Министерот за економија и труд Бесар Дурмиши информираше за сите надлежности кои ги има Министерството за економија и труд во делот на издавање на лиценци и следните мерки и законски решенија кои ќе бидат донесени и кои се во нивна надлежност.

„Во делот на издавање на лиценци, согласно Законот за угостителска дејност за да работи ноќен бар, кабаре, дискоклуб и дискоклуб на отворен простор мора да има за тоа валидна лиценца. Таа лиценца ја издава Министесвото за економија и труд со поднесување на барање за издавање на лиценца на образец за платен надоместок за давање услуги.

Кон барањето се доставува и следната документација:

1) Решение за упис во трговскиот регистар издадено од Централниот регистар на Република Северна Македонија (во оригинал не постар од 6 месеци);

2) Одлука за определување на висната на надоместокот за кабаре, ноќен бар, дискоклуб и дискоклуб на отворен простор, донесена од советот на општината.

3) Пријава за исполнување минимално-технички услови за вршење угостителска дејност (во копија);

4) Согласност од органот на државната управа надлежен за работите од областа на внатрешните работи дека се исполнети условите за заштита на јавниот ред и мир и безбедност на сообраќајот (во оригинал)“, кажа Дурмиши.

Според него, Министерство за економија и труд постапувајќи по поднесеното барање ја разгледува документацијата која содржи акти и документи издадени од други институции и врз основа на истата, доколку се исполнети условите е задолжена да ја даде лиценцата за вршење угостителска дејност во ноќен бар, кабаре, диско-клуб и диско-клуб на отворен простор со период на важност од 1 (една) година.

Министерство за економија и труд не е надлежно, како што рече, ниту има механизам за вршење увид, надзор или контрола во објектот во кој ќе се врши дејноста.

Во однос на висината на надоместокот кој треба да го плати вршителот на дејноста истата ја определува советот на општината. Надоместокот 50% се уплатува на сметка на општината, а 50% се уплатува во Буџетот на Република Северна Македонија.

„Во прилог на барањето наведениот образец ,,Пријава за исполнување минимално-технички услови за вршење угостителска дејност” е формулар кој правниот субјект го пополнува со бараните основни податоци за субјектот, дејноста, просторија за лична хигиена на гостите, посебни одредби за вработените, капацитет за простор за послужување, вентилација, број на излези за итни ситуации и многу други критетриуми при што истиот изјавува дека дадените податоци во пријавата се вистинити и притоа образецот го доставува во подрачно одделение на Државниот пазарен инспекторат.

Во однос на Согласноста од органот на државната управа надлежен за работите од областа на внатрешните работи дека се исполнети условите за заштита на јавниот ред и мир и безбедност на сообраќајот барателот може за истиот да поднесе барање до Министерство за внатрешни работи, а доколку не поднесе, по службена должност Министерството за економија и труд ќе се обрати со барање мислење до МВР. По добивање на мислењето од МВР, Министерството за економија и труд ја изготвува соодветната Лиценца за која е поднесено барањето.

Доколку се добие негативно мислење во однос на исполнетоста на условите наведени погоре Министерството за економија и труд ќе донесе Решение за одбивање на барањето и не се издава бараната лиценца. Доколку во периодот на важноста на Лиценцата (1 година) МВР констатира дека кај одреден субјект се изменети односно не ги исполнува условите за кои е надлежен да врши контрола и надзор, ќе го извести Министерството за економија и труд по што министерството ќе донесе Решение за одземање на веќе издадена лиценца“, појасни Дурмиши.

Министерот информира дека секој правен субјект без разлика на дејноста за која е регистриран вклучувајќи ги и сите угостителски објекти пред започнување со работа задолжително поднесува пријава или известување за започнување со работа до: Градоначалник на општината, Инспекторат за труд, Дирекција за заштита и спасување, Агенција за храна и ветеринарство (доколку подготвува и послужува храна), УЈП и други надлежни институции кои се предвидени согласно позитивните законски прописи во Р Македонија за која документација се подразбира дека задолжително ја има поднесено, по што може да поднесе барање за издавање на лиценца за вршење угостителска дејност во ноќен бар, кабаре, дискоклуб и дискоклуб на отворен простор.

Соопшти дека на владина седница одржана на 18 март, Министерството за економија и труд било задолжено да започне со подготовки за измени и дополнувања на Законот за угостителска дејност. Овие измени, како што нагласи, ќе овозможат проверката на минималните технички услови за работа да се врши пред издавање на лиценцата за работа.

„Со тоа, Пријавата за исполнување на минимално-техничките услови за вршење угостителска дејност, пред да биде доставена како пропратен документ во барањето за лиценца, ќе треба да има потврда за нејзината веродостојност од Државниот пазарен инспекторат“.

Порача дека Министерството за економија и труд е посветено на гарантирање дека законот ќе се почитува и секој кој што огрешил пред законот треба да одговара. Одговорноста, според него, има име и презиме и сите одговорни лица очекува дека ќе бидат казнети.

Денеска започна изградбата на мега парк, јавна површина со плоштад и пешачка патека во Радишани, кaко еден од дванаесетте проекти кои Општина Бутел ќе ги реализира со средства одобрени на првиот владин јавен повик за финансиска поддршка за инфраструктурни општински проекти. Во рамки на теренските посети „Каде што срцето е дома“, на отпочнувањето на градежните работи за мега паркот, присуствуваа министерот за локална самоуправа, Златко Перински, заедно со претседателот на Владата, Христијан Мицкоски, заменик на претседателот на Владата и министер за транспорт, Александар Николоски и заменикот министер за локална самоуправа, Ерџан Селими.

