Утрово најниска температура во земјава од -11 степени Целзиусови е измерена на Попова Шапка, соопшти УХМР.

Следат Берово со -7 степени, -6 Крива Паланка, Штип, Демир Капија, -5 Кавадарци, Маврови Анови, -4 Скопје-Зајчев Рид, Битола, Крушево, -3 Струмица, Тетово, Прилеп, Виница, -3 Велес, -1 Претор, 2 Охрид и 3 степени во Гевгелија.

Висината на снежната покривка измерена во 7 часот изнесува 52 см на Попова Шапка и 44 см во Маврови Анови.

Утрото е студено, а преку денот сончево со мала до умерена локална облачност. Ќе дува слаб до умерен ветер од јужен правец. Максималната температура ќе достигне од 5 до 12 степени.

Во Скопје утрото студено, преку денот сончево и претежно тивко со мала до умерена облачност. Максималната температура ќе достигне до 6 степени.

Намалена видливост поради појава на магла од 80 – 100 м. има на планинскиот превој Ѓавато и до 50 м. на планинскиот превој Буково, соопшти АМСМ.

Сообраќајот во близина на Башино Село, кај мостот, од 03 јануари е во целосен прекин и истиот ќе биде во прекин подолг временски период.

Сообраќајот на останатите државни патишта се одвива во зимски услови, по наместа влажни коловози. Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.

АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони.

Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.

Православните христијански верници во Македонија утре го слават Бадник, ден пред големиот празник Рождество Христово – Божик. Овој празник ја носи радоста на Христовото раѓање и се одбележува со традиционални обичаи кои се почитуваат со особена почит и внимание.

Одбележувањето на Бадник во Скопје ќе започне пред Соборниот храм „Свети Климент Охридски“ и ќе биде организирано од Здружението на граѓани „Одбор за традиционална прослава на Бадник“. Кум на оваа годинашна прослава е Радомир Макеларски, кој ќе го понесе ќупот за Бадник 2025, а здравичар е Атанас Петров, кој на платото пред Соборниот храм ќе ја изрече традиционалната здравица во пресрет на Божик.

Во текот на денот, свештениците од Соборниот храм ќе ги осветат нафората и чајот, како и бадникарските гранчиња, кои ќе им се делат бесплатно на присутните. Овие гранчиња, кои годинашните кумови и здравичарот традиционално ги набраа на падините на Водно, се симбол на среќата и здравјето на семејството. Со мотото „Пренеси ја Божикната радост до секое срце!“, децата на Бадник ќе организираат поворки во Скопје и други градови низ земјата, пејќи ја песната „Вечниот Бог“.

Еден од најзначајните настани во Скопје ќе биде формирањето на најдолгата бадникова поворка, која ќе тргне пред Музејот на Град Скопје и ќе се движи низ улицата „Македонија“. Поворката ќе заврши на Плоштадот во Скопје, каде што ќе се одржи голем Божикен концерт и креативни работилници за децата, на кои секое дете ќе може да изработи своја ѕвезда, што ќе ја зачува за следната година. За сите деца ќе бидат подготвени повеќе од 3.500 коледарски пакетчиња.

На Плоштадот во Скопје ќе биде поставена и пештера на Христовото раѓање, која ќе биде создадена од врвни уметници и волонтери, кои ќе ја претстават приказната за Христовото раѓање на најубав начин.

Во текот на Бадниковата вечер, која ќе биде споделена со најблиските, семејствата го почитуваат обичајот на заедничка вечера. Трпезата е богата со посни јадења, а домаќинот ја благословува пред да почне вечерата.

Обичајот бара дел од храна да се остави за Бога и куќата. За здравје на семејството, во огнот се става бадниково гранче, што се смета за најздраво дрво. Гранчињата се украсуваат во домовите, како симбол на среќата, љубовта и светлината, кои треба да ја исполнат нивната празнична атмосфера.

Овие обичаи го носат духот на Божик и ја потврдуваат радоста и заедништвото кои се основа на празнувањето на Христовото раѓање.