Свет
Топлотен бран во Европа: се затвораат училишта, илјадници евакуирани, тројца мртви во Италија
Тринаесет италијански региони ја забранија работата на отворено во најжешкиот дел од денот; рекордни температури во јуни беа забележани во Шпанија и Португалија, додека училиштата во делови од Франција беа затворени поради исклучителната топлина што продолжува да влијае на поголемиот дел од Европа, пишува „Гардијан“.
Десетици илјади луѓе беа евакуирани од своите домови во Турција поради пожари, а врвот на Ајфеловата кула беше затворен за туристи во вторник, бидејќи температурите во Париз достигнаа 38 степени Целзиусови.
Ломбардија и Емилија-Ромања, два индустриски центри во северна Италија, објавија дека ја суспендираат работата на отворено помеѓу 12:30 и 16:00 часот, приклучувајќи се на 11 други региони од Лигурија на северозапад до Калабрија и Сицилија на југ кои воведоа слични забрани во последните денови.
Локалните власти го следеа советот на синдикатот по смртта на 47-годишниот градежен работник Брахим Аит Ел Хаџам во близина на Болоња во понеделникот, кој се онесвести и почина додека работеше на градилиште.
„Додека чекаме официјална причина за смртта, важно е да се промовира култура на безбедност во овој тежок период. Климатската криза очигледно ги влошува условите за оние кои работат надвор секој ден, а компаниите мора да ја стават заштитата на работниците како апсолутен приоритет“, изјави Синдикатот.
Мерките се разликуваат од регион до регион, но вклучуваат забрана за работа на градилишта, каменоломи и полиња во одредени часови.
„Наш приоритет е здравјето на работниците, особено во вакви времиња кога топлината станува неподнослива“, рече претседателот на Ломбардија, Атилио Фонтана.
„Заштитата на работниците е наша одговорност“, рече Винченцо Кола, советник за труд за регионот Емилија-Ромања.
Во понеделник, 53-годишна жена почина во Палермо откако се онесвести на улица. Таа имала проблеми со срцето. Се вели дека 70-годишен маж се удавил во туристичко одморалиште веднаш надвор од Торино откако интензивната топлина се претворила во бури и поплави.
Францускиот железнички оператор SNCF објави дека железничките услуги меѓу Франција и Италија се прекинати „барем неколку дена“ поради силни бури. Градот Коње во долината Аосте, кој минатата година многу страдаше од поплави, беше отсечен од лизгање на земјиштето.
Во некои делови од Италија, итните приеми во болница се зголемија за 15 до 20 проценти, главно поради постари лица кои дехидрирале.
Шпанската државна метеоролошка агенција Aemet објави дека јуни 2025 година бил рекордно топол – просечната температура била 23,6 °C, што е за 0,8 °C повисока од претходниот рекорд од 2017 година и 3,5 °C над просекот за периодот од 1991 до 2020 година.
Само неколку дена претходно, беше забележана највисоката јунска температура во историјата на Шпанија, која изнесуваше 46 °C во покраината Уелва во Андалузија. Во Португалија, 46,6 °C беа измерени во градот Мора во округот Евора, највисоката јунска температура некогаш забележана во таа земја, според податоците од Португалскиот институт за море и атмосфера.
Во Франција, премиерот Франсоа Бајру се обиде да го смири гневот поради затворањето на училиштата поради топлотниот бран. Повеќе од 1.896 училишта беа затворени целосно или делумно, бидејќи училниците станаа опасно жешки за децата и наставниците, предизвикувајќи бунт на синдикатите.
Париз беше под предупредување за максимален топлотен бран, а на родителите им беше советувано да ги држат своите деца дома во вторник и среда. Во градови како Троа и Мелун, сите училишта беа затворени.
Бајру рече дека Министерството за образование ќе почне разговори со градоначалниците за тоа како да се адаптираат училишните згради, од кои повеќето се лошо изолирани. Во некои париски училишта, наставниците повремено имаа само шише вода за да ги прскаат децата за да ги разладат.
