Свет
Сириец (23) бодеше луѓе на улица во Австрија и уби 14-годишно дете
Дваесет и тригодишен Сириец по случаен избор избол петмина минувачи во Вилах, град во јужна Австрија, извести полицијата. Во нападот загина 14-годишно момче, а четири лица се повредени. Полицијата го привела осомничениот. Мажот е сириски државјанин со легален престој во Австрија, соопшти полицијата.
„Ова е исклучителен и шокантен настан“, изјави Рајнер Дионисио, шеф на одделот за односи со јавноста на полицијата во Каринтија.
„Позадината на овој напад сè уште не е позната, а во моментов е во тек темелна истрага за целиот случај“, додаде тој.
Нападот се случил околу 16 часот на штанд за колбаси во центарот на Вилах, а 23-годишен Сириец ненадејно ги нападнал минувачите со нож, пишува „Кроне цајтунг“. Сите жртви се мажи. Две лица се полесно повредени, а две се тешко повредени.
Според пишувањата друг Сириец спречил да се случи уште поголема катастрофа. Четириесет и двегодишен доставувач на храна, исто така сириски државјанин, бил сведок на нападот. Без размислување се упатил со своето возило кон напаѓачот.
„Сакаше да оди кон центарот на градот, имаше деца на улица. Не можев да го дозволам тоа. И јас имам деца!“, рекол доставувачот.
Истрагата треба да утврди дали има можна терористичка позадина за нападот.
„Можете јасно да го видите како се смее на снимката од апсењето“, рече Дионисио.
Напаѓачот, кој претходно не и бил познат на полицијата, имал картичка за барател на азил на себе и наводно престојувал во прифатниот центар Лангауен. Сведоците исто така велат дека тој извикал Алаху Акбар.
„Ова страшно злосторство мора да има најтешки последици! Јас секогаш сум го кажувал тоа јасно. Секој кој живее во Австрија, мора да ги почитува законите и да се приспособи на нашите правила и вредности“, рече гувернерот на Корушка, Петер Кајзер.
„Секој што нема да го стори тоа мора да се соочи со најстрогите последици – да биде изведен пред суд, затворен и депортиран!“, рече тој.
И гувернерот изрази сочувство до семејството и жртвите: „Моето најдлабоко сочувство, како гувернер и пред се како татко, одам до семејството на убиениот млад човек“.
Лидерот на Партијата на слободата (FPÖ) Ервин Ангерер беше меѓу првите кои го коментираа нападот. Тој изјави дека е „длабоко шокиран од бруталниот напад со нож“ и ја критикуваше владејачката ОВП:
„Ние во Партијата на слободата со години предупредуваме за вакви ситуации, кои се резултат на катастрофалната политика за азил на владејачката партија предводена од ОВП“.
Полицијата соопшти дека се уште не е јасно дали осомничениот делувал сам, па затоа продолжува со потрагата по евентуални дополнителни осомничени.
Претходно денеска беше објавено дека 37-годишна жена и нејзината двегодишна ќерка починале од повредите здобиени откако авганистански државјанин влета неделава со својот автомобил во толпата во Минхен.
(Дополнето)
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Трамп за Бед Бани: Најлош настап досега и навреда за американската величина
Претседателот на САД, Доналд Трамп, остро го критикуваше настапот на порториканскиот пејач Бед Бани на полувремето на Супербоул, нарекувајќи го „еден од најлошите во историјата“. Трамп, судејќи според објавата на неговата социјална мрежа Truth Social, беше особено вознемирен од настапот на шпански јазик.
Во долга објава, Трамп упати низа обвинувања за настапот.
„Шоуто на полувремето на Супербоул е апсолутно ужасно, едно од најлошите ДОСЕГА! Бесмислено е, навреда за американската величина и не ги претставува нашите стандарди за успех, креативност или извонредност. Никој не разбира ниту збор што го кажува овој човек, а танцувањето е одвратно, особено за малите деца што го гледаат низ САД и светот“, напиша Трамп.
