Македонија
Сиљановска-Давкова одржа предавање на Универзитетот АДА во Баку: Светот е во длабока криза и ова е последен повик за нешто да биде променето
Светот е во длабока криза и ова е последен повик за нешто да биде променето, порача претседателката Гордана Сиљановска-Давкова во своето предавање вчера попладне пред академската заедница и студентите на Универзитетот АДА во Баку, за време на нејзината официјална посета на Република Азербејџан.
Според претседателката, на 80-годишнината од создавањето на Обединетите Нации, светот се соочува со војната во Украина, закани од нестабилност и масовни миграции. Посочи дека сите носат одговорност за ваквите состојби, со чинење, но и со нечинење.
Рече дека го очекуваме почетокот на мировниот процес за Украина. Не можеме да речеме дека утре ќе заврши, но тој мора да започне што поскоро, рече претседателката, бидејќи како што истакна, не постои лош мир, како што не постои добра војна. Потребен е дијалог, наместо монолог во наоѓањето решенија.

Посочи дека Обединетите Нации треба да имаат примарна улога во изнаоѓањето мировни решенија, како во случајот со војната во Украина, особено во ситуација кога се нудат различни концепти и од страна на ЕУ и од страна на САД, но и кога нема единствена стратегија внатре во Европската Унија. Но, посочи и на потребата за реформи на светската организација, бидејќи како што рече, 80 години по нивното формирање, не можеме да останеме со нешто што е конструирано во 1945 година. Според неа, време е за жена генерален-секретар на ОН. Укажа на потребата да биде слушнат гласот и на помалите држави. Според претседателката, видовме многу лица на глобализацијата, но мора да бидеме свесни дека мултиполарниот свет е тука и постои. Според неа, моќните треба да бидат свесни за останатите и дека не може да наметнувате апсолутна моќ. Поредокот не може да биде базиран само на моќ, рече претседателката.
Во своето предавање претседателката ги опфати концептите на политиката, од Аристотел, преку Хана Аренд до Харолд Ласвел. Ги претстави и фрапантните укажувања за важноста на Евроазија и Украина за големите сили во тезите на Халфорд Мекиндер, Николас Спајкмен, Збигњев Бжежински и Хенри Кисинџер.
„Ако ме прашувате за кого бијат камбаните, ќе речам за човештвото и за потребата жените да ја преземат својата улога во процесот на носење одлуки, рече претседателката во своето предавање. Светот виден низ женски очи е поинаков“, посочи таа.

Пред присутните рече дека во македонскиот парламент, 42% од пратениците се жени, дека таа го зголеми бројот на жени во Кабинетот. Посочи дека нејзиниот аѓутант е жена и дека двете главни позиции во рамки на Агенцијата за разузнавање се водени од жени.
Ги истакна своите заложби за културна дипломатија и потсети на зборовите на македонскиот револуционер Гоце Делчев, кој светот го разбирал како поле за културен натпревар меѓу народите.
Во контекст на односите со земјата домаќин, претседателката Сиљановска-Давкова гледа одлични можности за економска соработка и трговска размена. Сите сме свесни за ресурсите на Азербејџан и за нивната присутност на Балканот и во дел од земјите на Европската Унија, рече претседателката и изрази очекување за потпишување на декларација за пријателство и стратешко партнерство меѓу двете држави, што ќе придонесе за конкретизирање на соработката во повеќе сфери од заемен интерес.
На претседателката Сиљановска-Давкова и беше врачен почесен медал на универзитетот АДА, во знак на сеќавање за одржаното предавање.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Кривична пријава за директор на студентски дом поради несовесно работење
Полицијата поднесе кривична пријава против Н.Ј. (57) од селото Таринци, општина Карбинци, поради постоење основи на сомнение за сторено кривично дело „несовесно работење во службата“.
Според пријавата, на 29 и 31 мај 2024 година, Н.Ј., во својство на директор на Државен студентски дом „Браќа Миладиновци” во Штип, постапил спротивно на член 40 од Законот за јавни набавки.
Тој извршил плаќање на фактури во вкупен износ од 84.320 денари за сместување, односно ноќевање за себе и за ученици од студентскиот дом во два хотели во Охрид, без да спроведе соодветна постапка за јавна набавка, соопшти полицијата.
Македонија
Кривична за поранешен градоначалник на Чашка поради сомнеж за злоупотреба
Полицијата поднесе кривична пријава против Г.С. (47) од Велес, поранешен градоначалник на Општина Чашка, и против М.А., раководител на финансиското одделение во истата општина, поради постоење основи на сомнение за сторено кривично дело злоупотреба на службената положба и овластување.
Според пријавата, Г.С. во текот на 2021 и 2022 година, во повеќе наврати, свесно и со умисла ја ангажирал второпријавената да извршува работни задачи подолго од нејзиното работно време, иако таа била вработена со скратено работно време, што е спротивно на Законот за работни односи, кој забранува прекувремена работа за лица со скратено работно време.
Од СВР Велес информираат дека М.А., и покрај известувањето од Фондот за пензиско и инвалидско осигурување на Македонија и донесеното решение за четиричасовно работно време поради здравствени причини, прифатила да биде дополнително ангажирана.
За извршените активности ѝ биле исплатени 50.109 денари, со што, според пријавата, е нанесена штета на буџетот на Општина Чашка.
Македонија
„Нокаут“ ќе ги забавува битолчани за Нова Година
Општина Битола одлучи да нема огномет на прославата на дочекот на Новата година.
Со ова, општината се приклучува кон другите општини кои, исто така, одлучија на прославите за дочекот на новата година да нема огномети и заради барањата на поедини здруженија на граѓани.
Организираниот дочек како и изминатите години ќе биде на платото на Офицерскиот дом, каде ќе има музичка програма која е дел од „Зимската приказна“.
На последниот ден од годината дневната програма ќе започне во 11:00 часот на платото на Офицерскиот дом, а од 12:00 часот во Старата чаршија.
Вечерната програма пред Офицерскиот дом ќе биде од 20:30. На почеток забава со Борче Наумовски, потоа „Кабаре за раѓањето и вечноста“, „Баркод бенд“ и од 23:00 до 1:00 часот по полноќ со групата „Нокаут“.

