Во следните две години ќе се снимаат игран филм, документарец и ТВ-серија во неколку продолженија, кои ќе ги прослават животот, делото и мисијата на трагично починатата музичка легенда Тоше Проески.

Средствата за проектот, во износ од речиси 95 милиони денари, ќе бидат обезбедени од буџетот на земјата, преку Министерството за дигитална трансформација.

Министерот за култура Зоран Љутков објави дека носител на проектот е Македонската радио-телевизија, а семејството на Проески дало согласност за иницијативата.

Копродукциски ќе бидат вклучени неколку национални телевизии од Балканот.

На темата зборуваше и министерот за дигитална трансформација, Стефан Андоновски.

„Идејата потекна од МРТ и копродукции од Македонија и Балканот, но, секако, инспирацијата, иницијативата, главно ја предводеше претседателот на Владата, Христијан Мицкоски, и во координација со Министерството за култура и со Министерството за финансии во експресно брза постапка се обезбедија средства“, рече Андоновски.

Проески во текот на кариерата стекна регионална слава и стана музичка икона, која успеа да го сплоти Балканот.

Загина на 16 октомври 2007 во сообраќајна несреќа во Хрватска на 26 години.

Концептот на дуално образование го создава потребниот, добро подготвен кадар за потребите на стопанството и со тоа го намалува јазот помеѓу понудата и побарувачката на пазарот на човечки капитал. Заедно со нашите партнери, овој концепт на образование ќе продолжиме да го спроведуваме и надградуваме, во рамки на проектот „Образование за вработување“ кој пак, овозможи обединување на енергијата и заедничко креирање ефективни образовни политики.

Ова го истакна министерката за образование и наука Весна Јаневска при денешната посета на компанијата „Ронтис“ во Велес, каде заедно со швајцарската амбасадорка Вероник Улман, извршниот директор на Стопанската комора, Антони Пешев и со проектниот тим лидер, Курт Вутрих извршија увид во спроведувањето на практичната настава директно на работно место за учениците од Регионалниот центар за стручно образование и обука „Коле Неделковски“.

„Има многу компании кои се вклучени во дуалното образование и следат високи стандард за едукација и грижа кон учениците, односно над 550 во оваа учебна година. Организираат практична настава за речиси 4000 ученици од дуалните паралелки во 62 средни стручни училишта“, рече Јаневска, додавајќи дека ова се добри бројки, до кои е дојдено со многу труд на Министерството за образование и наука и голема поддршка од швајцарската амбасада, Делегацијата на ЕУ, бизнис заедницата, граѓанскиот сектор и самите училишта.

Министерката изрази очекувања дека соработката помеѓу сите кои досега се грижеа за унапредување и промоција на средното стручно образование ќе продолжи, не само преку проектот „Образование за вработување“, туку и воопшто низ сите канали кои даваат ефект, додавајќи дека очекува наскоро да се донесе и новиот Закон за стручно образование и обука, кој е во собраниска процедура и со кој всушност системски ќе се уреди концептот на дуално образование.

„Како министерка преземам и конкретна иницијатива за оваа соработка да продолжи, па така веќе министерството испрати допис до општините и средните стручни училишта кои во координација со компаниите треба да достават информации за реалните потреби од одреден кадар, за да можеме соодветно да ги планираме и квотите за упис на ученици во средно образование во конкурсот за следната учебна година“, додаде Јаневска.

Општина Кисела Вода предновогодишно започнува со исплата на субвенции за граѓаните кои аплицираа и ги исполнија критериумите од јавните повици кои беа објавени во изминатиот период. Исплатата, која започнува од понеделник, опфаќа средства за поддршка на граѓаните кои поднеле барања за субвенции за пелети, печки на пелети и огревно дрво. Целта е да се помогне на семејствата кои се соочуваат со финансиски предизвици за одржување на животниот стандард.

-И оваа година продолжуваме со континуираната поддршка за нашите граѓани, бидејќи ја препознаваме важноста на социјалната поддршка, особено за ранливите категории граѓани, и продолжуваме да вложуваме во мерки кои ја олеснуваат нивната секојдневна борба со финансиските предизвици. Овие субвенции, кои се во вкупен износ од околу 4 милиони денари, се наш придонес за подобрување на животниот стандард на граѓаните. Сакам да им се заблагодарам на сите кои аплицираа и сакам да ги информирам дека исплатата ќе започне од понеделник. Продолжуваме да бидеме партнер на нашите жители и заедно со нив секојдневно да го унапредуваме квалитетот на живот во локалната заедница-изјави градоначалникот Орце Ѓорѓиевски.

За субвенционирање и поддршка за кофинансирање за набавка на пелети за домаќинствата на територија на општина Кисела Вода, до комисијата за утврдување на исполнување на условите за доделување на финансиски средства, пристигнати се вкупно 301 Барања, одобрени се 297, додека 4 се одбиени поради некомплетна документација. Финансискиот надомест е во висина од 50%, но не повеќе од 10.000 денари.

За субвенционирање и поддршка за кофинансирање за набавка на печки на пелети за домаќинствата на територија на Општина Кисела Вода, пристигнати се вкупно 22 Барања, 20 се одобрени, додека 2 се одбиени поради некомплетна документација.

За купување на дрва за огрев за 2024 година на жителите на општина Кисела Вода, пристигнати се 278 барања, а одобрени се 249 барања со комплетна документација.