Со новоиздадената обврзница од 270 милиони евра, обезбедени се средствата за финансирање на сите капитални проекти и потреби во Буџетот, како и за продолжување со стабилните текови и стабилната реализација на Буџетот, рече во вторникот вицепремиерот и министер за финансии Зоран Ставрески по повод денешното издавањето на македонеската еврообврзница во споменатиот износ.

Еврообврзницата е издадена на износ од 270 милиони евра со рок на враќање од пет години и каматна стапка од 4,875 отсто, односно стапка на принос од 5,125 отсто. Трансакцијата е реализирана во соработка со „Сити банк“, „Дојче банк“ и „Ерсте банк“

Значајно за граѓаните е, истакна Ставрески на прес-конференцијата во владата попладнево, што годинава на политичка криза и неизвесности, што економијата останува да биде „единствената светла точка во државата“, и додаде дека Владата нема да дозволи во овој сегмент да има никакви нарушувања.

„Сите граѓани, сите стопанственици, сите оние коишто добиваат средства од Буџетот, сите фирми коишто работат на реализација на проекти, треба да знаат дека се обезбедени средства за непречено извршување на обврските на Буџетот и оти во 2016 година ќе има стабилна економска година и ќе има добра ликвидност на Буџетот, што значи дела ќе бидат реализирани сите предвидени проекти, вклучително и проектите како што се изградбата на патиштата, болници, реализација на субвенции, спортски сали, градинки и се што се финансира од Буџетот“, рече вицепремиерот и министер за финанси Ставрески.

Истакна притоа дека ВМРО-ДПМНЕ и владата што ја предводи владејачката партија сериозно пристапуваат кон изработка на Буџетот и обезбедувањето средства за негово финансирање.

Ставрески порача дека граѓаните треба да бидат спокојни дека “додека одлучува ВМРО-ДПМНЕ за буџетската политика и за потребите што треба да се финансираат од Буџетот“, ќе има доволно средства за сите проекти што се предвидени во 2016 година. Посочи притоа дека за следната година се очекуваат рекордно високо ниво на инвестиции, како и високи износи за субвенции, за средства за рурален развој, за изградба на училишта, болници…

Министерот за финансии забележа дека актуелната Влада мора да ги враќа и обврските што ги направила претходната влада, односно владата што во 2005 година издала 10-годишна еврообврзница која доспева на 8-ми декември во износ од 150 милиони евра.

„Ние мора да ја вратиме таа обврзница и Македонија мора сериозно да се однесува кон обврските независно дали ги направила влада на СДСМ или влада на ВМРО-ДПМНЕ. Таа обврзница беше планирана и претходно, и најголем дел од средствата се обезбедени со претходната обврзница што во 2014 година беше издадена, а еден помал дел ќе биде дополнет со средствата од оваа нова еврообврзница. На тој начин ќе ги исплатиме обврските што ни ги оставила владата на СДСМ и не сакаме да го политизираме ова прашање. Сметаме дека тоа е нормален начин на функционирање на една држава, истакна министерот за финансии“, појасни Ставрески.

Според него, побарувачката од инвеститорите за македонската обврзница била два ипол пати повисока и достигнала 632 милиони евра. Запишана е од над 100 инвеститори, од коишто најголем дел се од Европа и САД, како и од други земји. Меѓу инвеститорите се најпознати инвестициски банки во светот, пензиски фондови, осигурителни компании и еквити фондови.

Одговарајќи на новинарски прашања Ставрески рече дека издавањето на еврообврзницата било планирано на износ до 500 милиони евра и до 10 години рок на отплата.

„ Во одлуката на Владата наведено е дека задолжувањето смее да изнесува до 500 миолиони и до 10 години. Во изминатиот период имавме средби со повеќе од 50 банки кои сметаат дека на економски план индикаторите на земјата се одлични и многу подобри од тоа што инвеститорите го слушнале при посетата на земјите во регионот, кои имаат полоши економски перформанси. Но, од друга страна, изразуваат загриженост за политичката ситуација во земјата, и тоа е причина зошто привремено трошоците на македонската еврообврзницата и на постоечката којашто се тргува, беа повисоки отколку што заслужуваме како држава“, одговори Ставрески.

Процена во Владата е дека со помал износ треба да се надмине овој период додека се поизразени поилитичките процеси и политичките ризици и натаму да може да се добијат подобри услови, појасни министерот за финансии./крај/мф/ап

Извор: Макфакс