„Двојните аршини на Левица излегоа на виделина. Раководството на Левица го покажа вистинското лице и се разобличи пред целокупната јавност. Заврши глумата на Апасиев, Мојсоска, Мециновиќ, Крмов и Исмаил, кои си инкасирале во своите џебови над 2 милиони денари од Левица“, соопшти ВМРО-ДПМНЕ.

„Нема повеќе глумење на сиромашни револуционери со полни џебови. Маските паднаа. Левица повеќе не може да се крие зад евтини фрази, глумење скромност и идеологија додека позади камерите раководството ги полни личните трансакциски сметки од партиската каса.

Апасиев над 700 илјади денари ставил во сопствениот џеб од парите на партијата Левица, пари кои ги добива од граѓаните преку Буџетот на државата.

Мојсоска иако е пратеник само годинава од партијата инкасирала 3 пати по 54 000 денари.

Крмов, над 270 илјади денари од Левица пикнал во својот џеб.

Реџеп Исмаил исто така си инкасирал во свој џеб 300.000 денари од партиската каса.

Народот не е наивен, Левица не се бори за правда и еднаквост туку за личен бенефит и богатење на тесниот круг на раководството на партијата“, соопшти ВМРО-ДПМНЕ.

Феминистичкото движење за слобода и правда на жените, „Ниту eдна повеќе!“ најавува блокада која ќе се одржи денеска од 18 часот пред паркот „Жена Борец“ во Скопје.

„Се здружуваме за гласно и солидарно да зборуваме за еднаквост и живот без насилство. Движењето е резултат на нашиот гнев – затоа што жените во оваа држава не се заштитени – и нашиот страв за тоа уште колку жени живеат во насилство или под ризик од насилство, чии крици за помош се задушени секој ден. Но, истовремено е и резултат на нашата храброст и одлучност: наместо да се плашиме која ќе биде следна, тука сме да кажеме дека нема да има ниту една повеќе!

Целта ни е да изградиме заедништво и решително да покажеме дека не може да се продолжи како досега – да покажеме надеж за иднина без насилство, но и должна правда за сите жртви кои не беа навремено заштитени.

Со блокадата сакаме да дадеме насока во која сметаме дека треба да се движат промените, но уште поважно – да оставиме простор за секој граѓанин да ни се приклучи, да каже гласно што мисли, како се чувствува и што треба да се подобри во системот. Не се потребни ниту експертиза, ниту професионално искуство – доволни се животното искуство, тагата и гневот кои сите ги чувствуваме. Преку размена во јавен простор да го канализираме нашиот колективен гнев и заедно да дискутираме за решенија наспроти институциите кои ги загрозуваат нашите животи.

Делуваме во женска солидарност за да повикаме на одговорност и промена – законска, институционална и општествена за ниту една повеќе да не биде жртва. Ве повикуваме да ни се придружите и заедно да замислиме и изградиме поинаков свет – свет без насилство врз жени.“, се наведува во соопштението на движењето „Ниту една повеќе!“.

„Здружението на судии и обвинители зборуваат за се освен за суштинските проблеми во земјата. Ако со нивната гласност сакаат да изгледаат како бранители на правдата тогаш зошто нема конкретни чекори. Дали нема затоа што и тие се дел од проблемот и до кога ќе дозволуваат корупцијата да остане заштитена во систем кој треба да ги штити граѓаните“, прашува ВМРО-ДПМНЕ.

„Ова е невидено лицемерие, не штитат правда, туку корупција, што претставува директна кражба на довербата на граѓаните.

Ако сакаат правда време им е да почнат постапка. На пример, да почнат со Наќе Ѓорѓиев, врховен судија и претседател на Судски совет и Иџет Мемети, јавен обвинител и заменик претседател на Советот на јавни обвинители. Луѓе кои признаа дека имаат земено мито од 10.000 евра за влијание врз судски пресуди, па едниот се спогоди, другиот се стекна со условна осуда.

Ова е доказ за системот на СДС и ДУИ. И ова не е изолирана појава, туку е проблем кој произлегува од влијанието на СДС и ДУИ, го има и во другите институции.

Што сакаат да им порачаат на граѓаните? Дека високи функционери во судството и обвинителството можат да бидат вклучени во директна злоупотреба на своите функции?

Граѓаните гледаат, граѓаните не ги следат само високите случаи, кои имаат поголемо медиумско внимание. Граѓаните ова го знаат и од прва рака, на пример во основните судови.

Граѓаните ја гледаат неправдата која СДС и ДУИ сe уште им ја нанесува, па дури и од опозиција.

Па како очекуваат граѓаните да имаат доверба во правдата ако виновниците остануваат неказнети?

Ако за ова Здружението на судии и обвинители кои се само многу гласни, ама ако сакаат правда, време им е да почнат постапки за корумпираните колеги“, соопшти ВМРО-ДПМНЕ.