Македонија
Утре ден на жалост и во БиХ поради трагедијата во Македонија

Владата на Босна и Херцеговина на денешната итна седница донесе одлука со која 18 март 2025 година го прогласи за Ден на жалост во Федерацијата Босна и Херцеговина поради трагедијата во Северна Македонија.
Оваа одлука е донесена за да се изрази сочувство до семејствата на жртвите од трагедијата што се случи на 15 март 2025 година во градот Кочани, Северна Македонија, кога најмалку 59 лица ги загубија животите во пожар.
Денот на жалост се одбележува со задолжително истакнување на знамето на Босна и Херцеговина на половина копје, или на јарболот, на зградите на законодавните, извршните и судските власти, јавните институции, институциите и другите правни лица на територијата на Федерацијата БиХ.
На Денот на жалост не може да се одржуваат културно-забавни програми на јавни места во Федерацијата БиХ, а медиумите на територијата на Федерацијата БиХ се обврзани да ја усогласат и прилагодат својата програмска содржина на Денот на жалоста.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Белгиските тимови се веќе во Скопје за да понудат поддршка по трагедијата во Кочани: Фетаи разговараше со Прево

Заменик-претседателот на Владата на Република Северна Македонија, Арбен Фетаи, денеска оствари комуникација со министерот за надворешни работи на Белгија, Максим Прево, во врска со трагедијата во Кочани, во која загинаа 59 лица.
Министерот Прево изрази искрено сочувство и ја истакна посветеноста на Белгија да помогне во надминувањето на ситуацијата нагласувајќи дека тимовите за брза интервенција B-FAST, вклучувајќи и медицински персонал, веќе пристигнале во Скопје за да понудат поддршка.
Заменик-претседателот на Владата, Фетаи, во својот одговор искажа благодарност до Белгија и до Европската Унија за солидарноста и за итната помош нагласувајќи дека во вакви моменти е важно да можеме да се потпреме на пријателите.
Тој исто така посочи дека оваа трагедија открила сериозни проблеми во системот, кои бараат итни и храбри мерки, како и сериозна дискусија, која веќе е ставена на дневен ред на денешната владина седница.
Македонија
Здравјето на повредените во пожарот во Кочани да биде врвен приоритет, препорака од Лекарската комора

Лекарската комора ја поздравува навремената реакција на надлежните институции во нашата земја, како и срдечната помош и поддршка што ја даваат другите држави со згрижување на најтешко болните пациенти повредени во пожарот во Кочани.
Овој начин на организација, според нив, е клучeн зa пациентите да добијат вистинска шанса со соодветна и високостручна медицинска помош за да ја надминат тешката здравствена состојба во која се наоѓаат.
Оценуваат дека поддршката што ја добиваме од другите држави како со згрижување на пациентите така и со лекарска експертиза, заедно со посветената работа на нашите доктори, е најважна во овие моменти за да се спречи да расте бројката на трагично загинати.
Лекарската комора исто така апелира да се почитуваат медицинските протоколи за лекување и заштита на ваков тип пациенти, кои предвидуваат изолација и забрана за посети.
„Мора да се има предвид дека овие болни имаат мултисистемско засегање на организмот и зголемен ризик од инфекции. Секој дополнителен контакт со надворешни лица, директно и сериозно, може да го загрози нивното здравје. Присуството на цивилни лица кај овие болни исто така може да предизвика и непотребен стрес и вознемиреност, како и да го попречи работењето на медицинскиот персонал“.
Ги повикуваат сите институции, политичари, медиуми, граѓани и здравствени работници да ги почитуваат медицинските протоколи, а здравјето на повредените да го сметаат за највисок приоритет.
„Веруваме дека со таков однос ќе се постигне поголема доверба кај јавноста отколку со непотребни директни посети на болните“, истакнуваат од Лекарската комора.
Македонија
За Марибор тргна и вториот авион, кој носи уште двајца пациенти од пожарот во Кочани

Денеска беа пренесени уште двајца повредени од трагедијата во Кочани на лекување во Марибор, соопшти Амбасадата на Словенија.
„Со тоа Словенија ја исполнува својата заложба за помош и солидарност со погодените.
Северна Македонија побара помош преку механизмот на Унијата за цивилна заштита“, е објавено од страна на Амбасадата на Словенија.