Регион
Објавена нова снимка од уривањето на натстрешникот во Нови Сад

Во моментот кога се урна натстрешникот на железничката станица во Нови Сад, при што загинаа 15 лица, во главното фоаје имаше речиси 35 луѓе, кои чекаа да купат билети или чекаа воз. Никој од нив не е повреден, според снимките од надзорните камери што ги објави „Форбс Србија“.
На снимката се гледа дека главното лоби не било градилиште само на хартија, со оглед на тоа што барањето за работа на објектот било потврдено дури на 16 октомври 2024 година. Тоа било навистина градилиште бидејќи патниците стоеле во зграда во која сè уште се работи, пишува „Форбс Србија“.
Како што може да се види на снимката што е објавена, новоизградената галерија не била отворена за патниците и другите посетители на станицата во моментот на уривањето на натстрешникот. Преку скалите беше поставена карактеристична темнозелена градежна фолија. Исто така, се гледа дека недостига дел од оградата на скалите на новата галерија.
Покрај тоа, значителен дел од фоајето беше заграден со лента, а на подот имаше и градежна фолија. Тие се показател дека сè уште се работи и дека овие делови од зградата не биле достапни за патниците. Пример за работа во тек, дури и во моментот на уривањето на натстрешникот, е скелето поставено во близина на лифтот. Овој лифт, наменет првенствено за лицата со посебни потреби, заедно со галеријата, беше една од новите функции во фоајето, се додава во текстот на „Форбс Србија“.
Како што може да се види на снимката, патниците не реагирале исто на несреќата. Со оглед на големата тежина на бетонската конструкција на натстрешникот, имаше силно движење на воздухот и се подигна голема количина прашина. Ова ги исплашило некои патници, па побегнале. Од друга страна, имаше и такви што немо гледаа, но и такви што останаа во редот за влезници.
Повеќето од нив по 15-20 секунди набрзина го напуштиле фоајето. Во другиот дел од снимката, до која пристап имал „Форбс Србија“, може да се види дека некои вработени во станицата се обиделе да им помогнат на оние што се нашле под натстрешникот. Однатре се обиделе да стигнат до повредените.
Исто така, на снимката се гледа дека меѓу првите во главното лоби пристигнале градежни работници. Не е јасно од кој дел од зградата дошле, освен ако се симнале по скалите од катот погоре, каде што се наоѓаат платформите. Сепак, ова може да биде уште еден показател дека сè уште се работи во зградата. Многу бргу, по само една минута, во главното фоаје се појавија првиот полицаец и двајца обезбедувачи. Набргу пристигнале брзата помош и други полицајци.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Заводот за трансфузија во Белград: Има доволно крв за повредените во пожарот во Кочани

Како што истакнуваат од српскиот Завод за трансфузија на крв во Белград, резервите на крв во моментот се стабилни и доколку има потреба од трансфузија кај пациентите што беа повредени во пожарот во дискотеката во Кочани, а кои беа пренесени во Белград и моменно се на Ургентниот центар на КЦС, ќе бидат згрижени.
„Кога станува збор за повредените во пожарот во Кочани, што се однесува до крвта, тие се згрижени. Би сакала да забележам дека за такви повреди крвта не е од суштинско значење за лекување. Се разбира, никогаш не се знае како ќе се одвива текот на лекувањето и важно е да се напомене дека резервите на крв во овој момент се стабилни“, изјави Мирјана Кнежевиќ од Институтот за трансфузија на крв.
Како што наведе таа, Заводот за трансфузија на крв во моментот има резерви од четири дена, што е добра состојба, но дарувањето крв не треба да престане бидејќи секојдневно се потребни крводарителите.
„Вчера, во просторијата на Заводот за трансфузија на крв имаше уште неколку доброволни крводарители, но бидејќи тоа не е пресудно за повредените пациенти од Кочани, нема потреба од паника затоа што, доколку има потреба, ќе бидат згрижени во однос на трансфузијата и воопшто не смееме да се опуштиме бидејќи мора да бидеме свесно и одговорно општество и секогаш да имаме стабилни резерви“, нагласи Кнежевиќ.
Регион
„Во такви моменти нема граници – само човечка болка, жалиме со нашите браќа Македонци“, бугарските партии изразија сочувство

