Македонија
Советот на Карпош апелира до Владата да ја преиспита одлуката за одземање на салата „Партизан“

Со целосна поддршка на советниците од СДСМ, Левица, ГРОМ, и Независни за Карпош, претседателот на Советот на општина Карпош, Бранко Ристов, денеска одржа прес – конференција на која ги информираше медиумите, за заедничкиот став на мнозинството советници во врска со неодамнешната одлука на Владата за одземање на спортската сала „Партизан“ која досега беше во владение на локалната самоуправа.
„Како советници, а посебно јас како претседател на Советот на Општина Карпош чувствуваме обврска да ги информираме карпошани и целата македонска јавност, дека ги отфрламе причините за одземање на салата како и обвинувањата од страна на министерот за спорт кон Општина Карпош како невистинити и неосновани. Особено ги отфрламе обидите целата ситуација да се сведе на ПР-препукување помеѓу членови на владата и градоначалникот Јакимовски. Уште од самото примопредавање на спортската сала „Наум Наумовски – Борче“, ние советниците бевме континуирано информирани од страна на општинската администрација и градоначалникот, за состојбата вклучително и за недостатоците во која е примопредадена салата од страна на Агенцијата за спорт“, објасни Ристов.
Тој посочи дека општинскиот Совет е добро запознаен со целата ситуација уште од самиот почеток, кога Агенцијата за млади и спорт ветувала дека спортскиот објект ќе биде завршен во целост, при што ќе бидат отстранети сите недостатоци и ќе биде набавена соодветна спортска опрема.
„На седница на Седница на совет на 27 септември 2024 година, градоначалникот детално не информира за состојбата во салата и за обидите да стапи во контакт со министерот за спорт, Борко Ристовски. Притоа, сакам да напоменам дека ние како Совет имаме целосно разбирање дека е можно, министерството да нема предвидено или нема доволно средства за довршување на овој објект, и затоа обидите за средба со министерот за спорт беа во насока да се види што може министерството да направи, а што да преземе локалната самоуправа. Како Совет сметаме дека најефикасен начин за остварување на интересите на граѓаните е соработка помеѓу локалната и централната власт. Впрочем тоа е вистинскиот пат на решавање на проблеми меѓу две одговорни институции задолжени од народот да ја водат државата и локалната самоуправа“, истакна претседателот на Совет, Бранко Ристов.
Првиот човек на општинскиот Совет обелодени пред јавноста, дека токму поради молкот од Министерството за спорт за да биде ставена во функција салата „Партизан“, Советот на Општина Карпош одобри финансиски средства за набавка на дел од потребната опрема.
„Во таа насока беше задолжен Секторот за комунално уредување, хортикултурно да го уреди дворот и да постави хидрантска мрежа, додека пак Одделението за енергетска ефикасност да постави штедливо ЛЕД – осветлување во рамки на објектот. Морам да признаам дека целосно сме изненадени од одлуката на Владата да ја одземе салата, со образложение дека наводно ние истата не сме ја ставиле во функција. Со должна почит кон министерот, меѓутоа тој работејќи под погрешни информации ја има доведено Владата во заблуда по што е донесена погрешна одлука“, коментираше Ристов.
Тој беше концизен дека на јавноста и се достапни видео и аудио снимки, во кои може да се воочи дека култната сала „Партизан“ е веќе ставена во употреба.
„Во истиот наводно нефункционален објект, се одигруваат училишните спортски игри во одбојка и во кошарка. Јавни се видео записите каде што во април годинава, градоначалникот Јакимовски ги доделува победничките пехари и од име на Советот ги прогласува и наградува најдобрите учесници со заслужен одмор во Грција. Во меѓувреме, стрелиштето кое се наоѓа во објектов е дадено на користење без надомест на Македонската Стрелачката Федерација и истата инвестира над 150 илјади евра, каде во континуитет се одвиваат тренинзи на оваа Федерација. Со Меѓународниот Олимписки Комитет е договорено токму во оваа сала од 20 до 26 јули да се одвиваат натпреварите во одбојка и пинг-понг на Младинските Олимписки Игри, а целосна логистика на овој настан даваат Одделението за спорт и Секторот за поддршка на градоначалникот. Во исто време тече конкурсот за сите заинтересирани правни и физички лица кои сакаат да го користат овој објект за спорт и рекреација“, образложи Ристов.
Тој потенцираше дека е важно да се напомене оти на одлуката на Македонската Владата да се одземе оваа спортска сала, енергично се спротивставуваат советничките групи на СДСМ, Левица, ГРОМ и на Независните за Карпош, освен советниците од ВМРО-ДПМНЕ, за кои тој лично чувствува дека и тие самите биле затекнати од оваа неочекувана одлука.
„Практично сите сме обединети во одбрана на салата „Наум Наумовски –Борче“. Очекуваме претседателот на Владата господинот Мицкоски и министрите да ја преиспитаат одлуката. Доколку не го сторат тоа, Советот на Општина Карпош ги задолжи службите и градоначалникот да ги искористат сите правни лекови што ни стојат на располагање да ја поништиме оваа одлука на Владата“, наведе Бранко Ристов.
За крај, претседателот на Советот на Општина Карпош уште еднаш упати повик до Премиерот и до Владата на Република Македонија, да донесат разумна одлука која ќе биде во корист на сите карпошани.
„Господине Мицкоски, секоја чест на Владата, разбирам дека од разни причини сте замерени со градоначалникот Јакимовски, но ние од Советот на Општината очекуваме разум и преиспитување на оваа одлука. Ви се ставам на располагање во име на Советот за мирно изнаоѓање на заедничко решение кое ќе биде во интерес на граѓаните на општина Карпош. Бидете убедени дека Советот и Општината, без оглед кој ќе биде во иднина на нејзино чело, како за училиштата и градинките, ќе се грижи и ќе го унапредува и овој објект кој ќе го ставиме на располагање на граѓаните на Карпош а нам ни е посебно чест што го имаме заради неговите архитектонски вредности, функционалност и посебно што го носи името на македонскиот херој, Наум Наумовски – Борче. Ве молиме да бидеме одговорни и заедно да не дозволиме, на ваков начин да му се оддолжуваме на нашиот народен херој“, додаде Ристов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Паднати дрвја, настрешници и покриви, оштетени моторни возила и скинати кабли на ЕВН по вчерашното невреме во Скопје

