Ричард Бренсон, британскиот милијардер и сопственик на авиокомпанијата „Вирџин Атлантик“, остро ја критикуваше американската влада за ненадејното воведување нови царини, истакнувајќи дека пазарната реакција на тој потег била „и предвидлива и можела да се спречи“.

Во низа објави на социјалната мрежа Икс тој предупреди на сериозните последици за американската и светската економија.

„Дури и да се согласувате со основната идеја на овие царини, требаше да се направи се за да им се овозможи на американските компании да имаат доволно време да се приспособат“, напиша Бренсон.

Тој вели дека пазарите реагирале панично, а последиците се веќе видливи.

„Финансиските пазари ширум светот сега се во слободен пад, со катастрофални последици за обичните Американци и остатокот од светот. Пензионерските заштеди на Американците масовно ќе исчезнат“, рече Бренсон.

Како што доларот слабее, додава тој, се очекува зголемување на цените за американските потрошувачи. Во исто време, многу мали и средни компании веќе банкротираат или се на тој пат.

„Ова не е победничка стратегија на долг рок. Владата на САД сè уште може да ги промени работите, но мора да дејствува во следните неколку часа“, нагласи Бренсон.

Голема трагедија се случи во неделата навечер во Вупертал. Починаа тројца млади луѓе.

Портпаролот на противпожарната служба во Вупертал потврди дека тројца млади мажи загинале за време на скарата.

Според соопштението на полицијата, младите мажи, кои биле на возраст од 18, 25 и 26 години, во неделата биле во градината на Хајнштрасе во Вупертал (Северна Рајна-Вестфалија). Кога доцна навечер не се вратиле дома, родителите се загрижиле.

Според првите информации, тие наводно направиле скара во градината во нивната куќичка, што се покажало како фатална грешка, пренесува магазинот „Феникс“. Имено, градината очигледно не била доволно проветрена, па гасовите настанати при печењето не можеле да испарат. „Пожарникарите добија пријава за сомнителен гас и предупредување за присуство на јаглерод моноксид“, изјави портпаролот на пожарникарите. Обдукцијата ќе утврди дали навистина починале од труење со јаглерод моноксид, пренесуваат локалните медиуми.

Европската унија му нуди на САД взаемно укинување на царините за индустриски производи, изјави претседателката на Комисијата Урсула фон дер Лајен. Подготвени сме да преговараме со САД, понудивме нула царини за индустриски стоки, како што успешно направивме со многу други трговски партнери“, изјави Фон дер Лајен по состанокот со претставници на челичната и металната индустрија.

Истовремено, Комисијата е подготвена да одговори со контрамерки.

„Европа е секогаш подготвена за добар договор, затоа го оставаме на маса. Но, ние сме подготвени да одговориме со контрамерки и да ги браниме нашите интереси“, додаде претседателката на Комисијата.

Американската администрација воведе царини од 25 отсто за увоз на алуминиум и челик, кои стапија на сила на 12 март. Од 3 април, царините се исто така 25 отсто за сите автомобили и автоделови кои не се произведени во САД.

На 2 април американскиот претседател Доналд Трамп објави трговска војна на целата планета и најави реципрочни царини, минимум 10 отсто за сите, а уште повисоки царини за околу 60 земји, кои ќе стапат на сила од среда, на 9 април.

Европската комисија ги анализира можните одговори и се консултира со земјите членки, а првиот одговор треба да следи во среда.

Комесарот за трговија, Марош Шефчовиќ, во Луксембург, каде министрите за трговија на земјите-членки разговараа за трговските односи со САД, изјави дека Комисијата подготвила список со предложени контрамерки кои денеска ќе бидат испратени до земјите-членки. Гласањето е закажано за среда, на 9 април, а контрамерките треба да се применат од 15 април, рече Шефчовиќ.