Македонија
Клиниката „Жан Митрев“ повторно ја претставува Македонија на меѓународната сцена во Walking Football

Екипата на Клиника „Жан Митрев“ продолжува активно и достојно да ја промовира Македонија и здравиот начин на живот преку учество на меѓународни турнири во Шутбал – Walking Football, спорт кој бележи сè поголема експанзија ширум светот.
По успешниот настап на меѓународниот турнир на островот Вис во Хрватска, каде тимот се натпреваруваше со екипи од Хрватска, Австрија и Унгарија, екипата на Клиника Жан Митрев ќе учествува на уште еден голем турнир. Овојпат, тимот ќе настапи на меѓународниот турнир во Walking Football што ќе се одржи во Будимпешта на 11, 12 и 13 јули 2025 година.
На турнирот во Будимпешта ќе учествуваат осум екипи од шест земји: Унгарија, Австрија, Англија, Израел, Италија и Македонија. Натпреварувањата ќе се одвиваат во две возрасни категории – екипи над 50 години и екипи над 60 години. Екипата на Клиника Жан Митрев ќе се натпреварува во категоријата над 50 години, каде ќе игра во група со екипите од Унгарија, Англија и Италија. Предвидени се три натпревари со секој противник во групата, како и дополнителни елиминациски дуели.
Walking Football е повеќе од спорт – тој претставува нова можност за луѓето од сите возрасти да останат физички активни, да се дружат и да се грижат за своето здравје. Според правилата на овој спорт, трчањето е забрането, се игра со одење, а акцентот е ставен на рекреација, тимска игра и социјализација. Ова го прави идеален избор за повозрасни лица, пациенти во рехабилитација, хронично болни, дијабетичари, хендикепирани лица, како и за сите кои сакаат да водат активен и здрав животен стил.
Клиника Жан Митрев како основоположник на Walking Football во Македонија ја продолжува својата мисија за ширење на овој спорт и најавува организација на голем меѓународен турнир во нашата земја во блиска иднина. Со ова, Клиниката има јасна визија да создаде движење кое ќе го негува спортот, здравјето и активниот животен стил, без разлика на возраста, со цел Walking Football да стане достапен за пошироката јавност и да се поттикне изградба на заедница која живее здраво и активно.
ПР
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски за Арсовска: За неа многу работи се кажани, немам што да додадам

Државата има институции, ги повикувам да постапуваат за случајот, рече денеска премиерот Христијан Мицкоски во врска со вчерашните обвинувања на скопската градоначалничка Данела Арсовска.
-Што се однесува за градоначалничката на Скопје, многу работи се кажани, не би имал што да додадам, одговори кусо Мицкоски на новинарско прашање по пуштањето во употреба на целосната санација на Музејот на вода во Заливот на Коските во Охрид.
Арсовска вчера информира дека при увид и инспекциска контрола на дивоградба во Општината Чаир, била нападната, прво вербално, а потоа и физички, пред припадници на МВР.
Синоќа, министерот за внатрешни работи Панче Тошковски рече дека во нападот имало физички контакт, но, дека е лага и повторен обид за манипулација на јавноста тврдењето оти тоа се случувало пред припадници на МВР.
Градоначалничката Данела Арсовска вчера се огласи преку социјалните мрежи, откако излезе од полициската станица, по нападот врз неа.
Ќе пријавувате насилници сто пати, никој нема да реагира и на крај ќе ве утепаат. Затоа не сме држава. Затоа МВР функционира во одбрана на криминалци, МВР функционира да ги брани оние кои тепаат по улици, можеби се плашат од нив, ако се плашите, Тошковски ако се плашиш бе момче дај си оставка, оди си, дај некој што е храбар, што има срце, душа нека оди таму да се справува со овие луѓе. Криминалци ли ќе ни ја водат државата. Треба ли да се плашиме да излеземе од дома. Не се срамите од ова што го правите?“, праша Арсовска.
Македонија
ФЗО ќе покрива шест, наместо досегашните три ин витра за семејствата кои се обидуваат да имаат потомство

Вкупно шест наместо три обиди за биомедицинско потпомогнато оплодување (БПО) ќе бидат овозможени на товор на Фондот за здравствено осигурување (ФЗО) за семејствата кои се обидуваат да имаат потомство. Ова, како што соопштија денеска генералните директори на Фондот Сашо Клековски и Бранко Аџигогов е една од законските измени усвоени на 10 јули годинава во Собранието.
– Измените предвидуваат вклучување на БПО во основниот пакет на здравствени услуги, зголемување на шест наместо три обиди за БПО на товар на Фондот и усогласување на ослободувањето од партиципација, истакна Клековски.
Дополнително, рече, Фондот го скрати времето на одлучување од три месеци на две недели.
– Фондот го дигитализираше процесот во оваа фаза кон барателите, вклучувајќи го ваучерот за БПО, но и поедностави дел од адиминистратицниот процес, потенцира Клековски.
Новина е, информираа директорите, и тоа што се олеснува лекувањето во странство.
– Се применуваат препораките од Државниот завод за ревизија. Второстепената комисија ќе одлучува само по жалби, не повеќе и по мислење на Првостепената комсија со што се скратува процесот и обезбедеува двостепеност. Рокот за одлучување се скратува од 45 на 30 дена, а се брише и склучување договори со странски болници поради неприменливост, нагласи Клековски.
Според ФЗО, се поголем број брачни парови и поединци се соочуваат со проблеми при зачнување, а успешноста на третманот често се зголемува со зголемениот број обиди.
Македонија
За нова лична карта, возачка дозвола и пасош граѓаните можат да закажат онлајн

Министерството за дигитална трансформација информира дека електронската апликација за закажување термин за издавање лични документи повторно е достапна преку националниот портал за е-услуги uslugi.gov.mk.
-Граѓаните сега можат брзо и лесно, без чекање и без гужви да закажат термин за следните услуги: издавање лична карта, издавање пасош и издавање возачка дозвола. Процедурата е едноставна и достапна од кој било електронски уред, наведува Министерството.
Воедно додава дека со оваа иницијатива продолжува мисијата да ја дигитализира јавната администрација и да обезбеди поквалитетни, побрзи и поефикасни услуги за сите граѓани.