Македонија
Муцунски се обрати на 23-от Мешовит парламентарен комитет меѓу Македонија и ЕУ: Македонските граѓани останаа посветени на европските вредности
Министерот Муцунски се обрати на 23-от Мешовит парламентарен комитет меѓу Северна Македонија и ЕУ
Министерот за надворешни работи и надворешна трговија, Тимчо Муцунски, попладнево се обрати на 23-от Мешовит парламентарен комитет меѓу Република Северна Македонија и Европската Унија, кој денес се одржа во Скопје.
Во своето обраќање, министерот Муцунски го истакна значењето на ова меѓупарламентарно тело како континуиран, посветен и силен поддржувач на евроинтегративните процеси на државата, кое дополнително придонесува кон развојот на соработката меѓу Собранието и Европскиот парламент.
Министерот нагласи дека оваа година означува две децении од добивањето на статусот кандидат за членство во Европската Унија и изрази очекување дека Унијата ќе делува одлучно во насока на поголема предвидливост и конкретно придвижување на пристапниот процес.
„Дваесет години на реформи, компромиси – често тешки и болни, но секогаш водени од визијата за европска иднина. Македонските граѓани останаа посветени на европските вредности, и покрај предизвиците и разочарувањата на овој долг пат. Денес, повеќе од кога било, потребни се јасност, предвидливост и решителност во нашиот интегративен процес. Европа не смее да ја изгуби довербата на граѓаните кои две децении веруваат во европскиот проект.“, истакна министерот Муцунски.
Во своето излагање, министерот ја потврди целосната посветеност на Владата на процесот на европска интеграција, со засилен фокус на имплементацијата на клучните реформи. Тој посебно се осврна на напредокот во усогласувањето со заедничката надворешна и безбедносна политика на ЕУ, како потврда за приврзаноста на Северна Македонија кон принципите на мир, стабилност и демократски вредности.
„Во надворешната политика остануваме доследен партнер на ЕУ, со целосно усогласена Заедничка надворешна и безбедносна политика. Нашата поддршка за Украина, учеството во санкциските режими и активната улога како НАТО-членка покажуваат дека не сме само набљудувач, туку чинител во градењето на европската безбедност. Како прва земја од регионот, потпишавме Партнерство за безбедност и одбрана со ЕУ – нова сеопфатна рамка за продлабочена соработка во оваа област.“
Во обраќањето пред комитетот тој ги истакна и добрососедските односи и регионалната соработка, при што потенцираше дека Северна Македонија останува пример во регионот за градење на стабилни партнерства со соседите, со подготвеност за дијалог и заеднички решенија.
На крајот, министерот Муцунски ја изрази благодарноста за досегашната поддршка на Европскиот парламент и повика на уште поголема активност во следните години со цел конкретни и одлучни чекори кон европската иднина на Северна Македонија.
„Дваесет години сме кандидат за членство во ЕУ. Чекориме по пат што постојано се менува, станува потежок и помалку предвидлив. Но, ние не се откажуваме. Веруваме во Европската унија, веруваме во европските вредности и веруваме дека нашето место е во европското семејство. Време е за одлуки, а не за нови одложувања. Време е зборовите да станат дела, а процесот на проширување да стане реалност.“, заклучи министерот Муцунски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Гаши: Ромскиот јазик е дел од културниот мозаик што го збогатува нашиот општествен идентитет
Ромскиот јазик е дел од културниот мозаик што го збогатува нашиот општествен идентитет. Затоа, заштитата и развојот на Ромскиот јазик значи заштита на меморијата, достоинството и динамиката на една заедница која дала многу на нашето општество, рече претседателот на Собранието, Африм Гаши, на владината седница посветена на Светскиот ден на Ромскиот јазик.
Тој додаде дека ссвен институционалната одговорност, имаме и морална одговорност да гарантираме ова наследство да не остане само симбол на календарот, туку да се претвори во секојдневна реалност на еднакво учество во јавниот живот.
„Како Собрание, остануваме посветени на гарантирање на заштитата и унапредувањето на правата на Ромската заедница, преку зајакнување на инклузивните политики во образованието, културата и граѓанското учество. Иако актуелно немаме пратеник од Ромската заедница, сакам повторно да нагласам, со целосно убедување, дека секогаш ќе бидам еден одговорен и посветен глас за заштита на правата и аспирациите на оваа заедница. Додека сум тука во оваа владина сала, сакам да го охрабрам владиниот кабинет заедно да преземеме конкретни чекори за поддршка на Ромската заедница и за зачувување и развој на нејзиниот јазик. Разновидноста не е поделба, туку извор на сила, и наша должност е да го претвориме овој ден во повик за единство, меѓусебно почитување и конкретни дејствија“, рече Гаши.
Македонија
(Видео) Филипче: ВМРО-ДПМНЕ успеа за една ипол година да нѐ стави во групата со Косово, БиХ, Молдавија и со Украина
Претседателот на Социјалдемократскиот сојуз на Македонија, Венко Филипче, на денешната прес-конференција порача дека Извештајот на Европската комисија за напредокот на Македонија е сериозен аларм за иднината и перспективата на државата, нагласувајќи дека е најлошиот извештај којшто Македонија го добила во изминатите десетина години.
„Објавувањето на Извештајот за напредокот со оцена дека Македонија не постигнала напредок на европскиот пат, ни испрати јасна порака каде се движи земјава изминатите година и пол под власт на ВМРО-ДПМНЕ. Овој Извештај е практично најлошиот извештај којшто сме го добиле изминатите десетина години и сериозно го вклучува алармот за иднината и перспективата на државата“, рече Филипче.
Лидерот на СДСМ посочи дека извештајот го потврдува застојот и назадувањето на земјата во процесот на европските интеграции и дека потребни се итни чекори за враќање на државата на европскиот пат.
„Се случи тоа што предупредувавме, ВМРО-ДПМНЕ успеа за една ипол година да не стави во групата со Косово, со Босна и Херцеговина, со Молдавија, со Украина, со земји коишто последни го почнаа патот на евроинтеграциите”, изјави Филипче.
Македонија
Бојан Бојкоски нов претседател на Советот на Општина Битола
На денешната конститутивна седница беше усвоен новиот состав на Советот на Општина Битола. На седницата присуствуваше и градоначалникот на Општина Битола, Тони Коњановски.
Со седницата претседаваше највозрасниот член на Советот, Јагода Талевска од движењето ЗНАМ. На конститутивната седница присуствуваа и гости од збратимената општина Стари Град – Белград, Република Србија.
Во своето обраќање пред новиот советнички состав, градоначалникот Тони Коњановски упати порака за заедништво и посветеност кон развојот на општината.
„Очекувам соработка и взаемно почитување меѓу Советот и градоначалникот, насочени кон заеднички цели – развој, реализација на проекти и конкретни резултати за доброто на Битола. Затоа, ги повикувам сите советници на конструктивен дијалог“, истакна градоначалникот Коњановски. Во знак на почит, присутните одржаа едноминутно молчење за прерано починатиот советник Зоран Петковски.
За нов претседател на Советот на Општина Битола беше избран советникот Бојан Бојкоски од ВМРО-ДПМНЕ, за кого гласаа 18 советници, 11 беа против, а двајца воздржани.
„Дискусијата во Советот мора да се подигне на повисоко ниво. Нема да дозволам навреди и лични пресметки. Кога има волја, има и резултати. Ќе успееме, само ако сме обединети“, порача Бојкоски.