Градоначалникот Дарко Костовски, истакна дека овој проект е еден од долгогодишните барања на локалното население, кој ќе се реализира во наредниве 12 месеци, благодарение на поддршката на Владата. Предвидена е урбанизација на простор од 10.000 метри квадратни, од кои 6.000 квадрати ќе бидат зеленило, а на 4.000 метри квадратни ќе се изгради плоштад на кој ќе има големо детско игралиште и пешачки патеки, односно катче за рекреација за сите генерации.

„Се случува ренесансен период во општина Бутел, благодарение на Владата и премиерот, кои увидоа дека директната помош која ја даваат на општините ќе направи буквална разлика од се што било досега“, истакна градоначалникот Костоски, кој најави дека Општина Бутел досега поднела 14 апликативни формулари на вториот владин повик за поддршка на инфраструктурни општински проекти.

Поддршката на општина Бутел, но и на сите останати во земјава, ќе продолжи со зголемен интензитет, најавија министрите Перински, Николоски и премиерот Мицкоски.

„За нас како Влада ова не се само инфраструктурни проекти, туку се и основ и доказ за посветеноста во насока на реализирање на проекти коишто се од исклучително значење за граѓаните и во таа насока и ќе продолжиме. Овој мега парк е еден од дванаесетте проекти од првиот владин повик, а Бутел досега има поднесено 14 проекти на вториот повик и се надевам дека минимум уште толку ќе поднесе во периодот што следи“, рече Перински.

Министерот за транспорт, Николоски, истакна дека директната помош на општините ќе продолжи не само преку владиниот повик за поддршка на проекти, туку и со кредитна линија преку Светска банка.

„Општина Бутел со сите проекти кои се реализираат и ќе се реализираат, доживува период на преродба. Нѐ чека уште многу работа, уште да се изгради. Оваа Влада, со оваа локална самоуправа има амбиција да гради и така ќе продолжи и во иднина“, најави премиерот.

Агенцијата за храна и ветеринарство (АХВ) во соработка со Организацијата за храна и земјоделство на Организацијата на Обединети нации (FAO) денес почна со реализација на активностите во рамките на симулациската вежба за болеста чума кај мали преживари, која ќе се одржи од денес до четврток. Цел на вежбата, на која учествуваат претставници од АХВ, Министерството за земјоделство, шумарство и водостопанство, Ветеринарната комора на РСМ, Факултетот за ветеринарна медицина од Скопје, експерти од Европската Унија и членовите на Сојузот на здруженијата на одгледувачите на овци „Модерен овчар“, е да се утврдат добрите и слабите страни на одговор при евентуална појава на болеста, која е предмет на планови за итни мерки на АХВ.

а Факултетот за земјоделски науки и храна денес се одржува првиот теоретско-практичен дел од симулациската вежба, а утре во с. Брњарци, општина Гази Баба, ќе се одржи теренскиот дел од вежбата.

„Ги информираме јавноста и месното население од село Брњарци и околните населени места дека теренските активности што ќе бидат преземени утре се исклучиво во рамките на предвидените за реализација на симулациската вежба. Не станува збор за реална ситуација и појава на жариште на болеста чума кај малите преживари, туку само вежба за превенција и оценка на ефикасноста на постојниот систем за заштита од болеста“, рече директорот на АХВ, Оливер Миланов, на отворањето на симулациската вежба.

Болеста, истакна тој, од минатата година е присутна и во регионот и во Европа и таа кај нас како институција го вклучи алармот сериозно да се посветиме на нејзина превенција. Во соработка со Факултетот за земјоделски науки и храна лани одржавме серија работилници во земјата со одгледувачите на ситен добиток и заедно алармиравме да се зајакнат биосигурносните мерки на фармите.

„Во рамките на оваа вежба практично и теренски ќе бидат споделени најдобрите практики и искуства за справување со болеста, која и сега, дури и на големите развиени економии, им создава сериозно големи удари врз добиточниот фонд и предизвикува големи економски штети“, рече Миланов.

Како држава засега успеваме да го спречиме ширењето на болеста кај нас за што, потенцира тој, изразувам благодарност и до одгледувачите на добиток, нивните здруженија и до науката.

„Заедно успеваме засега да се одбраниме од болеста која многу бргу и многу лесно во услови на динамична економија во европски и светски рамки може да ја афектира и нашата земја. И досега ја потврдивме исклучителната и блиска, но професионална соработка, со сите вклучени во системот за заштита од појава и спречување од ширење на болеста чума кај малите преживари како болест од А-категорија, која бара спроведување исклучително високи стандарди и мерки за заштита“, истакна тој.

Миланов изрази благодарност до европските експерти, кои на вежбата ќе ги споделат искуството и најдобрите практики за справување со болеста чума кај малите преживари, но и уверување дека во иднина биосигурносните мерки на фармите ќе бидат подигнати на уште повисоко ниво.

По спроведувањето на вежбата, ќе се направи евалуација на подготвеноста на Агенцијата за храна и ветеринарство за одговор при појава на болеста, а ќе се реализираат активности за подобра подготвеност на институциите и засегнатите страни при појава на особено опасни заразни болести како што е болеста чума кај малите преживари.