинирање на конкретните активности потребни за изградба на новата полициска станица, која е предвидена со Деталниот урбанистички план (ДУП) во близина на кружниот тек помеѓу Кисела Вода и Припор.

Беше направена анализа на предложената локација, која е стратешки избрана за да одговори на потребите на населението од овој дел на општината. Во моментов на територија на општина Кисела Вода функционираат две полициски станици, а во општината живеат околу 70 000 жители. Едната полициска станица ја покрива цела централна Кисела Вода се до Пинтија, додека ПСОН Драчево покрај селото и населбата Драчево ги покрива и Студеничани, Батинци, Зелениково и Морани. Отворањето на трета полициска станица е несомнено потреба и би овозможило поголема присутност на полицајците на терен, но и побрза реакција, беше заклучокот од овој денешен работен состанок.

– Со министерот Тошковски детално ги разгледавме следните чекори за реализација на ова значајно безбедносно прашање. Отворањето на трета полициска станица во овој дел од градот ќе значи побрза и поефективна реакција на полицијата во ситуации кога е загрозена безбедноста на нашите жители, како и зголемена присутност на полицијата на терен. Исто така, во новиот објект ќе има и административни служби за вадење на документи, а предложеното решение ќе ги растерети и постојните полициски станици „Беко“ и „Пролет“. Проблемите со недостаток на простор и ограничен паркинг, кои се особено изразени во овие станици, ќе бидат значително олеснети со реализацијата на новата станица во Кисела Вода. Го информирав министерот дека ние, како општина сме во завршна фаза со подготовката на потребната проектна документација и заеднички ги дискутиравме оперативните и техничките детали, како и следните чекори за реализација. Верувам дека со оваа соработка ќе успееме да реализираме еден значаен проект што ќе донесе долгорочни придобивки за граѓаните, изјави градоначалникот Ѓорѓиевски.