Претседателката Гордана Сиљановска-Давкова, во рамките на официјалната посета на Република Азербејџан, денеска во Баку оствари тет-а-тет средба со претседателот на државата, Илхам Алијев, а беше одржан и пленарен состанок на двете делегации.

„Република Азербејџан има важна улога на меѓународната сцена, на геополитичката сцена, вклучително и поради богатството со гас, што за државите чија заложба е транзицијата кон обновливите извори, како нашата, соработката со оваа држава би имала исклучителна важност“, изјави по средбата македонската претседателка, која воедно изрази задоволство што е во посета на Баку.

Изрази очекување двете држави да потпишат декларација, што ќе води кон воспоставување или кон потпишување договор за соработка.

„Тоа нема да значи само азербејџанска помош за нас во поглед на гасот, туку ќе отвори простор и за економска соработка“, изјави таа и се заложи за укинување на визите за дипломатските и службените пасоши.

„Уште веднаш да се стави крај на онаа чудна состојба да постојат визи за дипломатски и службени пасоши. Таквата состојба, верувам, никому не му одговара, а укинувањето ќе доведе до зближување на нашите народи“, оцени таа.

Нагласувајќи го нејзиното длабоко верување во силата на културната дипломатија, во својата изјава Сиљановска-Давкова укажа на подготвеноста од натамошно продлабочување на соработката со Азербејџан во областа на науката, на туризмот, во економската сфера.

Според неа, денешната официјална посета ќе биде дополнителен поттик за натамошно јакнење на меѓусебните односи, размена на искуства и воспоставување многу поцврста соработка, пред сѐ, мислејќи на договорот за стратешка соработка.

Утрово, на церемонија со највисоки државни и воени почести, претседателката Гордана Сиљановска-Давкова беше примена од претседателот Илхам Алијев, со што почна нејзината официјална посета на Република Азербејџан.

По средбата со претседателот Алијев, претседателката положи венец пред Споменикот на победата во Паркот на победата, а во Алејата на славните во Баку им оддаде почит на гробот на третиот претседател на Република Азербејџан, Хејдар Алијев, и на неговата сопруга Зарифа Алијева.