Денес на плоштадот Македонија беше поставена Божикна пештера.

Се работи за уметничко дело кое ги обединува традицијата, верата и уметноста. Пештерата, претставува автентична подготовка за празникот на Христовото раѓање е изработена по идеја на Ангел Мицевски, додека реализацијата е дело на познатиот вајар, г. Зоран Тошески.

Помагатели на овој проект кој е вовед во манифестацијата ”Божикни поворки” се градоначалникот на Општина Кисела Вода Орце Ѓорѓиевски и Претседателот на Владата Христијан Мицкоски.

„Слава Му на Бога! Огромна е мојата чест што заедно со нашиот премиер Христијан Мицкоски, сме помагатели на овогодинешните Бадникови поворки и на најубавата и најимпозантна Божикна пештера во регионот! Од оваа вечер, сите посетители кои во текот на целиот месец ќе поминуваат на плоштадот Македонија, ќе имаат можност да уживаат во прекрасната глетка, но и да застанат, да се задлабочат и да размислуваат за тој Божиќен настан кој ја промени историјата на човештвото. Нека се среќни и бериќетни претстојните празници и нека мирот Христов, биде постојано во вашето срце“-изјави градоначалникот Орце Ѓорѓиевски.

Екстремни нивоа на загаденост на воздухот вечерва се измерени во повеќе македонски градови. Според податоците од мерните станици на Министерството за животна средина, најкритична е состојбата во Кавадарци, каде се измерени над 500 микрограми ПМ10-честички на метар кубен, што е осумпати повисоко од дозволеното и спаѓа во загаденост која претставува директна опасност по здравјето. Концентрацијата на ПМ2.5 честички во Кавадарци вечерва е 12 и пол пати повисока од дозволената (313 микрограми на метар кубен).

Алармантна загаденост вечерва е измерена и во Охрид (205 микрограми ПМ10-честички на метар кубен), Струмица (220 микрограми), Скопје-Ново Лисиче (218), Скопје-Ректорат (192).

Со почетокот на грејната сезона, загаденоста на воздухот очигледно е зголемена, особено во градот Скопје, кој е меѓу градовите со најголемо загадување во светот.

Првиот вицепремиер и министер за животна средина и просторно планирање г. Изет Меџити денеска учествуваше на конференцијата за чист воздух организирана од Светска банка во рамки на Регионалната програма за техничка поддршка за квалитетот на воздухот, каде што беше презентиран ‘Институционалниот и функционалниот преглед за управувањето со квалитетот на воздухот во Северна Македонија’.

Меџити, во присуство на менаџерот на Светска банка за Северна Македонија и Косово, Масимилијано Паолучи, изрази благодарност за тимот експерти кои го идентификуваа подобрувањето на квалитетот на воздухот како стратешка цел во Рамката за партнерство на Светска банка со Северна Македонија за периодот 2024 година. – 2030 година.

Во својот говор, Меџити рече дека се идентификувани изворите и причините за сериозни проблеми со квалитетот на воздухот, иако тие може да варираат во и меѓу градовите.

“Со оглед на тоа што најголемиот дел од домаќинствата во земјава сè уште користат дрво како примарен извор на греење, тоа предизвикува сериозни проблеми со квалитетот на воздухот во зимскиот период, особено во густо населените станбени места. Сообраќајот на патиштата е извор на загадување на воздухот во урбаните средини, додека производството на енергија и индустријата имаат локално влијание врз квалитетот на воздухот, особено во близина на индустриски инсталации кои немаат современи системи за намалување на емисиите”, рече Меџити.

Нашата земја, додаде министерот Меџити, презема активности за подобрување на квалитетот на воздухот преку спроведување на краткорочни превентивни мерки кои веќе стапија на сила во оваа грејна сезона на национално ниво, како и од други надлежни институции, што покажува дека се трудиме да целосно одговараме на оваа обврска за подобрување на квалитетот на воздухот во нашата секојдневна работа.

Првиот вицепремиер и министер за животна средина Изет Меџити рече дека борбата против аерозагадувањето ќе се води преку „Планската програма за чист воздух 2024-2030“, стратешки документ во кој се идентификувани главните причини и мерките што мора да се преземат на среднорочни и долгорочни периоди за подобрување на ситуацијата.