Италијанскиот стручњак Џан Пјеро Гасперини е назначен за тренер на Рома.

Како што беше објавено, Гасперини (67) потпишал договор со челниците на „волчицата“ до јуни 2028 година.

„Рома го објавува назначувањето на Гасперини за нов главен тренер на клубот. Кариерата на Гасперини е дефинирана со креативни тактики, посветеност на напорна работа и исклучителен развој на играчите. Сите во клубот веруваат дека Гасперини е вистинскиот човек за оваа мисија“, се вели во соопштението на клубот.

Искусниот стручњак ја водеше Аталанта од 2016 до 2025 година, со која минатата година ја освои Лига Европа.

Двапати, во 2019 и 2020 година, беше прогласен за најдобар тренер во Серија А.

Пред Аталанта, тој ги водеше, меѓу другите, Џенова, Палермо и Интер.

🟨 Benvenuto a Roma, Mister! 🟥#ASRoma pic.twitter.com/EgjKFZRBZg

— AS Roma (@OfficialASRoma) June 6, 2025

Ангелос Постекоглу повеќе не е тренер на Тотенхем, откако челниците на клубот решија да му врачат отказ.

Постекоглу го водеше Тотенхем две години.

Во сезоната што штотуку заврши, тој го предводеше тимот до трофејот во ЛигаЕвропа, а со тоа избори пласман во Лигата на шампионите.

Постекоглу му го донесе на Тотенхем првиот трофеј од 2008 година, сепак, дури ни тој факт не изгледаше доволен за да ја задржи работата.

Разделбата на австралискиот тренер и клубот од северен Лондон дојде две години пред истекот на договорот.

Управата на Тотенхем се одлучи за тој потег откако тимот го заврши натпреварувањето во Премиер лигата на 17-та позиција. Постекоглу го одржа „ветувањето“ дадено на есен – дека секогаш ќе освојува трофеј во својата втора сезона, каде и да работеше.

Тотенхем му се заблагодари за тој успех, но исто така одлучи да оди во поинаква насока.

Постекоглу претходно ги водеше Селтик, Јокохама Фронтале Маринос, австралиската репрезентација и неколку клубови од таа земја. Како можен наследник се споменува Томас Франк од Брентфорд.

Италијанските медиуми објавија дека Никола Милутинов би можел да го засили Армани Милано. Истите извори пренесоа детали од финансиската понуда, според која српскиот центар би станал еден од најплатените играчи во Европа.

Никола Милутинов и Олимпијакос нема да преговараат по завршувањето на финалната серија во грчкото првенство.

Според сознанијата на грчкиот портал „Спорт24“, деталите за соработката, која е блиску до официјализација, веќе се познати.

Милутинов би можел да потпише договор на две години, за плата од 4 милиони евра.

Во првата година, српскиот центар би заработувал 1.800.000 евра, додека во втората би заработил 2.200.000 евра. За третата сезона не беше наведено колку би можел да заработи Милутинов.

Милутинов минатата сезона во Евролигата имаше просек од 8,2 поени со 5,4 скока и просек од 20 минути на паркетот. Дел од сезоната беше повреден, па тоа влијаеше и на неговата игра.