Македонија
Лимани во посета на Гостивар: Соработката со општините е клучна, ги прошируваме капацитетите на градинките и обезбедуваме нови вработувања

Министерот за социјална политика демографија и млади, Фатмир Лимани денеска беше во посета на неколку институции од социјална и детска заштита во Општина Гостивар.
Заедно со градоначалникот на Општина Гостивар, Валбон Лимани го посетија Центарот за аутизам „Blue puzzle“, со цел донација на хуманитарни пакети од граѓанската организација АДРА.
Приказната за основањето и грижата за децата со аутизам на „Blue puzzle” е восхитувачка и никого не остава рамнодушен. Група родители соочени со предизвикот со аутизам дијагностициран кај нивните деца започнуваат една навистина предизвикувачка мисија да создадат ваков центар со највисоки стандарди за третман и терапија на деца со аутизам.
Министерот Лимани уште еднаш ја потврди целосната поддршка од Министерството за социјална политика, демографија и млади.
До денес во системот на социјалната заштита имаме околу 133 лиценцирани даватели на социјални услуги, кои овозможуваат на корисниците да водат независен живот и можност да се вклучат во општеството на еднаква основа.
Донација од хуманитарни пакети од организацијата АДРА, беа донирани и во Дневниот центар за лица со телесна и интелектуална попреченост во Гостивар, каде што на дневна основа услугата ја користат 10 деца.
Проактивноста на општините е од големо значење за подобрување на квалитетот на живот на граѓаните. Општина Гостивар аплицираше и доби грант за проширување на капацитетите на детски градинки, односно адаптирање на просториите во други просторни услови, што го овозможува Министерството за социјална политика, демографија и млади во соработка со Светска банка. Конкретно, две училници во основното училиште „Браќа Гиновски“ ќе бидат адаптирани за групи на деца од предучилишна возраст, со капацитет од вкупно 60 деца.
Во моментов, Oпштина Гостивар аплицира за изградба на нов објект во рамките на детската градина „Детска радост“. Во тек е обезбедување на потребната документација и исполнување на сите правни услови за овој проект да ја добие финансиската поддршка од Министерството.
Министерот Лимани искажа особено задоволство што можеше да соопшти дека ЈУ Детска Радост, Гостивар, објект Цветови доби согласност за 10 нови вработувања. Се разговараше и за измените на Законот за детска заштита, со кој се откочува процесот на лиценцирање и се овозможува покрај македонскиот јазик и неговото кирилско писмо тие да се добиваат и на албански, понатаму и испитот ќе се полага и на албански јазик, односно на јазикот на кој зборуваат 20% од граѓаните во Северна Македонија. Затоа што сите граѓани се подеднакво важни!
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Треба да се истражи како минатите арбитражни постапки се губеле и се одлевале огромни суми од државниот буџет

Ова е втора арбитража што оваа Влада ја добива и очекуваме барем уште две во периодот што следува, вели претседателот на Владата на Република Северна Македонија, Христијан Мицкоски, одговарајќи на новинарско прашање што подразбира одлуката за „Казандол“.
Премиерот Мицкоски посочи дека треба да се истражи како минатите арбитражни постапки се губеле и се одлевале огромни суми од државниот буџет, а сега тие се добиваат.
„Вистинското прашање е како во минатото беше пракса да се губат арбитражите и како сега наеднаш тие се добиваат во полза на државата. Треба тоа да се истражи, да видиме зошто она се случувало во минатото, ние да направивме одредени промени во адвокатскиот тим, но некако симптоматично е како во минатото се губеа сите арбитражи, а сега ги добиваме“, рече тој.
Во однос на шпекулациите, Мицкоски истакна дека не е точно оти по арбитражната постапка, повторно ќе се отвори рудникот „Казандол“.
„Причина за да се случи оваа арбитража е раскинатата концесија од страна на Владата за формирање на рудникот ‘Казандол’. Сопствениците на инвестицијата почувствувале дека имаат изгубен профит, имаат штета и повеле арбитража против државата во вредност од 115 милиони евра, односно имале отштетно побарување од 115 милиони евра. И го изгубија. И тоа значи дека тие веќе немаат концесија. Така што не е вистина дека со ова што компанијата изгубила, сега веќе ќе има отворање на рудникот. Тоа е повторно конструкција и обид за манипулација од одредени кругови што не ѝ мислат добро на Македонија и на граѓаните“, рече Мицкоски.
Македонија
Алиу: Лекарите по семејна медицина имаат суштинско значење во системот

Министерот за здравство Азир Алиу денеска одржа работна средба со претседателот на Здружението на лекарите по семејна медицина (ЗЛОМ), д-р Драган Ѓоргиевски, и со претставници од Здружението, на која се разговараше за повеќе актуелни теми, со фокус на унапредување на електронското здравство и можностите за укинување на хартиениот картон.
„Лекарите по семејна медицина имаат суштинско значење за превенција, рано откривање на болестите и континуирано следење на здравјето на пациентите. На денешната средба разговаравме за разните начини за стимулирање на семејните лекари за отворање нови ординации, како и за континуирана здравствена заштита во помалите населени места. Во таа насока интензивно работиме на промени на 12 закони, меѓу кои и дигитализација и надградба на националниот систем ‘Мој термин’, со цел унапредување на здравствениот систем и оптимизација на здравството во Македонија“, истакна министерот Алиу.
Македонија
За да нема одење на партиски митинзи со службени возила, Владата апелира сите институции што не го почитуваа рокот 18 август да поднесат пријави

Непослушните државни институции, кои до 18 август не ги пријавија службените возила, денес од Владата добија уште еден апел да го сторат тоа. Државната комисија за спречување корупција се пожали дека иако институциите располагаат со 6.500 возила, во дадениот рок се пријавени помалку од една третина од возилата, односно само 1.916 службени возила со кои располагаат.
„Јас ја видов оваа вест од Државната комисија за спречување корупција и еве како портпарол на Владата апелирам до сите институции да го поднесат бројот на службените возила. Веќе е донесена и одлука на седница на Владата дека рокот за поставување на регистарските таблички во боја е до 15 септември. И тоа ќе го завршиме сè во насока на тоа да нема повеќе злоупотреби на службени возила за цели што се надвор од службените“, рече портпаролката на Владата, Марија Митева.
Сите институции што користат државни службени возила имаа рок до 18 август да со пријават колку возила располагаат, од која марка, која година на производство се и да го пријават регистарскиот број на секое возило.
Државната комисија за спречување корупција во рок од 15 дена по истекот на рокот за пријавување на службените возила може да поднесе прекршочна пријават против непослушните институции.
Од институциите беше побарано да ги пријават служените возила за да се спречат злоупотреби во пресрет на локалните избори откога вицепремиерите Изет Меџити и Арбен Фетаи беа фотографирани како околу полноќ ги паркираат службените возила пред деловно-трговскиот центар „Мавровка“. Тие јавно не дадоа објаснување на каков состанок биле иако и премиерот Христијан Мицкоски рече дека лично ќе ги праша дали користеле службени возила за приватни или за партиски цели. Возилата на вицепремиерите беа паркирани во близина на партиски штаб на „Вреди“ од кај што доаѓаат и двајцата.
За полесно да може граѓаните да пријават злоупотреби, до 15 септември сите службени возила треба да добијат таблички во боја.