Македонија
Ѓорѓиевски од средбата со Димитриеска-Кочоска: Преку партнерски однос со централната до силна локална власт

Претседателот на ЗЕЛС Орце Ѓорѓиевски денес оствари работна средба со министерката за финансии Гордана Димитриеска Кочоска, во рамките на 24-та седница на Управниот одбор на ЗЕЛС.
Целта на овој состанок произлегува од Меморандумот за разбирање, кој ЗЕЛС и Владата го потпишаа во август минатата година, а согласно кој вакви средби треба да се одржуваат редовно.
На средбата се разговараше за финансиската стабилност на општините, потребата од зголемување на блок и наменските дотации, како и можноста за поголемо учество на локалната самоуправа во приходите од даноци.
-Она што е заложба на општините, членки на ЗЕЛС, е да се обезбеди поголема финансиска стабилност, да се зголемат блок и наменските дотации и да се овозможи сите надлежности да се вршат со доволно средства, односно онолку колку што ресорните министерства трошеле за истата надлежност кога била во нивни раце. Тоа е согласно Европската повелба за локална самоуправа и ние инсистираме на нејзино почитување-истакна Ѓорѓиевски.
Една од клучните теми беше и распределбата на средствата од Унгарскиот кредит, при што претседателот на ЗЕЛС се заблагодари на Владата и премиерот Христијан Мицкоски за доделените грантови, нагласувајќи дека општините ќе се обидат тие да бидат искористени најефективно за доброто на граѓаните.
Во разговорот со министерката беше отворено и прашањето за зголемување на приходите од споделените даноци, каде што според Ѓорѓиевски, македонските општини значително заостануваат во споредба со регионот.
-Во Европа, општините добиваат 100% од персоналниот данок, додека кај нас тој изнесува само 6%. Бараме тој процент да се покачи најмалку на 30, а доколку е можно и на 50%. Истото важи и за делот од ДДВ кој општините го добиваат, каде што барањето е негово зголемување од сегашните 6% на најмалку 10%- додаде Ѓорѓиевски.
Посебен акцент беше ставен на блок и наменските дотации за пожарникарството, образованието и детската заштита, каде што, според анализите на ЗЕЛС, општините трошат повеќе средства од своите буџети отколку што добиваат преку дотациите.
Од страна на министерката Димитриеска-Кочоска беше изразена отвореност за соработка во сите сфери што ги тангираат единиците на локалната самоуправа, како и подготвеност за изнаоѓање заеднички решенија. Средбата се одвиваше во конструктивна атмосфера, а особено позитивен сигнал беше даден во однос на распределбата на средствата од Унгарскиот кредит, што ќе им помогне на општините во нивните проекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Буџетот на Чаир, Бујар би го потрошил за една недела, државниот ревизор му ги извади валканите алишта на виделина

Кандидатот за градоначалник на Чаир од коалицијата „Вреди“, Изет Меџити, денеска реагираше на начинот на кој поранешниот министер Бујар Османи ги менаџирал јавните пари, предупредувајќи дека злоупотребите и вештачки надуените цени во тендерите се директна опасност за секоја институција и за буџетот на граѓаните.
„Ако само замислиме дека со вакви цени, со вакви рекетирања, Бујар ќе ја косеше тревата во Чаир исто како во салата ‘Борис Трајковски’, тогаш е јасно дека буџетот на општината ќе се проголта за една недела. Со таков начин на лошо менаџирање, наставниците ќе останеа без плати, а граѓаните без основни услуги“, изјави Меџити.
Тој се повика на последниот извештај на Државниот завод за ревизија, кој како што оцени, констатирал сериозни злоупотреби при организацијата на дводневен самит, за кој биле потрошени околу два милиони евра државни пари.
„Овде не станува збор за мои зборови или политички обвинувања. Овде зборуваат фактите, документите и официјалните извештаи. А кога еден министер троши два милиони евра за дводневен самит, додека граѓаните се мачат со инфраструктура, образование и основни услови, тоа е непростливо“, нагласи Меџити.
Тој потсети и на времето кога Османи беше министер за здравство, споменувајќи дека во Гинеколошката болница во Чаир тогаш добил прекар „пациентот“ – што според него е симболичен показател за неуспешното раководење со институциите.
Меџити кој денес оствари посета на ОУ “Васил Главинов” порача дека Чаир заслужува транспарентно управување, реални инвестиции и грижа за граѓаните, а не злоупотреби и тендери со рекетирање.
„Граѓаните имаат право да знаат каде завршуваат нивните пари. Моја обврска како иден градоначалник е да ја вратам довербата и да го заштитам буџетот на Чаир од вакви злоупотреби“, заклучи тој.
Македонија
На Табановце се чека околу 30 минути

Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е зголемен, поради летните одмори се бележи зголемена фрекфенција на возила, на ГП Табановце времето на чекање за излез од државата е околу 30 минути, додека на останатите граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Утре ќе се прска против комарци во Скопје

Од Градот Скопје известуваат дека утре (петок), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.