Македонија
ЛДП: Тажен ден за Македонија – изразуваме искрено сочувство до семејствата на настраданите во трагедијата во Кочани и бараме одговори за причините

ЛДП изрази сочувство до семејствата и блиските на настраданите по страшниот пожар кој се случи во кочанска дискотека.
„Либерално-демократската партија е во шок и неверување и изразува жалење и сочувство до семејствата и блиските на настраданите по страшниот пожар, кој ноќта помеѓу сабота и недела (15 и 16 март) го зафати клубот „Пулс“ во Кочани.
Македонија навистина не памети ваква трагедија. Згаснати се повеќе од десетици млади животи, уште повеќе повредени и цела држава повторно е завиена во црно.
Сведоци сме на стравичните видеа и фотографии кои пристигнуваат од Кочани и само ни додаваат на нашата тага и лутина.
Профитот и корупцијата повторно го земаа данокот, овој пат во млади животи. Додека сме во најтешкото исчекување за крајната бројка на жртви и повредени, прашуваме кој дозволил да се пушти објект во употреба доколку немал соодветни услови за тоа и продал повеќе билети од дозволениот капацитет на локалот?
Дали некој не извлекол поука од сите претходни слични и трагични ситуации како оваа и дозволил ова да се случи, за на крајот цела земја да биде во жалење и сите да бараме одговори како дошло до тоа.
Болката и тагата се навистина големи, особено кога знаеме дека се работи за млади луѓе, кои никако не заслужиле нивната викенд забава да се претвори во најголемата трагедија во државата.
Во ова тешко време, повикуваме на разум и емпатија со сите погодени од оваа трагедија. Бараме од надлежните брза и ефикасна истрага за да се утврдат сите факти и оние што дозволиле ваков грозоморен чин, во најбрз можен рок да се изведат и да одговараат пред лицето на правдата!“, велат од ЛДП.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вечерва зборуваме на различни јазици, но исто тагуваме и жалиме за нашите млади момчиња и девојки што неправедно ги изгубивме, вели Меџити

Вечерва, на плоштадот „Скендербег“, положивме цвеќе во чест на изгубените животи во трагедијата во Кочани, напиша на социјалните мрежи Изет Меџити првиот вицепремиер и министер за животна средина по трагедијата во Кочани.
„Заедно ја споделуваме болката и се солидаризираме едни со други. Вечерва зборуваме на различни јазици, но исто тагуваме и жалиме за нашите млади момчиња и девојки што неправедно ги изгубивме. Нашите молитви и мисли се со семејствата на жртвите и повредените. Тие не се сами во оваа болка! Ние сме заедно“ објави на фејсбук Меџити.
Македонија
Трагично загинатата пејачка на бендот „ДНК“ беше самохрана мајка: нејзиниот сопруг почина пред четири години

Професорката по пијано на Факултетот за музичка уметност, Сара Пројковска, која беше придружен вокал во групата „ДНК“, го загуби животот во пожарот во дискотека во Кочани, потврди Факултетот за музичка уметност.
Нејзината колешка Ана Костадиновска, која е придружен вокал за „ДНК“ и предава во средно музичко училиште, е во стабилна состојба и се лекува дома, потврди нејзиното семејство.
Пројковска беше самохрана мајка на две деца.
Таа во текот на својата кариера пееше придружни вокали за речиси сите поп пејачи во Македонија. Нејзиниот поранешен сопруг, џез-трубач и професор по труба, Александар Николовски, почина во 2021 година на 48-годишна возраст.
Македонија
Во Бугарија пристигнаа пет пациенти од пожарот во Кочани; Габровски: Нивната состојба е сериозна

Бугарија се обврза на лекување на 14 жртви од пожарот во Кочани. Ова го изјави заменик директорот на болницата „Пирогов“ во Софија, Николај Габровски, пренесуваат бугарските медиуми..
Габровски вели дека осуммина од повредените ќе бидат сместени во Пирогов. Досега се пристигнати пет лица. „Тројца од нив се на вештачка вентилација на белите дробови. Потребно е да им се помогне со дишењето. Состојбата на пациентите е сериозна, не можеме да кажеме ништо повеќе бидејќи во моментов се примени. Ќе вложиме максимални напори да ги лекуваме“, прецизираше тој на брифингот во Пирогов.
Во болницата се очекува да бидат примени уште три лица, од кои две ќе бидат деца на возраст од 15 и 16 години, како и еден 19-годишен маж. Ќе бидат и интубирани, пишуваат тамошните медиуми.
Три лица ќе бидат превезени во Пловдив, а три во Варна.
Габровски изрази сочувство до семејствата на загинатите: „Ова е огромна трагедија, со која не можеме а да не сочувствуваме.
Информира дека Бугарија го испрати воениот авион „Спартан“, кој донел осуммина од повредените во нивната земја.
Уште пет лица во тешка состојба и на механичка вентилација се очекува во текот на денешниот ден со амбулантни возила со специјализирана опрема да бидат пренесени во софискиот централен ургентен центар .
Бугарската амбасада во Скопје е во постојан контакт со македонските власти и продолжува да ја следи состојбата, според тамошните медиуми.