Телеметриската сеизмолошка мрежа на Република Северна Македонија, на сеизмолошките станици инсталирани ширум нашата територија, одржувани од Сеизмолошката опсерваторија при Природно-математичкиот факултет во Скопје, вечерва 6 јануари 2025 година во 18 часот и 44 минути регистрираше земјотрес чиј епицентар се наоѓа 25 километри северозападно од Скопје, со Рихтерова локална магнитуда ML2.5.

Според досегашните податоци со кои располага опсерваторијата, земјотресот е почувствуван во градот Скопје и северозападните делови на Републиката со интензитет од III степени според Европската макросеизмичка скала.

Секторот за внатрешни работи Тетово ја известува јавноста дека сообраќајот во Маврово е нормализиран и се одвива без проблеми. Согласно годишниот план за постапување во зимски услови, на подрачјето на Маврово е воведен кружен тек на движење на возилата за да се обезбеди безбедно и непречено одвивање на сообраќајот. Но, поради непочитување на правилата и препораките, во текот на вчерашниот ден настанаа проблеми во одвивањето на сообраќајот.

За да се надминат проблемите и да се обезбеди безбедно и непречено одвивање на сообраќајот во Маврово, ОВР Гостивар дополнително ангажираше дваесетина полициски службеници од другите полициски одделенија за да со физичко регулирање на сообраќајот се надминат проблемите, што беше и направено.

СВР Тетово апелира до граѓаните, да ги почитуваат сите правила и прописи во сообраќајот, да не ги паркираат нивните возила на коловоз, да ги почитуваат наредбите од полициските службеници во врска со поставениот сообраќаен режим и да се движат согласно предвидените правила, да не тргнуваат во правец на Маврово и Попова Шапка со летни гуми и без соодветна зимска опрема, затоа што на тој начин го попречуваат нормалното одвивање на сообраќајот. Апелираме до возачите да придонесеме сите заедно за безбедно и непречено одвивање на сообраќајот, велат од СВР Тетово.

Коалицијата ВЛЕН упатува искрени честитки до сите верници од православна вероисповед по повод Бадник и Божиќните празници. Овие денови се симбол на заедништво, љубов и човечност – вредности кои ни се потребни повеќе од кога било, велат од ВЛЕН.

„Нека празничниот дух донесе радост, мир и благосостојба во секој дом, градејќи мостови на солидарност и разбирање меѓу сите заедници.

Овие празници се потсетник дека нашата земја е најсилна кога сите заедници живеат во хармонија и се поддржуваат едни со други.

ВЛЕН ќе продолжи да се залага за праведно и еднакво општество, во кое почитта кон различностите е нашата најголема сила“, се додава во соопштението на ВЛЕН.