Директорот на Управата за санкции Александар Пандов поднесе кривични пријави против неколкумина затворски полицајци од затворот во Штип оти во февруари дозволиле непознат автомобил да влезе преку една од капиите и преку ѕидот да фрли кокаин и марихуана спакувани во топка, а потоа затворски полицајци заедно со затвореници ја барале топката во тревникот. Настанот се случил на 20 февруари, во 21.40 часот, па откога во мракот не ја нашле дрогата, затворските полицајци и затворениците следниот ден се правдале дека барале изгубен часовник. Целиот настан го регистрирале безбедносните камери во затворот, а директорот Пандов најави дека снимката ќе ја испрати до медиумите, а тој на прес-конференција во Владата раскажа што се гледа во видеото оти јавноста ќе го добие со послаб квалитет.

„На 20.02 пред затворот Штип доаѓа едно возило. Во самиот затвор има две првични капии и третата која што е за самиот влез во затворот, возилото ја поминува првата капија и доаѓа до втората капија. На таа капија постои дежурана, постои стражарска служба и постои затворски полицаец. Веднаш да напомнам дека тој затворски полицаец не запишува во дневникот кој дошил и кој, кој се појавил и такво појавување на возило и човек кој не е вработен во затворот е забранета работа. Ќе ми дозволите да не ги кажам полните имиња и презимиња, во дежураната е затворски полицаец со иницијали (М.Т.). Следно се гледа дека од возилото излегува лице кое доаѓа до ѕидот на затворот. Веднаш да појаснам, тоа лице преку ѕидот префрла топка. Настанот се случува во 21.40 часот, навечер“, раскажа директорот Пандов.

Понатаму на снимката Пандов објаснува дека се гледа како во дворот се појавуваат двајца затвореници, (Ж.Ж.) и (Р.К.) од кои едниот било јасно видливо дека цело време зборува на телефон и двајцата почнале да бараа нешто во тревникот. Зад нив се појавил и затворски полицаец кој ги предупредил да се вратат оти не им е дозволено да бидат во тој дел од затворот, но за кратко и тој почнал со нив да бара нешто низ дворот. По наредба на командирот на смена (Т.И.) биле повикани уште четворица затворски полицајци со иницијали (З.Г.), (Т.С.), (С.Ј.), и (С.М.). Пандов вели дека на снимката се гледа дека и тие затворски полицајци се вклучиле во потрагата во дрвото, со вклучени батериски ламби а затвореникот (Ж.Ж.) цело време зборува на телефон и никој од нив не го предупредува. Потрагат не била успешна, оти не успеале во дворот да ја најдат топката.

„По наредба на директорот сабајлето повторно се бара она што го барале затвореникот и затворските полицајци во тревникот. Се наоѓа топка во кеса во која се пронајдени 35 грама бела материја во прав, кокаин, и околу 50 грама марихуана. Кога директорот поставува прашања на затворската полиција и на командирот што баравте и зошто баравте, зошто не реагиравте, објаснувањето и во нивната службена белешка е дека затвореникот (Ж.Ж.) си играл со кучката, имаат кучка Цеца таму, дека си играл со кучката Цеца, а имал скап часовник, кој морам да потенцирам дека претходно го нема пријавено, 1000 евра навел дека бил, го нема пријавено кога е донесен во затворот Штип иако мора да го пријави. Кажале дека му го има земено кучката Цеца часовникот, дека трчала низ тревникот и дека му го изгубила, па вработените за да му излезат во пресрет го барат часовникот“, рече директорот Пандов и нагласи дека дрогата истиот ден ја предале во СВР Штип.

По наредба на директорот осум дена подоцна била формирана дисциплинска комисија од петмина членови. Сите ја виделе видеоснимката, но тројца затворски полицајци гласале дека вмешаните колеги немаат вина. Против бил само еден затворски полицаец и госпоѓа која е на ресоцијализација.

„За жал полицајците (Б.Д.), (К.П.)и (З.А.) не пронаоѓаат вина и веруваат во тоа дека затворската полиција го бара часовникот што го изгубил затвореникот (Ж.Ж.) оти кучката Цеца му го однела некаде настрана“, рече директорот Пандов.

Тој посочи дека платите на затворските полицајци вклучени во инцидентот се  од 57.000 денари до 67.000 денари. Управа за извршување санкции направил вонреден инспекциски надзор за овој случај, сите документи ги предала на истражните органи, а денес поднеле и кривични пријави против затворските полицајци.

Директорот Пандов очекува „енергични санкции“ за сите вмешани оти само на тој начин може да се справат со криминалот и корупцијата кои во затворите според него се најголеми оти затвореници и вработените во затворите се вмрежени.

Судот определи 30 дена притвор на директорот на ЈЗУ Специјализирана болница за геријатриска и палијативна медицина во Скопје, Мухсин Арифи, и на уште едно лице кои се осомничени за примање поткуп од 20.000 евра за да сместат болно лице во установата.

