Скопјани од Идризово уценувале мајка на затвореник да им даде пари за да и’ го штитат синот.

МВР за случајот извести дека е поднесена кривична пријава притив двајцата, А.Б.(31) и А.Р.(25), поради изнуда и лихварство.

Тие, додека ја издржувале казната во затворот, незаконски дошле до телефони и преку „месинџер“ барале од мајката на друг осуденик да им исплаќа по 1.200 евра месечно за нејзиниот син да добие гаранции и заштита во затворот и подобри услови за сместување.

При видео повиците, затворениците и’ покажувале на жената и како насилно се однесувале кон нејзиниот син, притоа уценувајќи ја дека доколку не им бидат исплатени пари ќе продолжат со насилството кон синот.

Пред два дена, браќата на двајцата изнудувачи, по претходен договор со мајката на затвореникот од која барале пари, дошле во Струмица за да се сретнат со неа и да им ја исплати бараната сума. Едниот ги зел обележаните пари и бил веднаш приведен, додека братот на вториот изнудувач се дал во бегство, но за брзо бил фатен и приведен.

Истовремено, извршен бил претрес во затворските ќелии кај изнудувачите и им биле најдени и одземени телефоните. Нивните браќа биле изведени пред судија и завршија во куќен притвор.

Полицијата изврши претрес во домот и помошните простории кај Б.С.(35) од селото Слатино, тетовско.

Тој претходниот ден околу 23.50 часот бил приведен на локалниот пат Џепчиште-Варвара поради напад врз полициски службеници кои вршеле службени дејствија.

При претресот се пронајдени и одземени две дигитални ваги и пет кесички со бела прашкаста материја, соопшти МВР.

По документирање на случајот, ќе биде поднесена соодветна пријава.

Вчера на улицата Живко Чинго во Охрид се случила сообраќајна несреќа помеѓу патничко возило „фолксваген поло“ со охридски регистарски ознаки, управувано од А.М.(49) од Охрид и патничко возило „волво“ со охридски регистарски ознаки, управувано од Д.Г.(66) од Охрид.

Во несреќата со тешки телесни повреди се здобиле А.М. и нејзиниот сопатник Т.М.(41) од Охрид, додека со телесни повреди се здобил Д.Г., констатирани во Специјалната болница „Св.Еразмо“ во Охрид.

Извршен е увид.