Лидерот на центристичката Либерална партија Илие Болојан денеска стана привремен претседател на Романија, откако стапи на сила оставката на актуелниот претседател на земјата, Клаус Јоханис.

Болојан (55), кој до денес беше и претседател на Сенатот, ја презема функцијата од колегата центрист Клаус Јоханис, кој пред два дена поднесе оставка од функцијата претседател на Романија, откако опозициските партии најавија дека ќе бараат негов импичмент.

Тешко десничарските пратеници сега планираат да поднесат барање за недоверба на владата на широката коалиција, која има тесно мнозинство во парламентот и ја вклучува Либералната партија на Болојан, објави Ројтерс.

Канадскиот министер за одбрана Бил Блер денеска во Брисел, по средбата со генералниот секретар на НАТО, Марк Руте, изјави дека идејата на американскиот претседател Доналд Трамп Канада да стане 51-та држава на САД е „навредлива“, но дека тој не верува дека неговата земја е „навистина под закана“.

„Една од работите што мислам дека треба да им биде јасна на сите, вклучително и на господинот Трамп, е дека моите сограѓани Канаѓани секогаш ќе застанат во одбрана на нашата нација, за нашата земја. Подготвени сме да се браниме доколку е потребно, а тоа секогаш бара жртви“, рече Блер,  пренесува американски Политико.

Блер рече дека и верува на Америка и не е „потресен како некои“, тврдејќи дека тоа е затоа што со децении соработувал со Соединетите Држави преку низа различни администрации.

Стотици сообраќајни несреќи се забележани во американската сојузна држава Вирџинија, а десетици илјади луѓе се без струја поради обилните снежни врнежи и замрзнатиот дожд, пишува „Дејли мејл“.

Регионот на Апалачките Планини и делови од средноатлантските држави во североисточниот и југоисточниот дел на САД беа најтешко погодени.

Во меѓувреме, Калифорнија се подготвува за бура што може да ги погоди областите уништени од неодамнешните шумски пожари.

Националната метеоролошка служба извести дека во последните 24 часа во Вирџинија паднале 36,8 сантиметри снег.

Се очекуваат поплави во урбаните области во централна и јужна Калифорнија.

Поради снежното невреме кое ги зафати средноатлантските држави, на замрзнатите коловози се регистрирани голем број несреќи, а затворени се и голем број училишта. Околу 160.000 клиенти во Вирџинија и 10.000 во Северна Каролина се без струја.