Македонија
Кога се изборивме со се, кога го добивме тоа што го сакаме: напиша сопругата на Тоше кој загина во пожарот во Кочани славејќи го раѓањето на неговиот син

„Кога се изборивме со се кога го добивме тоа што го сакаме. Нашата љубов доби плот кој ќе не веселеше цел живот на кој ке се смеевме и радувавме, што се случи зошто овој живот е толку суров и безмилосен зошто ги зема луѓето кои треба да живеат на кој животот е пред нив“, напиша сопругата на Тоше Богданов, кој загина во пожарот во дискотеката во Кочани. Тој во саботата отишол да го прослави раѓањето на својот син во дискотеката.
„Јас ќе бидам храбра мама и ќе се борам нашето мало ангелче да израсне во човек како што беше ти добар храбар и јак човек. Кога ќе порасне и ме праша мамо каде е мојот татко јас ке му речам да поглетне во небото и да ја гледа најсјајната ѕвезда што свети а тоа ке бидеш ти.
А јас ке бидам таа што секогаш ке те сакам и никогаш нема да те заборавам.
Вечна ти слава беше незаменлив човек“, напиша неговата сопруга Деспина Богданов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Клиниката „Жан Митрев“ згрижи 9 пациенти: тројца се испратени во соседните земји, тројца се пуштени дома, а другите се задржани на понатамошна опсервација

Клиниката „Жан Митрев“ извести дека досега вкупно девет пациенти биле згрижени тука, од кои тројца, кои беа во животна опасност и беа итно интубирани, се пренесени на лекување во соседните земји. Другите шест пациенти добија соодветен третман, при што тројца од нив веќе се во стабилна состојба и ќе бидат пуштени на домашно лекување, а тројца остануваат на дополнителна опсервација.
„Клиниката ‘Жан Митрев’ од првиот момент ги отвори вратите за сите повредени во трагичниот настан во Кочани и со целосна поддршка и максимална посветеност ги стави на располагање сите свои ресурси, целиот медицински персонал, болничките капацитети и амбулантните возила.
Тимот на болницата – лекари, медицински сестри и болничари, заедно со специјално опремените амбулантни возила, постојано се ангажирани во транспорт на најтешко повредените пациенти не само до и од клиниката туку и од други здравствени установи во земјата и странство. Во изминатиот период беа транспортирани повеќе од десет пациенти кон разни здравствени центри вклучувајќи ги аеродромите во Скопје и Солун, како и болниците во Белград, „8 Септември“, Клиничката болница „Климент Охридски“ и други“, велат од Клиниката „Жан Митрев“.
Македонија
Речиси 70 проценти од пациентите се лекуваат надвор, како Влада ќе направиме сè што можеме за да спасиме човечки живот, рече Мицкоски

Секој што бил во или во близина на ужасниот настан да се јави на лекар и да побара консултација, без разлика дали чувствува некои копликации, нема тука пркосење ако сакаме да нема други ефекти што би дошле понатаму, замоли премиерот Христијан Мицкоски при посетата на повредените пациенти од пожарот во Кочани, кои се сместени во болницата ГОБ „8 Септември“ во Скопје.
„Како Влада правиме сè што можеме и ќе продолжиме за да спасиме човечки живот“.
Најави седница на Владата, на која ќе биде потврдена одлуката Владата да ги покрие трошоците на два члена на семејство за да се упатат онааму каде што се згрижени пациентите.
„Голема благодарност до лекарите, до медицинските тимови, кои вложуваат натчовечки напори и во првите моменти од ужасната трагедија да спасат човечки животи, во процесот на транспорт, голем дел, повеќе од 70-80 пациенти де надвор од државата, така што денеска и министерот за надворешни работи и надворешна трговија и министерот за здравство се наоѓаат во Солун и од таму одат во Софија да ги посетат некои од згрижените пациенти. За еден и пол час имаме седница на Владата, ќе ја потврдиме одлуката да ги покриеме трошоците на 2 члена од семејството за да појдат онаму каде што се згрижени пациентите, како и превоз и сместување.
Се слушаме со голем број европски и светски лидери, помошта стига од сите страни, а јас сум им благодарен на соседите и на сите други“, рече премиерот.
Македонија
Осуммина пациенти од КАРИЛ денес заминуваат на лекување во странство, Мерџаноски вели дека не се во тешка состојба, но има влошување

Лекарите утрово известија дека состојбата на пациентите повредени во пожарот во Кочани сместени во нивните клиники е под контрола, но поради природата на повредите, особено труењето со штетни гасови, можни се компликации во наредните денови. Кај пациенти сместени на Клиниката за анестезија, реанимација и интензивно лекување (КАРИЛ) забележале знаци на влошување и за нив денес се планира трансфер во странство.
„Сите ни се стабилни, има пациенти со знаци на влошуваат, но не се во тешка состојба. Ги планираме за транспорт. Денес продолжуваме со транспортирање уште осуммина пациенти. Ќе заминат во Словенија, Полска, Австрија, Италија и во Хрватска“, рече директорот на Клиниката за трауматологија, Игор Мерџаноски.
Заменик-министерот за здравство, Јовица Андоновски, утрово извести дека на нашите клиники се лекуваат 89 пациенти, а 76 се транспортирани во странство, и најави дека преместувањето на повредените во странски клинички центри ќе продолжи.
„Планираме препраќање на уште неколкумина пациенти. Во преговори сме со Виена, Полска, Шведска, Холандија, Италија, Хрватска, Норвешка и со Словенија. За краток период ќе знаеме уште колку пациенти ќе може да бидат префрлени на лекување во овие земји“, рече заменик-министерот Андоновски.
Директорот на Фондот за здравствено осигурување, Сашо Клековски, рече дека иако на лекување во странство досега се испратени 76 пациенти, има доволно резервни капацитети за упатување во странство, со тоа што следните трансфери може да бидат во малку подалечни земји оти капацитетите на соседните се веќе исполнети.