„Се прифаќа предлогот на Јавното обвинителство за гонење организиран криминал и корупција и на осомничените М.А. и Б.А. им се определува мерка притвор во траење од 30 дена заради постоење на основите од чл. 165 ст.1 т.1, 2 и 3 односно Опасност од бегство, Влијание врз сведоци и Основано сомнение дека може да го повторат делото. Против овие решенија странките имаат право на жалба пред Кривичниот совет“, соопшти Кривичниот суд.

Првоосомничениот, односнот директор на ЈЗУ Специјализирана болница за геријатриска и палијативна медицина во Скопје, во периодот од 19.3.2025 до 8.4.2025 година, во неколку наврати, директно побарал значителна имотна корист за себе за да изврши службено дејство што би морал да го изврши.

Поткупот го побарал од сведок во постапката – давател на доживотна издршка за лице што боледувало од повеќе состојби и на кое по лекарски препораки и упатување му било потребно болничко згрижување во наведената установа. Кога сведокот се обратил во установата бидејќи состојбата на пациентот се влошувала, била известена дека пациентот е ставен на листа за чекање за прием.

По неколку дена, добила повик од второосомничениот, кој ѝ закажал средба со директорот на установата на 19.3.2025 година во вечерните часови во еден угостителски објект во Скопје.

На средбата првоосомничениот лично кажал дека знае оти пациентот е материјално добро ситуиран за што имал податоци и за недвижниот имот што го поседува, па ветил помош за сместување ако биде награден со 100.000 евра. Жената сведок реагирала дека тоа се многу пари, на што директорот предложил до бараната сума да се дојде преку продажба на недвижниот имот – стан што го поседувал пациентот, што не било опција бидејќи станот бил опфатен со договор за доживотна издршка.

На 3.4.2025 година била реализирана средба меѓу сведокот и помагачот како лице во кое директорот имал целосна доверба, а на 4.4.2025 година повторно сведокот се сретнал со двајцата осомничени. Конечно, било договорено сведокот да даде 20.000 евра како гаранција за да го смести пациентот во болницата, а доколку првоосомничениот со проверки утврди дека пациентот има и дополнителен недвижен имот, тој треба да се продаде за да се обезбеди вкупно побараниот износ од 100.000 евра.

Во согласност со овој договор, на 8.4.2025 година жената сведок се сретнала со второосомничениот, кој влегол во нејзиното возило и во име на директорот директно примил износ од 20.000 евра по што на самото место бил фатен од страна на полициските службеници.

Пратеникот и портпарол на Левицата, Амар Мециновиќ, во контекст на актуелната собраниска процедура за именување нов Програмски совет на МРТ отвори низа прашања поврзани со легитимноста и транспарентноста во работењето на јавниот сервис на прес-конференција пред зградата на Македонската радио-телевизија (МРТ).

Мециновиќ потсети дека МРТ е една од најважните институции во државата, со историска улога во креирањето и зачувувањето на државноста и дека нејзиното работење мора да биде јавно, објективно и законски засновано. Според него, Комисијата за избори и именувања веќе утре во Собранието ќе го разгледува новиот состав на Програмскиот совет, кој потоа ќе оди и на пленарна седница за гласање.

Но, како што посочи, овој процес го отвора прашањето зошто паралелно не се распишува јавен конкурс и за избор на нов генерален директор на МРТ.

Пратеникот истакна дека актуелниот генерален директор првпат е именуван во 2012 година по што е реизбран во 2015 и во 2018 година, но од тогаш, иако законски мандатот е ограничен на три години, нов конкурс не е распишан. Тој го нарече ова директор со три мандати плус еден гратис и нагласи дека ваквата состојба е спротивна на духот на законот. Според Мециновиќ, уште од 2021 година постојат најави дека Програмскиот совет ќе распише нов конкурс за генерален директор, но тоа никогаш не се случило.

Истовремено, рече тој, Програмскиот совет сега презема иницијатива за избор на нов надзорен одбор со образложение дека му истекол мандатот, но не ја објаснува причината зошто не постапува и за позицијата директор. Според Мециновиќ, дури и самите записници од седниците на Советот потврдуваат дека тие не се сигурни во своите надлежности и бараат автентично толкување од Собранието, но такво барање досега не е добиено во Собранието. Во март годинава, рече Мециновиќ, без дополнителни објаснувања, Советот одлучува да распише конкурс за надзорен одбор во консултација со актуелниот директор, што дополнително ја прави ситуацијата спорна.

Левицата смета дека оваа состојба отвора сомнежи за можно политичко и лично влијание во управувањето со јавниот сервис, при што се користат правни сиви зони за одржување статус кво.

Претставникот на Левицата најави дека ова е само прва во серијата прес-конференции на кои ќе бидат изнесени дополнителни информации за работењето на МРТ, потенцијални злоупотреби и кршење на работничките права во оваа институција. Тој ги повика сите што располагаат со информации за работењето на јавниот сервис слободно да ги споделат со Левицата како парламентарна партија.

„Вистината сите ја знаеме – прашањето е дали ќе одлучиме да бидеме слепи за неа“, заклучи Мециновиќ потенцирајќи дека МРТ мора да се заштити од политичко и од приватно влијание и да се врати на вистинскиот пат – да биде сервис во интерес на јавноста.