Свет
Британско-американски стрип автор и романсиер обвинет за сексуален напад на дадилка

Британско-американскиот автор Нил Гејман и неговата сопруга се тужени од жена од Нов Зеланд која бара милиони долари за наводна сексуална злоупотреба и трговија со луѓе додека работела кај нив како дадилка, се вели во три тужби поднесени вчера.
Скарлет Павлович рече дека Гејман повеќепати ја силувал додека работела за него и Аманда Палмер во 2022 година, предизвикувајќи физичка, ментална и емоционална штета.
Според судските документи, Палмер е обвинета дека знаела дека Павлович е ранлива и дека не ја предупредила за предаторското однесување на Гејман.
Гејман негираше по медиумските извештаи за наводите.
„Никогаш не сум се впуштил во неконсензуална сексуална активност со никого. Никогаш“, напиша тој.
Во тужбите се бара неодредена отштета, за која силно се верува дека надминува 1 милион долари.
По бездомништвото во новозеландскиот град Окленд, Павлович се согласила да биде дадилка на детето на еден пар во потрага по пари и сместување.
Наскоро, Гејман почнал сексуално да ја злоставува, што вклучувало силување, давење и напад во присуство на дете, според судските документи.
Злоставувањето наводно продолжило неколку недели, додека Гејман и неговото дете не заминале во Европа.
Павлович тврди дека Палмер и кажала дека повеќе од десетина жени, вклучително и неколку поранешни вработени, и се пожалиле за насилни сексуални односи со Гејман.
Обвинувањата за недолично однесување против Гејман почнаа да се појавуваат минатата година, а Dark Horse Comics минатиот месец објави дека повеќе нема да ги објавува неговите дела.
Стриповите и романите на Гејман ги вклучуваат Coraline, The Graveyard Book, Good Omens и How to Talk to Girls at Partys.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Путин денеска изјави дека преговорите со САД во Алјаска биле „многу искрени и содржајни“

Рускиот претседател Владимир Путин денеска изјави дека преговорите со САД во Алјаска биле „многу искрени и содржајни“ и ги приближиле двете страни до донесување на неопходните одлуки.
– Разговорот беше многу отворен и по мое мислење нѐ доближува до потребните решенија, рече Путин на состанок во Кремљ посветен на резултатите од преговорите во Анкориџ.
Тој додаде дека долго време не биле водени преговори од ваков вид на толку високо ниво и дека имал можност „смирено и детално“ да ја изложи руската позиција. Според него, се дискутирало за сите аспекти на билатералната соработка, но главниот акцент бил ставен на можностите за праведно решавање на украинската криза.
На состанокот во Кремљ присуствуваа премиерот Михаил Мишустин, претседателот на Државната дума Вјачеслав Володин, раководителот на претседателската администрација Антон Вајно, како и секретарот и заменик-претседателот на Советот за безбедност Дмитриј Медведев и Сергеј Шојгу. Присуствуваа и вицепремиери, министри, како и гувернерката на Централната банка, претставници на ФСБ, Генералштабот и Рускиот фонд за директни инвестиции.
Путин најави дека детално ќе ги информира учесниците за разговорите со американскиот претседател Доналд Трамп. Состанокот во Кремљ продолжи зад затворени врати.
Регион
Црна Гора се бори со пожари

Седми ден по ред пожарите во Црна Гора не стивнуваат, а најкритично е во Подгорица, каде што и покрај тоа што ситуацијата е под контрола.
Началникот на Дирекцијата за цивилна заштита и намалување на ризици од катастрофи, Љубан Тмушиќ, соопшти дека најзагрозени области се Пипери и Кучки Корита. – Во овие подрачја се ангажирани сите расположливи ресурси – 12 возила и 42 пожарникари, рече Тмушиќ.
Посебна закана претставуваат и таканаречените „подземни пожари“ кои се активираат со пораст на температурите.
Во гаснењето се вклучени и армијата, како и помош од странство – Србија испрати хеликоптер, а вчера пристигна и швајцарски тим со 26 пожарникари и четири специјализирани возила. Поддршка дава и хеликоптер од Чешка.
Свет
(Видео) Четворица маскирани напаѓачи ограбија златарница во западниот дел на Сиетл

Четворица маскирани напаѓачи ограбија златарница во западниот дел на Сиетл и за помалку од две минути украдоа накит и луксузни предмети во вредност од околу два милиона долари, соопшти полицијата.
Настанот се случил во четвртокот попладне, а надзорните камери снимија како осомничените со чекани ги разбиваат заклучените стаклени врати и за 90 секунди празнат шест витрини. Меѓу украдените предмети се наоѓаат и „Ролекс“ часовници со проценета вредност од 750.000 долари и смарагдна огрлица вредна 125.000 долари, објави Еј-Би-Си њуз.
За време на грабежот, еден од напаѓачите им се заканувал на вработените со спреј против мечки и електрошокер, но никој не бил повреден.
„Длабоко сме потресени како вработени. Продавницата ќе биде затворена извесно време“, изјави потпретседателот на семејната златарница Џош Минаше.
Полицијата пристигнала веднаш по дојавата, но сторителите веќе избегале со возило и засега се недостапни за законот.