Бугарските политички партии изразија сочувство до браќата Македонци на денот на националната жалост, прогласен од министерскиот совет во Бугарија во знак на солидарност со трагедијата во градот Кочани, Република Северна Македонија, во која загинаа 59 лица, а над 155 беа повредени во пожар во дискотеката „Пулс“ на 16 март, пренесе „Бгнес“.
„Бугарија ја споделува тагата на Северна Македонија по трагичната смрт на 59 лица во Кочани. Во овој тежок момент за нашите најблиски соседи остануваме солидарни во целосна поддршка на македонскиот народ“, соопштија од коалицијата Демократска Бугарија на социјалните мрежи.
Партијата Вазраждане напиша: „Денеска е ден на жалост и солидарност со нашите браќа во Македонија. Господ да ги прости невините млади души!“
И од Има таков народ изразија најискрено сочувство за трагедијата во Кочани. „Ние тагуваме заедно со нашите браќа Македонци“, велат од партијата на Слави Трифонов.
„Денеска, Бугарија е во жалост! Жалиме заедно со нашите браќа и сестри од Кочани и изразуваме длабоко сочувство за семејствата на загинатите во трагичниот пожар. Во такви моменти нема граници – само човечка болка и поддршка што можеме да ја дадеме. Почит кон споменот на жртвите“, стои во ставот на партијата Величие.
Премиерот на Бугарија, Росен Жељазков, го прогласи 18 март за ден на национална жалост како израз на солидарност со „нашиот најблизок сосед на Балканот – Република Северна Македонија, а во врска со трагичниот инцидент во градот Кочани, во кој загинаа 59 лица, над 150 беа повредени во пожар во дискотека“.
14 од повредените се пренесени во медицинските установи во Бугарија – во Софија, Пловдив и во Варна.
„Во такви моменти најважно е да се покажат навремена емпатија и солидарност. Бугарија е подготвена да прифати уште жртви“, изјави вчера премиерот Жељазков.
Претходно денеска, шефот на бугарската држава, кој се потпиша во книгата на жалост во Амбасадата на Република Северна Македонија во Софија, најави дека Бугарија може да прифати повеќе жртви доколку на Скопје му треба поголема медицинска помош уверувајќи дека медицинските тимови се подготвени.
Регион
Снаата на убиените во Чачак повикала полиција: пожарникарите влегле во станот низ прозорецот

Јован (77) и Милица (72) Баковиќ синоќа околу 22 часот се убиени во семејниот стан во Чачак.
За убиството е осомничен нивниот син Михајло, а како што дознаваат медиумите, неговата сопруга повикала полиција.
„Беа прекрасни луѓе, синот им доаѓаше секој ден, не разбираме што можеше да се случи. Слушнав дека на Михајло му се слошило, но не знам за што се работи. Синоќа му се јавила сопругата, тој не одговорил. Ниту тие не се јавиле, па таа дошла во станот. Таа тропнала на вратата, но никој не одговорил, не знаела што се случило и ја повикала полицијата, која ги пронашол телата во станот“, изјавил соседот за медиумите.
Убиениот Јован бил лекар во пензија, според написите.
Припадници на МВР во Чачак го приведоа М. Б. (41) од Чачак поради сомнение дека сторил кривично дело тешко убиство.
Како што беше дополнително соопштено, тој е осомничен за кривично дело тешко убиство и се сомничи дека со остар предмет ги убил родителите. По наредба на Вишото јавно обвинителство во Чачак, одредена му е мерка притвор до 48 часа, во кој рок со поднесување кривична пријава ќе биде изведен на распит во Обвинителството.