Спортскиот директор на Барселона, Деко, изјави дека луѓето од клубот им се „допаѓаат“ Маркус Рашфорд од Манчестер јунајтед и Луис Дијаз од Ливерпул.

Шпанските медиуми оваа недела објавија дека Дијаз би можел да се пресели во Барселона, а Рашфорд се надеваше на трансфер во каталонскиот клуб во јануари, мно замина на позајмица во Астон Вила.

Нема индикации дека Ливерпул воопшти размислува да отвори преговори за Дијаз, кој има уште две години од договорот со „црвените“, додека Рашфорд може да го напушти „Олд Трафорд“ за околу 40 милиони фунти, објави денес „Би-Би-Си“.

„Ни се допаѓа Луис Дијаз, ни се допаѓа Маркус Рашфорд, ни се допаѓаат и други играчи. Кога одиме на пазарот, има имиња што ги знаеме и кои би можеле да го подобрат тимот“, изјави Деко за каталонската радио станица „РАК1“.

Деко изјави дека приоритет на клубот е да доведе нов крилен напаѓач, но и да продолжи соработката со неколку играчи од тимот.

„Наш приоритет е да го зајакнеме она што го имаме, со продолжување на договорите на Педри, Гави, Араухо, Рафиња, Кунде. Јасно ми е дека кога луѓето зборуваат за засилувања, секогаш мислат на играчи што доаѓаат од странство, но за мене продолжувањето на договорите е исто така засилување. Продолжувањето на договорот со Ламин Јамал е најдобриот трансфер во историјата“, додаде тој.

Барселона оваа сезона ја освои титулата во Шпанија, Купот на кралот и Суперкупот на Шпанија.

Дефанзивецот на Севилја Кике Салас (23) се најде во центарот на истрагата под сомнение за поврзаност со нелегално обложување. Според шпанските медиуми, вклучувајќи ги „Марка“ и порталот „Ел Конфиденсијал“, Салас на своите пријатели им давал информации врз кои ги базирале своите облози, вклучувајќи и совети да се обложуваат на неговите настапи.

„Ел Конфиденсијал“ објави пораки на „WhatsApp“ кои наводно потврдуваат дека Салас им препорачувал на своите пријатели да се обложуваат на жолти картони, кои потоа тој намерно ги добивал. Според тие наводи, тој овозможил исплата на добивки во неколку наврати.

Националниот полициски центар за интегритет во спортот и борба против обложување (Cenpida) се занимава со случајот од јануари, а токму во текот на тој месец Салас беше приведен како дел од истрагата, во тренинг центарот на клубот.

Истрагата имаше директно влијание врз неговата кариера, бидејќи му пропадна трансферот во Лацио. Казната за ваквото однесување може да достигне до три години затвор, но постои можност казната да се намали доколку се постигне договор со засегнатите обложувалници. Бидејќи неговите постапки не влијаеле на конечниот резултат од натпреварите, постапката не се води под сомнение за местење на резултатите.

Според достапните информации, пријателите на играчот заработиле вкупно околу 9.000 евра во шест наврати, а секој добитен облог бил поврзан со јавни опомени што ги добил Салас.

Самиот играч наводно немал директна финансиска корист, туку го искористил својот статус на професионален фудбалер за да им овозможи на другите да остварат профит.

Ерик тен Хаг најверојатно ќе го замени Чаби Алонсо на клупата на Баер Леверкузен. Според германските медиуми, челниците на „фармацевтите“ се во завршни преговори со холандскиот стручњакт, со кого ќе биде потпишан петгодишен договор.

Поранешниот тренер на Ајакс и Манчестер јунајтед се најде во центарот на вниманието откако Комо одби три понуди за Сеск Фабрегас.

Според германските медиуми, Руди Фелер имал голема заслуга за преговорите со Тен Хаг, бидејќи преку неговите пријатели стигнал до холандскиот стручњак и му ги претставил плановите на Леверкузен за следната година, што веднаш го привлекло тренерот да ја прифати понудата.

Потоа клубот и тренерот одржале состаноци, најпрвин во Холандија, а потоа и во Келн, по што бил постигнат договор. Многу германски медиуми тврдат дека сето ова треба да се официјализира во следните неколку дена.

Тен Хаг добил гаранции дека ќе има влијание врз клупската трансфер политика, бидејќи тимот треба да се освежи и да ги надомести заминувањата на Тах и Фримпонг и најавеното заминување на најдобриот играч Флоријан Вирц.