Француската полиција уапси две лица осомничени за кражба на непроценливи крунски драгоцености од музејот Лувр, извршена на 18 октомври. Истрагата за „организирана кражба“ ја водат Париската бригада за сузбивање на разбојништва (BRB) и Централната канцеларија за борба против трговијата со културни добра (OCBC), објави Ле Паризијен.

Осомничените, двајца мажи на возраст околу 30 години од департманот Сена-Сен-Дени, наводно биле дел од четворочлена група која провалила во галеријата „Аполон“, каде се изложени драгоцености на француската круна, меѓу кои и накитот на царицата Евгенија.

Според Телеграф, детективите утврдиле дека се работи за кражба со помош од внатре, бидејќи еден од чуварите бил во контакт со крадците пред нападот.

„Постои дигитален доказ кој покажува дека чувар на музејот соработувал со крадците и им дал информации за безбедносниот систем“, изјавил извор близок до истрагата.

Директорката на музејот, Лоренс де Кар потврдила дека ниедна камера не го надгледувала балконот преку кој провалниците влегле:

„За жал, од страната на галеријата Аполон единствената камера е насочена кон запад и не го покрива балконот погоден од провалата“, изјавила таа.

Париската обвинителка Лор Бекo потврдила дека се земени повеќе од 150 ДНК и папиларни траги. Дел од преостанатите експонати се пренесени во трезорот на Банката на Франција, а истрагата ја следи и израелската фирма „ЦГИ Груп“, позната по решавањето на кражбата во Дрезден.

„Очигледно сакаме што побрзо да ги уапсиме сторителите и да го вратиме накитот пред да биде растопен. Ги стражуваме сите можности“, изјавила Беко.

Фото: Пиксбај

Полицаецот Кевин Боларо од градот Френклин Тауншип е обвинет за недолично однесување и злоупотреба на службена должност, откако наместо да реагира на пријава за пукање, што подоцна се покажало како двојно убиство, застанал на банкомат и во пицерија.

Како што пишува Гардијан, според обвинителството, „ГПС“ податоците и снимките од камерите покажуваат дека Боларо на 1 август возел во спротивна насока од местото на настанот и потоа поминал речиси два часа во два локални ресторани.

Следниот ден, во куќа на околу 180 метри од првичната пријава, биле пронајдени телата на Лорен Семанчик (33) и Тајлер Веб (29), кои, според истрагата, ги застрелал поручникот на државната полиција Рикардо Сантос, а потоа извршил самоубиство.

Обвинителството го товари Боларо дека свесно ги избегнал службените обврски и потоа лажно го прикажал својот извештај, тврдејќи дека бил на терен во време кога бил на пат кон пицеријата.

Неговиот адвокат Чарлс Скиара за Њујорк пост изјавил дека обвиненијата се несреќни, додавајќи: „Ништо што Кевин Боларо направил или не направил тој ден не влијаело, ниту можело да ги спречи убиствата.“

Од друга страна, семејствата на жртвите за „ВАБЦ-ТВ“ изјавиле дека се шокирани од однесувањето на Боларо и веруваат дека тоа е врвот на ледениот брег во серијата пропусти на полицијата.

Боларо треба да се појави пред суд на 5 ноември.

Пред неколку дена, се случи инцидент во основно училиште во Загреб. Средношколец донел гасен пиштол и им го покажал на другите ученици за време на одморот. Се вели дека станува збор за предизвик на „Тик-ток“ каде што децата се охрабруваат да донесат најчудната работа во училиште и да ги снимаат реакциите на своите пријатели, пренесе хрватски „Индекс“.

Сè беше потврдено од директорот на училиштето.

„Го зедовме тој гасен пиштол, контактиравме со полицијата, полицијата беше таму многу брзо. Ги направивме сите потребни процедури тој ден, а продолживме и следниот ден. Разговаравме многу со учениците, разговаравме многу со родителите и едни со други“, изјави за „ХРТ“, Марио Кеча, директор на основното училиште „Ксавер Шандор Ѓалски“.

Момчето веднаш беше отстрането од училница, а неговата мајка беше повикана во училиште. Полицијата, исто така, го објави инцидентот.

„По кривичната истрага, против малолетникот ќе биде поднесена обвинение на редовен начин за прекршување на Законот за стекнување и поседување оружје од страна на граѓаните со известување до надлежната регионална канцеларија на Хрватскиот институт за социјална работа“, се вели во соопштението на Управата на полицијата во Загреб. Иако гасниот пиштол не е смртоносно оружје, законот во Хрватска (како и во повеќето европски земји) го третира како огнено оружје кога се поседува или се користи без дозвола.

Експерти: Децата и младите не се свесни за сериозноста на овие последици

Предизвиците на социјалните мрежи се сè поопасни.

„Децата и младите не разбираат и не се свесни за сериозноста на овие последици, туку се вклучуваат во нив првенствено поради нивната потреба за чувство на припадност, за чувство на прифаќање меѓу своите врсници“, вели Теа Чичиќ, социјален работник од Центарот за побезбеден интернет.

„Во овие предизвици, примамливо е дека тие најмногу ќе се издвојат од својата генерација, дека ќе бидат лидери, дека ќе бидат влијателни, дека околината ќе ги восхитува. Тој проблем доаѓа од недостатокот на внимание таму каде што треба да биде“, вели Марко Гулан, експерт за кибернетика.

И тоа е само една од стапиците на предизвиците на социјалните мрежи, истакнуваат експертите.

„Денес, младите имаат многу поголемо влијание врз своите врсници, социјалните мрежи и интернетот. Ако нема стручно лице или родители кои играат клучна улога, учениците, за жал, преземаат ризични однесувања“, истакнува Тјаша Јураковиќ Антолиќ, педагог од Основното училиште Средишќе.

За да се избегне ова, предупредуваат експертите, потребно е што почесто да се разговара со децата за дигиталниот свет.

„Важно е на почетокот да се пристапи кон тоа сосема отворено, транспарентно и јасно да му се објасни на детето што точно нè загрижува, но и да се праша детето што му се допаѓа на тие социјални мрежи“, вели Теа Чичиќ.

„Големиот проблем е таа либерализација во која на децата всушност им се дава таа слобода, децата ќе го прават тоа подобро од нас. Децата можеби ќе сакаат подобро да ја познаваат технологијата, но нема да разберат подобро од нас во што е проблемот и каква е опасноста за нив“, вели Марко Гулан.