Свет
Голем број верници се собраа во Рим за да му оддадат почит на папата: „Тој беше посебен, на сите христијани ќе им недостига“

Голем број граѓани на Италија и од други земји се собраа во базиликата „Света Марија Велика“ во Рим, каде што ќе бидат положени посмртните останки на папата Франциско, за да му оддадат почит на починатиот поглавар на Римокатоличката црква.
На тоа место се собраа голем број медиуми од целиот свет, а има и такви на плоштадот пред базиликата „Свети Петар“, каде што ќе се одржи погребот на папата Франциско в сабота, 26 април.
Меѓу собраните е и Евертон Коелјо од Бразил, кој моментно живее во Германија.
„Вчераутро пристигнавме во Рим. Кога вчера шетавме во градот, ја слушнавме многу тажната вест дека папата Франциско починал. Бевме изненадени и многу тажни. Тој беше харизматичен папа. Беше од Аргентина, Јужна Америка. И ние доаѓаме од Јужна Америка, па затоа чувствуваме дека е уште поблизок до нас. Беше приземен, многу близок до луѓето. Не живееше во замок, живееше едноставен живот“, изјави Коелјо за „Танјуг“.
Коелјо понатаму наведува дека ова е најголемата порака што папата Франциско ја остава зад себе.
„На христијаните многу ќе им недостига. Пред да дојдеме се обидовме да присуствуваме на мисата. За жал, минатата недела добивме порака дека папата нема да може да присуствува и дека ја откажале. А сега кога слушнавме дека нè напушта, многу е тажно“, рече Коелјо.
Друг Бразилец, кој денес беше во Рим, за „Танјуг“ вели дека го памети папата Франциско како едноставна личност, но и како некој што го сака фудбалот.
„Се сеќавам дека папата беше навивач на ‘Сан Лоренцо’ во Аргентина. Папата беше одлична личност за мене“, рече соговорникот.
Жителка од Рим за „Танјуг“ вели дека се сеќава на многу од она што го кажал папата Франциско оценувајќи го како неверојатно.
„Мислам дека ќе биде тешко да се најде замена за него“, рече тој.
Погребот на папата Франциско ќе се одржи в сабота, 26 април, во 10 часот наутро на плоштадот пред базиликата „Свети Петар“.
Претходно денес, беше објавено дека телото на починатиот папа ќе биде однесено во базиликата „Свети Петар“ в среда во 9 часот наутро.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Свет
Руте: Шокирани сме, нападот докажува дека не смееме да бидеме наивни во врска со Русија

Генералниот секретар на НАТО, Марк Руте, денес изјави дека руските напади врз Киев синоќа, кои ги погодија цивилните области и дипломатската мисија на ЕУ во Киев и убија најмалку 18 лица, покажуваат дека рускиот претседател Владимир Путин е подготвен да ја продолжи војната.
„Сите сме шокирани од она што се случи, пред сè затоа што станува збор за напади кои не се врз воени цели, ова се цивилни цели. Додека се обидуваме да направиме сè за да го поддржиме американскиот претседател Доналд Трамп да ја заврши оваа војна, во меѓувреме, рускиот претседател Путин е подготвен да продолжи со неа, да продолжи да напаѓа невини цивили во Украина“, рече тој на прес-конференција во германскиот град Вирцбург.
Тој истакна дека денес се консултирал со претседателката на Европската комисија, Урсула фон дер Лајен, и високата претставничка за надворешни работи, Каја Калас, по рускиот напад врз претставништвото на ЕУ во Киев, објави германската Н-ТВ.
„Нападот уште еднаш докажува дека не смееме да бидеме наивни во врска со Русија“, предупреди Руте.
Сепак, тој рече дека Русија е способна за хибридна војна.
„Доколку сметаат дека е потребно, можат дури и да извршат атентат“, нагласи Руте.
Според него, Русија се обидува да го наруши и цивилниот воздушен сообраќај, на пример во Германија и балтичките држави.
Фото: принтскрин
Свет
Аракчи: Иран ќе одговори на повторното воведување на санкции

Министерот за надворешни работи на Иран, Абас Аракчи, денес изјави дека земјата ќе одговори на „нелегалниот потег“ на Велика Британија, Франција и Германија (Е3), кои го иницираа механизмот за повторно воведување на санкциите на ОН врз Техеран поради неговата нуклеарна програма. Според агенцијата Тасним, шефовите на дипломатиите на Е3 го информирале Аракчи за одлуката за покренување на овој механизам и изразиле подготвеност наскоро да најдат решение што ќе спречи понатамошни чекори кон воведување санкции.
Аракчи изјавил дека оваа одлука на европските земји е „неоправдана, нелегална и нема правна основа“, велејќи дека Иран ќе одговори на овој потег за да ги заштити и обезбеди своите национални права и интереси во согласност со нуклеарниот договор од 2015 година и меѓународното право.
Иранскиот дипломат ја повика Е3 да усвои „одговорен пристап“ кон ситуацијата и да го исправи овој „погрешен потег“.
Земјите од Е3 претходно денес соопштија дека одлучиле да го активираат таканаречениот механизам за повлекување на санкциите пред да ја изгубат можноста да ги обноват санкциите врз Техеран кон средината на октомври, кои беа укинати според нуклеарниот договор од 2015 година.
Овие три земји понудија да ги одложат санкциите за период до шест месеци со цел да се овозможат сериозни преговори, доколку Иран продолжи со целосни инспекции на ОН и започне разговори со САД, пренесува Танјуг.
Фото: принтскрин
Свет
Ердоган ја претстави турската „Челична купола“

Турскиот претседател Реџеп Таип Ердоган вчера официјално го отвори интегрираниот систем за воздушна одбрана на Турција, познат како „Челична купола“, кој го опиша како пресвртница за земјата и нејзината одбранбена индустрија.
„Ова е знак на сила за Турција. Воведуваме нова ера за нашата сакана Турција во воздушната одбрана“, рече Ердоган на настан во објектите на одбранбената компанија Аселсан во Анкара. Владата на Ердоган го објави почетокот на развојот на Челичната купола, кој интегрира платформи за воздушна одбрана и сензори од морето и копното во мрежа за заштита на турското небо, во август минатата година.
Ердоган истакна дека најновата фаза од проектот се состои од 47 возила во вредност од речиси 400 милиони евра кои ќе „влеат доверба кај пријателите и страв кај непријателите“. Турската влада не прецизираше кога системот ќе биде целосно оперативен.
„Ниту една земја која нема способност да развива сопствени радарски и воздушни одбранбени системи не може да гледа кон иднината со доверба во однос на актуелните безбедносни предизвици, особено во нашиот регион“, рече Ердоган.
Турција претходно се обидуваше да ја зајакне својата воздушна одбрана со купување на ракетниот систем С-400 од Русија во 2019 година. Сепак, овој потег доведе до тоа Американците да ја суспендираат продажбата на невидливи авиони Ф-35 на Турција, поткопувајќи ги одбранбените цели на Анкара, пишуваат медиумите.
Конфликтите во Сирија и Украина, како и неодамнешните израелски напади врз Иран, ја интензивираа потребата на Турција да развива подобра воздушна одбрана.
Ердоган, исто така, ги претстави новите производствени капацитети на Аселсан, кои треба да се отворат во 2026 година. „Во следните 50 години, Турција ќе биде земја која не само што ги задоволува сопствените потреби, туку и ќе биде лидер во светот во својата технологија“, рече тој.
Фото: принтскрин