Финалето од четвртата сезона на Конференциската лига, најмладото европско клупско натпреварување, е закажано за вечерва во 21:00 часот во Вроцлав. За трофејот ќе се борат Челзи и Бетис.

Челзи изгледаше како главен кандидат за титулата од почетокот на лигашката фаза, а тимот на Енцо Мареска пристигна во Полска со цел да постигне уникатен успех. Со триумф, „сините“ ќе станат првиот клуб што освоил трофеи во сите пет големи европски натпреварувања, бидејќи „сините“ претходно двапати ја освоија Лигата на шампионите, двапати Лига Европа, двапати Европскиот Суперкуп, како и сега веќе непостоечкиот Куп на победниците на куповите.

За историја игра и Бетис. Клубот од Андалузија може да го освои првиот европски трофеј во историјата. Тимот од Севилја еднаш беше шампион на Шпанија, во далечната 1935 година, а има и три трофеи во Кралскиот Куп (1977, 2005, 2022).

Една статистика им оди во прилог.

Од сезоната 2001/2002, во сите 23 финалиња на европските куп натпревари во кои учествувале шпански тимови, завршиле со победа на клубовите од Пиринејскиот полуостров. Последен пат претставник на Шпанија загуби во финале во 2001 година, кога Валенсија беше поразена од Баерн Минхен, во Лигата на шампионите.

Можеби ова е прво европско финале за Бетис, но во тимот не недостасува искуство. Клучен играч е Иско, четирикратен победник на Лигата на шампионите со Реал. Тука е и Пабло Форналс, кој веќе ја освои Конференциската лига со Вест Хем. Во нападот, Седрик Бакамбу, со седум гола, е вториот најефикасен играч во натпреварувањето оваа сезона. Тренерот Мануел Пелегрини многу добро ги познава навиките на англиските тимови.

Тимот го заврши натпреварувањето во Ла Лига на шестото место, а финалето во Вроцлав беше главна тема во последните неколку недели, па затоа послабите резултати во претходните кола не се изненадувачки. Бетис е без победа во последните пет натпревари, а првими најмалку еден гол на последните 11. Настапот на голманот Фран Виетес и американскиот дефанзивец Џони Кардосо е под знак прашалник.

Челзи ја постигна својата примарна цел да се врати во Лигата на шампионите, завршувајќи на четвртото место во Премиер лигата. Тимот победи во седум од последните осум натпревари, вклучувајќи го клучниот триумф против Нотингем Форест минатиот викенд.

Во текот на целата сезона, тренерот Енцо Мареска го искористи ова натпреварување за да им даде можност на момците од академијата на Челзи и на играчите кои не играа многу во лигата, но со оглед на тоа што сега е натпревар за трофеј, се очекува да игра најсилниот тим, а самиот тој рече дека освојувањето на трофејот би ја претворило добрата сезона во одлична.

Менаџерот на Челзи, Мареска, играше за Малага, додека тренер на андалузискиот тим беше актуелниот тренер на Бетис, Мануел Пелегрини. Потоа, Мареска, подготвувајќи се за оваа работа, беше помошник на Пелегрини во Вест Хем. Навивачите на Бетис го паметат и Италијанецот како играч на омразениот ривал Севилја, чиј дрес го носеше четири сезони, а во ноември 2005 година го постигна единствениот гол во градското дерби.

Ова ќе биде петта средба меѓу двата тима. Ривалите претходно се сретнаа во четвртфиналето на КПК во 1998 година кога Челзи ги доби двата натпревари, а потоа и во групната фаза од Лигата на шампионите во 2005 година.