Вчерашното невреме што го зафати Скопје предизвика бројни проблеми и материјални штети во различни делови на градот. На бројот за итни повици 112 беа пријавени паднати дрвја, оштетени моторни возила, скинати кабли на ЕВН, настрешници и кровови, како и други материјални оштетувања на приватна сопственост.
Најголем дел од пријавите се однесуваат на улиците Теодосиј Гологанов, Париска, Никола Русински, Димитар Туриманџовски, Ѓорче Петров, Самоилова, Струма, Варшавска, Методија Митевски, Ацо Шопов, Лука Геров и бројни други делови од градот, како и населбите Топаана, Бутел, Козле, Сопиште и Виниче. На булеварот „Партизански одреди“ паднало дрво врз повеќе паркирани возила, а на ул. Драгиша Мишовиќ, во дворот на градинката „Орце Николов“, дрво се урнало врз автомобил.
Неколку локации пријавиле и паднати или навалени бандери, скинати жици под напон и искрење, што претставува сериозна опасност за граѓаните. На ул. Шар Планина и ул. Лука Геров се забележани искрења на електрични кабли на ЕВН, а во Шишево и кај православните гробишта паднати бандери го блокирале движењето и создавале ризик од струјен удар.
Оштетувања биле забележани и на кровови на приватни објекти, настрешници, контејнери и семафори, додека во некои случаи дрвата паднале врз јавни и административни објекти, како Драмскиот факултет и Министерството за труд и социјална политика.
Надлежните служби интервенираат по приоритет, со цел безбедно отстранување на паднатите дрвја, обезбедување на оштетените кабли и враќање на нормалното функционирање на улиците. Граѓаните се предупредуваат да ги избегнуваат опасните локации и да се придржуваат до инструкциите на надлежните служби.
Македонија
Денес пак дожд, грмежи и умерен северозападен ветер

Времето во Македонија денеска ќе биде променливо облачно, претпладне со локален дожд и грмежи претежно во источните делови. Ќе дува умерен повремено засилен западен, а во источните делови северозападен ветер.
Во Скопје, променливо облачно, во раните претпладневни часови со услови за повремен дожд. Ќе дува умерен северозападен ветер.
Утре времето ќе биде сончево со мала до умерена облачност и температури до 35 Целзиусови степени. Ќе дува слаб до умерен ветер од северoзападен правец.
Скопје
(Видео) Храбри полицајци гаснеа пожар во Бутел и завршија во болница, Костовски најави награда

Двајца полицајци од полициската станица Бутел денеска покажаа вистински херојство откако ги ризикуваа свои животи за да помогнат во гасењето на пожар кој се закануваше на детска градинка и училиште во општината. Дарко Стајковски и приправникот Филип Стојчевски, при интервенцијата вдишале јаглерод моноксид, поради што се пренесени на Клиниката за токсикологија во Скопје.
За среќа, лекарите потврдуваат дека нивната здравствена состојба е стабилна и дека се под постојан медицински надзор.
Градоначалникот на Бутел, Дарко Костовски, ја поздрави нивната храброст и најави дека општината ќе ги награди.
„Секоја чест за Дарко и Филип! Ова е вистински пример за пожртвуваност и љубов кон заедницата. Благодарение на нивната брза реакција спречена е голема трагедија и спасени се животи. Општината Бутел ќе се погрижи нивниот чин да не остане незабележан“, изјави Костовски.
Во гаснењето на пожарот учествуваа и други екипи, за кои градоначалникот додаде дека исто така ќе бидат соодветно наградени.