Во други европски градови, температурите се исто така над нормалата, а во Скопје денес беа измерени 38 °C. Во наредните денови температурите ќе бидат во постепен пораст, особено од четврток до средината на наредната седмица кога дневната температура насекаде ќе биде над 30°C, а наместа ќе надмине 40°C.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Свет
Судир помеѓу автобус полн со ученици и автомобил: има загинати и повредени во Италија
Во сообраќајна несреќа во која учествувале автобус со 50 студенти и автомобил што преминал во спротивната лента, едно лице загинало, а 15 се повредени утрово во италијанската покраина Тревизо, објавува RAI денес.
Несреќата се случила во 7:45 часот наутро, а по судирот, двете возила завршиле во канал покрај патот.
Поради силата на ударот, возачот на автомобилот починал на лице место, а патниците во автобусот се здобиле со полесни повреди.
Возачот на автобусот и петте повредени студенти се префрлени во болница на лекување и прегледи.
Автобусот со студенти тргнувал од Сан Дона ди Пјаве во близина на Венеција, а несреќата се случила веднаш откако возилото поминало остра кривина, кога автомобил што доаѓал од спротивната насока преминал во спротивната лента.
Возачот се обидел да го избегне судирот, но не успеал, а двете возила завршиле во канал од патот на спротивните страни.
Карабинерите во моментов ги истражуваат околностите на несреќата.
Фото: принтскрин
Свет
Трамп: Не ми е дозволено да се кандидирам за трет мандат, што е тажно
Американскиот претседател Доналд Трамп денес изјави дека не му е дозволено да се кандидира за трет мандат признавајќи ги ограничувањата утврдени во Уставот на САД, објави АФП.
Трамп и неговите поддржувачи постојано го иницираат прашањето за кандидатурата на 79-годишниот лидер во 2028 година, што предизвика загриженост кај неговите противници и радост кај поддржувачите, забележува агенцијата.
„Имам највисок рејтинг на одобрување досега и, знаете, врз основа на она што го читам, претпоставувам дека не ми е дозволено да се кандидирам, па ќе видиме што ќе се случи… Тоа е многу жално“, рече Трамп во авионот „ер форс уан“.
Уставот на САД ги ограничува претседателите на два мандата, а Трамп го почна својот втор мандат во јануари.
Трамп честопати забележуваше дека неговите поддржувачи го поттикнуваат да владее и по сегашниот мандат и покрај уставните ограничувања. Неодамна дури и ги покажа познатите црвени капи во Овалната соба, но со зборовите „Трамп 2028“ напишани на нив.
Обновените разговори за трет мандат доаѓаат откако Стив Бенон, поранешниот главен стратег на Трамп и клучен идеолог на неговото движење „Да ја направиме Америка повторно голема“, минатата недела изјави дека постои план претседателот да остане во Белата куќа.
„Тој ќе има трет мандат… Трамп ќе биде претседател во 2028 година. И луѓето, едноставно, ќе мора да го прифатат тоа“, изјави Банон за „Економист“.
Запрашан за 22. амандман, кој го ограничува бројот на мандати, Банон рече: „Постојат многу алтернативи. Во соодветно време ние ќе го изложиме планот“.
Свет
Саркози под закана и зад решетки: затворениците сакаат одмазда за Гадафи
Поранешниот француски претседател Никола Саркози, кој моментно издржува затворска казна, продолжува симболично да ја претставува својата земја – дури и зад решетки. Како што објави порталот „Атлантико“, неодамнешните закани од одредени затвореници за одмазда за Моамер Гадафи покажуваат колку е длабок јазот помеѓу француското општество и дел од мигрантското население.
Според анализата на француските новинари, случајот открива отворен презир кон државата што примила многу од овие луѓе и им обезбедила нов живот. „Постои јасна врска помеѓу фактот дека криминалецот не ги признава законите на земјата што го посвоила и фактот дека покажува поголема лојалност кон либискиот диктатор Моамер Гадафи отколку кон поранешниот шеф на француската држава“, наведува „Атлантико“.
Авторите на текстот предупредуваат дека станува збор за поширок проблем – отфрлање на француските вредности и правила како наводна форма на потчинување, а колонијалното минато се користи како постојан изговор за одбивање интеграцијата и повикување на одмазда.
„Би било погрешно да се минимизира значењето на она што се случува“, истакнуваат француските коментатори заклучувајќи дека овој случај е само еден во низата индикатори за длабока криза на идентитетот и социјалната кохезија во современа Франција.
Фото: принтскрин

