Турскиот претседател Реџеп Таип Ердоган изјави дека оваа недела би можел да оствари телефонски разговори со рускиот претседател Владимир Путин и со американскиот претседател Доналд Трамп, со цел да ја испита можноста за организирање лидерска средба во Истанбул, на која би се разговарало за конфликтот во Украина.

„Со телефонски разговори со Путин и Трамп оваа недела ќе видиме дали можеме да ги собереме во Истанбул, тоа ни е целта“, изјави Ердоган за новинарите, откако руските и украинските делегации се сретнаа во Истанбул.

Третата рунда разговори меѓу Москва и Киев во Истанбул се одржа во средата и траеше околу 40 минути.

Првата рунда преговори, одржана на 16 мај, заврши со договор за размена на заробеници по формулата „1.000 за 1.000“, како и со договор обете страни да подготват меморандуми за надминување на кризата, потсетува „РТ Балкан“.

По втората средба, на 2 јуни, страните размениле нацрти на меморандуми за мирно решение, како и договор за размена на тешко ранети воени заробеници и тела на загинати.

Москва на Киев му предала и неколку илјади тела на загинати.

Двајца тинејџери се осудени на најмалку 15 години затвор за бруталното убиство на 14-годишниот Келијан Бокаса, кој беше избоден дури 27 пати со мачети во автобус во Лондон. Еден од напаѓачите, денес 16-годишен, се смеел додека му се изрекувала пресудата, пренесува „Скај њуз“. Убиството се случило на 7 јануари во Вулич, југоисточен Лондон. Убиците се идентификувани како Мосавар Зази (16) и Колин Чабиква (15).

Судијата Марк Лукрафт ги осуди двајцата на доживотен затвор, со можност за условен отпуст дури по 15 години и 110 дена. Тој истакна дека камерите за надзор забележале дека напаѓачите се смееле за време на нападот. Смртта на Келијан ја нарече „бесмислена загуба на уште еден млад живот“.

Мари Бокаса, мајката на убиениот Келијан, изјави дека убијците го уништиле нејзиниот цел свет. Себеси се опиша како „скршена душа на која ѝ се смени животот засекогаш оној ден кога животот на детето ѝ го одзеде друго дете“.

„Се прашувам што се случило со тие две деца што довело до толку страшен чин на насилство. Не можам да си замислам како некој може да биде толку гневен. Тоа што го направија е ужасно, и можеби никогаш нема да дознаам што ги натера на тоа“, рече таа. „Тој момент на насилство можеби траеше неколку секунди, но последиците се вечни.“

Келијан на денот на убиството се наоѓал на горниот кат од автобусот околу 14:30 часот, кога му се приближиле обвинетите со оружје. Обвинителот Том Литл изјави дека е јасно дека нападот не бил спонтан, туку планиран, и дека обвинетите знаеле дека Келијан се наоѓа во автобусот.

„Му се приближија и речиси веднаш двајцата извадија мачети и го нападнаа,“ рече судијата на рочиштето. „Избоден е вкупно 27 пати пред да излезат од автобусот.“ Итните служби пристигнале брзо, но Келијан починал кратко по пристигнувањето на лекарите.

Обвинетите ја признаа вината за убиство и за поседување оружје. Една од мачетите била фрлена во реката Темза, но полицијата подоцна ја пронашла.

Главната инспекторка Сара Ли упати сочувство до семејството на жртвата, откако обвинетите ја признаа вината.

„Бруталниот и бесмислен напад врз Келијан остави длабоки последици врз неговите пријатели, пошироката заедница и сите што неуморно работеа на идентификување, апсење и процесуирање на виновниците. Се надевам дека семејството на Келијан ќе најде некаква утеха во оваа пресуда, но знам дека остануваат длабоко нажалени – бидејќи изгубени се три млади животи“, изјави таа.

Франција, Германија и Велика Британија преку заедничко соопштение порачаа дека хуманитарната катастрофа во Газа мора веднаш да запре.

„Хуманитарната катастрофа на која сведочиме во Газа мора веднаш да престане“, се наведува во соопштението со кое Париз, Берлин и Лондон реагираат на предупредувањата од Обединетите нации и невладините организации за гладта во палестинската енклава. Трите европски престолнини апелираа до израелската влада веднаш да ги укине ограничувањата за испорака на хуманитарна помош.

„Дојде моментот да се запре војната во Газа“, се вели во соопштението, со кое се повикуваат двете страни на итно примирје.

Трите европски земји повторно го упатија својот повик за ослободување на израелските заложници и разоружување на Хамас, притоа силно спротивставувајќи се на секој обид за наметнување израелски суверенитет над окупираните палестински територии.

„Заканите за анексија, населување и насилството од доселеници врз Палестинците ги поткопуваат шансите за постигнување договор за решение со две држави“, предупредија.

Британскиот премиер Киер Стармер вчера најави итен состанок за ситуацијата во Газа со францускиот претседател Емануел Макрон и германскиот канцелар Фридрих Мерц. Во заедничката изјава не се прецизира дали таа е објавена пред или по состанокот, пренесе агенцијата Франс Прес.