Фудбалерите на Милан славеа како гости во Верона со минимален резултат (1:0), во првиот натпревар од 17. коло на Серија А.

Победничкиот гол го постигна Тијани Рејндерс во 56. минута од натпреварот.

Холанѓанецот го искористи одличното додавање на Јусуф Фофана, а потоа ја затресе мрежата на Лоренцо Монтипо.

Голем проблем за „Росонерите“ е повредата на Рафаел Леао, кој се повреди по 30 минути игра.

Милан беше поконкретен во остатокот од натпреварот и на крајот стигна до победа, по киксот во претходното коло против Џенова.

Милан е седми на табелата со 26 бодови, додека Верона е 17-та, прва над зоната за испаѓање, со 15 бодови.

Баерн Минхен убедливо го победи Лајпциг со 5:1 во првиот натпревар од 15.коло во Бундес лигата.

Баварците на своите навивачи, за крај на годината им приредија вистински спектакл. Со „петарда“ го испратија Лајпциг.

Тимот на Венсант Компани е лидер во шампионатот со 33 бода, шест повеќе од „биковите“ кои се на четвртото место.

Почетокот на натпреварот беше невообичаен, бидејќи во воведните две минути беа постигнати два гола, по еден на секоја страна.

Најпрво Мусиала му донесе водство на Баерн, но Шешко набрзо го врати резултатот на почеток.

До полувремето беше јасно во кој правец се движи овој натпревар, по головите на Лајмер во 25. минута и Кимих во 36. минута.

Баерн не застана тука, и чекаше до 75. минута за уште еден гол, кога стрелец беше Сане, а три минути подцна Дејвис го постави конечниот резултат.

За многумина беше изненадување што Клаудио Раниери се повлече од фудбалот во средината на ноември и по трет пат во кариерата ја презеде Рома, но со оглед на тоа што веќе е во осмата деценија од животот, јасно е дека неговиот престој на „Олимпик„ нема да трае вечно.

Затоа тој веќе има план кој би можел да го наследи следното лето, а прва мета без сомнение е неговиот сонародник Карло Анчелоти, кој според се, на крајот од сезоната ќе го заврши вториот мандат во кралскиот клуб.

Се почесто се шпекулира дека трофејниот Италијанец е при крај на „Сантијаго Бернабеу“, бидејќи името на Чави Алонсо се повеќе се сфаќа како наследник на Карло.

Во таков расплет на ситуацијата, логично би било враќањето на Анчелоти во Италија, а не треба однапред да се отфрли неговото доаѓање во клубот за кој настапуваше осум сезони.

Сето ова има смисла ако се знае дека Раниери и по завршувањето на сезоната ќе остане во Рома.

Главна пречка треба да биде Фудбалскиот сојуз на Бразил, кој долго време го сака Анчелоти за тренер на петкратниот светски шампион, па јасно е дека Рома има предизвик да го убеди Италијанецот да се врати во татковината по пет и пол години.