Градоначалникот на Општина Центар, Горан Герасимовски, вчера беше дел од донаторскиот настан за поддршка на националните роботски тимови организиран од СТЕМ Академија која е единствената глобално акредитирана организација за СТЕМ образование во земјава.

„Заедно со домаќинот и водител на настанот Сашко Коцев, на еден забавен начин, ја прославивме моќта на упорноста, храброста да се сонува и силата на младите умови кои никогаш не се откажуваат. Навистина сум среќен што имав можност да ги запознаам членовите на Space Walkers тимовите и одблизу да ги видам роботските креации што децата ги изработија во изминатиот период и со кои ќе учествуваат на Глобалната светска роботска олимпијада која ќе се одржи во април на Крит, Грција. За пофалба е постигнатиот минатогодишен успех, кога во конкуренција од 1450 тимови во 19 категории, младите таленти на Space Walkers освоија прво и второ место што е показател за нивната посветеност, инвестирање безброј часови во дизајнирање, тестирање и подобрување на роботите. Направете нè повторно горди и покажете му на светот што значи македонската СТЕМ сила“, рече Герасимовски.

Општина Центар го препознава квалитетот, го вреднува трудот и затоа континуирано дава финансиска поддршка на програмските активности на оваа фондација.

Претседателот на Комисијата за европски прашања и потпретседател на Собранието, Антонијо Милошоски, денеска оствари средба со нерезидентната амбасадорката на Кралството Данска надлежна за земјата, Перниле Деилер Кардел.

Главна тема на средбата беа актуелните случувања на глобалната сцена и процесот на интеграција на Северна Македонија во Европската Унија, при што беа разменети мислења за предизвиците и перспективите со кои се соочува нашата земја во овој контекст. На средбата се разговараше и за тековните состојби во однос на клучните реформи во рамките на пристапните преговори и нашата заложба и посветеност како држава за надминување на предизвиците, исполнување на обврските во евроинтегративниот процес и обезбедување на негов континуитет.

Милошоски изрази благодарност за важната поддршка од Кралството Данска за нашите евроинтеграции, притоа истакнувајќи дека очекува нејзино продолжување со несмалено темпо и за време на данското претседавање со Советот на Европската Унија во втората половина на 2025 година.

Во однос на евроинтеграцискиот процес, амбасадорката Кардел истакна дека позицијата на Данска е дека Западен Балкан е добредојден во ЕУ за што, како што рече, треба да се постигнат критериумите во делот на владеењето на правото, демократијата и заштитата на човековите права.

Соговорниците разменија искуства за процесите на евроинтеграцијата и за актуелните предизвици со кои се соочува Европската Унија. На средбата беа разменети и мислења за придобивките за граѓаните од членството во ЕУ, како и за потребата од постојана промоција на овие вредности.

2024 година е трета година од мојот мандат, но и трета година во историјата на Кисела Вода кога финансиските средства на општинската сметка се значително повисоки од обврските. Денес, за разлика од минатото, ние не позајмуваме, ние инвестираме, истакна градоначалникот Орце Ѓорѓиевски на почетокот од своето денешно обраќање пред Советот на Општина Кисела Вода, каде што се усвоија кварталните извештаи.

Во своето излагање, тој ја истакна трансформацијата на општината во изминатите три години, посочувајќи ги рекордните финансиски резултати и историските капитални инвестиции.

-2023 и 2024 година се години со највисоки капитални инвестиции во историјата на нашата општина. Истовремено, 2024 е годината со највисоки приходи остварени во буџетот споредбено со било кога во минатото. Ги срушивме старите лоши навики на моите претходници, ја запревме праксата на непланирани трошења и создадовме модел на развој кој гарантира стабилност и раст, изјави Ѓорѓиевски. Информираше и дека со оваа историски највисока реализација на капитални проекти во износ од 155.898.143 денари, не се вклучени ниту еден од проектите чија реализација е во тек и ќе бидат завршени во 2025 година: Изградба на Основно училиште „Климент Охридски; Доградба на детска градинка „8-ми Март“; Доградба на Основно училиште „Кирил Пејчиновиќ“; Реконструкција на коловоз на ул. „Ѓорѓи Димитров“; Изградба на пат кон манастир „Пеленица“; Изградба на потпорни ѕидови и уредување на речното корито „Мала Рада“.

„Цело време говоревме дека работиме домаќински – ги скративме сите непродуктивни расходи, но истовремено ги зголемивме приходите. Денеска можеме со гордост да кажеме дека поставивме здрави темели и изградивме просперитетна и самоодржлива општина“, потенцираше градоначалникот, додавајќи дека делот на приходите, разликата меѓу работењето денес и она во минатото е драстична.

-Реализираните приходи во консолидираниот Буџет за 2024 година се за 38% повисоки во однос на 2020 година, односно за 287.541.464 денари повеќе. Во 2020 година, претходната власт користеше кредит од 54.451.735 денари, кој сега ние го враќаме. Без тие средства, разликата во нашето работење во 2024 година изнесува 341.993.199 денари повисоки приходи.
Кога на ова ќе се додадат сите скратени непродуктивни трошоци, јасно е зошто денеска имаме најмногу капитални проекти, а истовремено и рекорден број на субвенции и помош за жителите“, истакна градоначалникот, додавајќи дека Буџетот за 2025 година ќе овозможи многу повеќе приходи, со тоа и многу повеќе капитални проекти и субвенции, како и целосна реализација на ветената pрограма.