Свет
Фон дер Лајен: Времето на илузии заврши, потребно е зголемување на инвестициите во европската одбрана

Претседателката на Европската комисија, Урсула фон дер Лајен, денеска повика на зголемени инвестиции во европската одбрана и изградба на Европската одбранбена унија, која обезбедува мир преку единство и сила, велејќи дека времето на илузиите заврши.
„Европскиот безбедносен поредок е разнишан, а многу од нашите илузии се уништени“, рече Фон дер Лајен во Европскиот парламент во Стразбур за време на дебатата за состаноците на Европскиот совет и европската безбедност.
Во овој контекст таа изјави дека, по крајот на Студената војна, некои верувале оти Русија може да се интегрира во европската економска и безбедносна архитектура, а други се надеваат дека ЕУ може на неодредено време да се потпира на целосната американска заштита и дека ги намалила трошоците за одбрана.
„Времето на илузии сега заврши. Европа е повикана да преземе поголема одговорност за својата одбрана. Не во некоја далечна иднина, туку денес. Не со постепени чекори, туку со храброст што ја бара ситуацијата.
Ни треба нагло зголемување на европската одбрана. И ни треба сега“, рече таа. Во исто време оцени дека има итна потреба да се пополнат празнините во снабдувањето на украинската војска и да се обезбедат цврсти безбедносни гаранции на Украина.
„Но, овој момент на пресметка не се однесува само на Украина. Се работи за безбедноста на цела Европа и на целиот наш континент“, изјави Фон дер Лајен. Таа го обвини рускиот претседател Владимир Путин дека постојано докажува дека е непријателски сосед тврдејќи дека нему не може да му се верува, само може да му се одвлече вниманието.
Фон дер Лајен зборуваше и за нејзиниот план за повторно вооружување на Европа, вреден до 800 милијарди евра, и заклучи дека сите сакаме да живееме во помирни времиња. „Време е да се изгради европска одбранбена унија, која обезбедува мир на нашиот континент преку единство и сила.
Ова е моментот на Европа. И Европа ќе се издигне до тоа“, рече Фон дер Лајен. Претседателот на Европскиот совет, Антонио Кошта, оцени дека ЕУ живее во одлучувачки момент и дека се соочува со чувство на итност. „Геополитичките тензии се зголемија во последните недели. Мултилатерализмот е под огромен притисок, како и меѓународниот поредок заснован на правила“, рече Кошта.
Тој додаде дека безбедноста на Украина и Европа не може да се разделат и рече дека Европскиот совет ќе работи на нови иницијативи насочени кон одговор на итните потреби со кои се соочува Украина во однос на војската и одбраната.
„Истовремено, ние сме подготвени да ја поддржиме Украина кога ќе одлучи да почне преговори за да постигне траен, праведен мир.
Ги охрабруваме нашите партнери да ја поддржат Украина“, нагласи Кошта и додаде дека „Европа на одбраната и просперитетот“ ќе биде дел од неговиот мандат.
Полскиот министер за ЕУ -прашања, Адам Шлапка, изјави дека само сеопфатен, праведен и траен мир за Украина може да стави крај на војната.
„За мир преговараа Украина и нејзините легитимни власти предводени од претседателот Володимир Зеленски. Мир, кој вклучува Европејци, чија безбедност без сомнение ќе биде засегната. Мир заснован на силни безбедносни гаранции“, рече Шлапка, пренесува „Танјуг“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Инциденти по протестот во Белград: Петпати фрлија солзавец, но луѓето бришат солзи и не се откажуваат, летаат јајца и шишиња по полицијата

Голема толпа народ не се повлекува од улиците на Белград иако студентскиот протест, преку кој испратија порака за предвремени парламентарни избори, заврши. Полициски кордони има насекаде и се обидуваат да ја потиснат масата луѓе. Граѓаните на многу места фрлаат со шишиња, лименки, камења и јајца по полицијата, се жалат дека се чувствува солзавец во воздухот, но велат дека нема да се откажат.
„Бевме пред кордонот полиција, во првиот ред. Петпати фрлија солзавец, но луѓето бришат солзи и не се откажуваат. Доста е страв, нема понатаму. Ова е нивен крај, не наш. Остануваме до крај“, вели за српската телевизија „Н1“ студентка која на протестот е со мајка си и не сака да си замине.
„Спуштете ги штитовите“ извикуваат граѓаните и не сакат да отстапат. Ставаат маски на лицата и пренесуваат повик „да не се откажуваме, се додека сме мирни, ништо не можат“.
Студентскиот протест на кој беа пренесени пораките за предвремени избори заврши мирно, а инцидентите почнаа во моментот кога студентите ги соблекоа елеците.
Регион
(Видео) Студентите на протестот во Белград ќе развеат знаме „какво што не се очекува“

Студентскиот протест во Белград почна со огромен број луѓе кои се уште се слеваат кон плоштадот Славија. Студентите за вечерва најавија дека ќе развеат знаме „какво што досега не е видено“. Откога почна протестот тие на социјалните мрежи објавија кусо видео од последните подготовки за изнесување големо знаме на улица со најава дека „тоа ќе биде знаме кое не сте го очекувале“.
Biće to zastava koju niste ocekivali pic.twitter.com/qeFNGlGmHD
— Žaklina Tatalović (@zaklina_prva) June 28, 2025
Протестот е предвидено да заврши во 21 часот кога истекува рокот кој студентите го дадоа на власта за распуштање на Народното собрание распишување предвремени парламентарни избори како и растурање на протестот во Пионерскиот парк каде некои студенти на контрапротест три месеци кампуваат и бараат продолжување на универзитетската година. За се што ќе се случува по 21 часот, студентите кажаа дека не се надлежни, а претседателот на Србија, Александар Вучиќ, попладнево рече дека очекува насилство, токму во периодот од 21 до 22 часот.
Регион
Плоштадот Славија во Белград се преполни, реки луѓе доаѓаат од сите страни на видовденски протест

Под слоганот „Се гледаме на „Видовден“ попладнево плоштадот Славија во Белград, Србија се преполни луѓе. Српските медиуми јавуваат дека реки народ се уште доаѓаат кон плоштадот од сите страни на државата.
Студентите, поддржани од огромен број граѓани имаат две барања од властите. Првото барање е распуштање на Народното собрание и распишување предвремени парламентарни избори до 21 часот денес, а второто барање е да прекине протестот на некои од студентите кои бараат продолжување на универзитетската година и три месеци кампуваат во Пионерскиот парк во центарот на Белград.
Студентите кои го организираат протестот најавија дека тој ќе трае три часа, треба да заврши во 21 часот и се огласија за ненадлежни за се што ќе се случува по 21 часот.
Претседателот на Србија, Александар Вучиќ, денес изјави дека очекува насилство на протестот кое ќе почне меѓу 21 и 22 часот.