„Ова ‘шоу’ е шлаканица за нашата земја, која секој ден поставува нови стандарди и рекорди! Нема ништо инспиративно во ова хаосно шоу, и ќе видите, ќе добие одлични критики од лажните медиуми затоа што немаат поим што се случува во РЕАЛНИОТ СВЕТ. И, патем, НФЛ треба веднаш да го промени своето смешно ново правило за почеток на натпреварот. ДА ЈА НАПРАВИМЕ АМЕРИКА ПОВТОРНО ГОЛЕМА! Претседател ДОНАЛД Џ. ТРАМП“, заклучи тој.
Бед Бани, чие вистинско име е Бенито Антонио Мартинез Окасио, настапи на Супербоул само една недела откако ја освои наградата Греми за албум на годината за неговиот албум „DeBÍ TiRAR MáS FOToS“. Тој беше најслушаниот изведувач на Spotify во 2025 година, а според податоците на стриминг услугата, тој е на врвот на годишните плејлисти „Wrapped“ на корисниците четири години по ред.
Конзервативната организација Turning Point USA објави и организираше алтернативно шоу на полувремето за секој што не сакаше да го гледа Бед Бани. На тој настан, Кид Рок, познат како поддржувач на Трамп, настапи како главна ѕвезда. Организацијата, основана од покојниот активист Чарли Кирк, рече дека целта на „целоамериканскиот настап“ била да се прослави „американската вера, семејство и слобода“.
Европа
Москва: Полска е вмешана во обидот за атентат врз генералот
Руската разузнавачка служба ФСБ тврди дека обидот за атентат врз генералот Владимир Алексеев во петокот бил нарачан од Украинската безбедносна служба. ФСБ, исто така, вели дека полското разузнавање било вклучено во регрутирањето на напаѓачот, објави новинската агенција Интерфакс.
Не се понудени докази за тврдењата. Украина негира каква било вмешаност, додека Полска сè уште не ги коментирала обвинувањата. Во меѓувреме, руските безбедносни претставници објавија дека руски државјанин роден во Украина бил екстрадиран од Дубаи во Москва вчера. Тој е осомничен дека сериозно го повредил генералот Алексеев.
Алексеев, заменик-шеф на ГРУ, руската воена разузнавачка служба, бил застрелан во неговата станбена зграда во Москва во петокот и итно префрлен во болница. Руските истражители објавија во петокот дека непознат напаѓач испукал неколку куршуми кон генералот и избегал. Според Комерсант, Алексеев бил успешно опериран во саботата и се освестил, но сè уште е под медицински надзор.
Европа
Татко ја убил ќерката во Австрија, а потоа се самоубил: телата лежеле неоткриени со недели
Во Австрија, 51-годишен маж ја убил својата 19-годишна ќерка, а потоа извршил самоубиство, а злосторството останало неоткриено со недели.
Семејната трагедија излегла на виделина дури откако нивните тела биле пронајдени во одделни станови, пишува австрискиот „Хојте“.
Таткото и ќерката, двајцата од унгарско потекло, се сметале за исчезнати и биле пронајдени три дена откако нивното исчезнување било пријавено во полицијата.
Полицијата прво го пронашла голото тело на 19-годишната девојка, кое веќе било во напредна фаза на распаѓање, во станот во градскиот кварт Вимпасинг. На него немало надворешни повреди. Кратко потоа, таткото исто така бил пронајден мртов во својот стан, на десет минути пешачење, а состојбата на телото била слична.
Криминалистичката полиција претпоставува дека таткото ја убил својата ќерка пред неколку недели, најверојатно со задушување. Се верува дека веднаш потоа си го одзел животот. Не е пронајдена самоубиствена порака, па затоа нема веродостојни информации за мотивот. Сепак, истражителите се сомневаат дека болеста или инвалидитетот на ќерката можеби одиграле улога.
Злосторството е откриено на 26 јануари, а полицијата сега смета дека е решено. Доказите собрани на местото на настанот, како и обдукцијата, ја исклучија вмешаноста на трети лица.

