Хелсиншкиот комитет за човекови права изразува сериозна загриженост и го осудува националистичкото и политизирано скандирање за време на фудбалскиот натпревар меѓу ФК Шкендија и Карабах, кој се одигра вчера во Националната арена „Тодор Проески“ во Скопје.

„И покрај апелите од јавноста и институциите за фер и спортско навивање, од трибините се слушнаа повици за „Голема Албанија“, „Чамерија“ и „Илирида“ пораки кои се далеку од манифестирање на спортски дух и придонесуваат за поттикнување меѓуетнички поделби, ја нарушуваат меѓуетничката кохезија, а имаат потенцијал да предизвика и злосторства од омраза“, велат од Хелсиншкиот комитет.

Дополнително, велат од таму, загрижувачки е фактот што ваквите извици не доаѓале само од навивачката група „Балисти“, туку биле извикувани од дел од публиката и тоа во присуство на високи државни функционери.

Како што велат од Хелсиншки, на натпреварот присуствувале, претседателот на Собранието, Африм Гаши, вицепремиерот Изет Меџити министерот за економија, Валон Дурмиши, како и партиските лидери Али Ахмети и Арбен Таравари.

„И повторно ниту еден од овие високи функционери, за време на натпреварот не реагирал по повод навредувачките скандирања“, се наведува во соопштението.

Според Хелсиншкиот комитет, особено е дискутабилна изјавата на претседателот на Собранието, кој од една страна вели дека не ги слушнал повиците додека бил присутен на натпреварот, а од друга страна јавно им честитал на навивачите нарекувајќи ги „достоинствен пример за националните вредности“.

„Овие контрадикторни ставови испраќаат опасна порака за толеранција на говорот на омраза и политичко навивање на спортски терени. Осудата на говорот на омраза од страна на политичарите е еден од клучните фактори против ширењето на оваа појава бидејќи говорот на омраза произведува уште повеќе говор на омраза, а има потенцијал да предизвика и злосторства од омраза“, се наведува во соопштението.

Хелсиншкиот комитет апелира до Министерството за внатрешни работи и надлежните институции итно да постапат во согласност со најавените мерки за санкционирање на ваквите испади. Според нив, селективната примена на законите, во зависност од етничката или политичката припадност на сторителите е неприфатлива и дополнително ја нарушува довербата на граѓаните во институциите.

„Спортските натпревари мора да бидат место на взаемно почитување, фер игра и градење на соживот. За говорот на омраза и националистичките пораки нема место ниту на трибините, ниту во јавниот дискурс“, велат од Хелсиншкиот комитет.

Град Скопје информира дека во рамки на постапката за изработка на новиот Генерален урбанистички план ГУП 2022–2032 година организира Јавна дискусија со цел вклучување на граѓаните во процесот на планирање и уредување на просторот.

Јавната дискусија за четвртите лоцирани во Општина Ѓорче Петров ќе се одржи на 12 август 2025 година со почеток во 9 часот во салата на Град Скопје барака 13 и тоа за Градска четврт СЗ 01 (од 9 до 10 часот), C3 02 (од 10 до 11 часот), C3 03 (од 11 до 12 часот), C3 06 (од 12 до 13 часот) и C3 07 (од 13 до 14 часот).

„Граници на опфат на Градска четврт СЗ 01:
– од запад и север: по граница на ГУП на град Скопје;
– од исток: по оска на Бул “Илинден“;
– од југоисток: по оска на улица “Тиранска“;
– од југозапад: по оска на улица “Шарпланинска“;

Граници на опфат на Градска четврт СЗ 02:
– од запад и северозапад: по оска на Бул “Илинден“;
– од исток: по граница на ГУП на град Скопје;
– од југ и југоисток по оска на улица “Новопланирана собирна улица 15“.

Граници на опфат на Градска четврт СЗ 03:
– од североисток: по граница на ГУП на град Скопје;
– од југоисток: по оска на улица “Тиранска“;
– од запад и југозапад: по оска на улица “Лука Геров“.

Граници на опфат на Градска четврт СЗ 06:
– од северозапад: по оска на улица “Новопланирана собирна улица 15“;
– од исток: по оска на Бул “Илинден“;
– од југоисток: по оска на улица “Лепенец“;
– од југозапад: по оска на улица “Лука Ѓеров“.

Граници на опфат на Градска четврт СЗ 07:
– од север: по оска на улица “Новопланирана собирна улица 15“;
– од исток: по оска на река вардар, односно по граница на ГУП на град Скопје;
– од југоисток: по оска на улица “Словенечка“;
– од југозапад: по оска на Бул “Илинден“.

Граѓаните можат да дадат свои предлози мислења и забелешки за време на јавната дискусија а истите можат да ги достават и писмено во архивата на Град Скопје барака 16 или електронски на адресата [email protected]“.

Град Скопје ги повикува сите заинтересирани граѓани и претставници на заедницата активно да се вклучат во овој процес од јавен интерес.

Последните податоци се алармантни, откако ВМРО-ДПМНЕ ја презеде власта во 2024 година, бројот на вработени лица во државата е намален за над 17.000 луѓе, истакна на прес-конференција Јовица Јанковиќ од СДСМ.

Ова, како што рече, не е само статистика. Ова, според него, е вистината зад илјадници човечки судбини, намален број работни места, заминати млади, уништени надежи, растечка сиромаштија.

„Ова е доказ за економскиот колапс, за хаосот на пазарот на труд, за целосната отуѓеност на власта од реалноста во која живее народот.

Младите во Македонија спасот го гледаат надвор, бројот на вработени намален за 17.000.

Младите во Македонија денес ја плаќаат највисоката цена за неспособноста и ароганцијата на Владата на Христијан Мицкоски.

Пазарот на труд се стеснува, продуктивното население а пред се младите заминуваат, а пензискиот систем е ставен под ризик“.

Наместо да креира услови за нови и добро платени работни места, за задржување на младите, Владата додава тој, со својата ароганција одбива секаков предлог за зголемување на минималната плата и стимулирање на раст на платите.

Младите заминуваат, истакнува Јанковиќ, граѓаните едвај врзуваат крај со крај, а приоритетите на оваа власт се манго, папаја, луксузни патувања и тендери за блиски фирми.

„Секое трето дете во државата живее во сиромаштија. Половина милион граѓани живеат со плата под просечната.

Што направи Христијан Мицкоски за да им обезбеди подобри услови на овие луѓе? Што направи за младите да останат тука и да создаваат семејства, иднина, живот со достоинство?

Оперативниот план на Владата е само фасада и не е решение, со ограничен домет и краткорочен ефект за многу мал дел од невработените.

Проблемот е длабок и системски. Младите не гледаат перспектива со ВМРО-ДПМНЕ. Со години ги бројат парите од месец за месец и сè почесто го гледаат спасот надвор од Македонија.

Проблемот не се решава со партиски вработувања во администрација туку се продлабочува“.

СДСМ предупредува: ако не се смени курсот, ако не се застане веднаш со овие штетни политики – Македонија ја чека уште подлабока економска и социјална криза.