Иако во англиските медиуми тврдеа дека Ливерпул ќе го казни напаѓачот Уго Екитике со одземање на две недели плата (што би изнесувало околу 570 илјади евра) поради црвениот картон што го доби во Лига купот против Саутемптон, Арне Слот го негираше тоа.

Да ве потсетиме дека Екитике го заработи вториот жолт картон со соблекување на дресот откако го постигна голот за победа, заборавајќи дека веќе бил опоменат.

„Не доби казна. Она што го направи не беше многу паметно, но веднаш го препозна самиот и им се извини на соиграчите. Тој е млад, а играчите од сите возрасти прават грешки. Сите правиме грешки и во овој клуб ви е дозволено да направите грешка без веднаш да добиете казна“, рече тренерот на Ливерпул, Слот и продолжи:

„Тој е одличен човек и мислам дека секој член на персоналот би го рангирал меѓу тројцата најљубезни луѓе со кои работат. И дури и да не беше, му е дозволено да прави грешки.“

Екитике ќе го пропушти натпреварот од Премиер лигата оваа сабота против Кристал Палас поради црвен картон.

Во Реал Мадрид сметаат дека бруто платата од 25 милиони евра, што ја добива Давид Алаба (33), е прекумерна со оглед на неговата моментална улога во тимот. Австриецот, кој заработува 12,5 милиони евра нето, стана редовна замена која ретко добива шанса да игра, а неговиот договор, потпишан по неговото доаѓање од Баерн без надомест, сега се смета за застарен во однос на неговиот придонес на теренот, пишува „Дефенса Централ“.

Минатото лето, челниците на Реал се обидоа да најдат решение, но планот да го раскинат договорот со Австриецот им пропадна.

Му понудија исплата на половина од неговата плата и статус на слободен агент, но Алаба одби. Наместо тоа, тој одлучи да остане цела сезона, да ја добие целата сума и да се обиде да се бори за нова можност во клубот. Се надеваше дека тренерот Чаби Алонсо, со кого ја делеше соблекувалната во Баерн, ќе може да му даде минути.

Сепак, сега веќе нема никаква можност Давид Алаба да остане во клубот уште една сезона. Иако тоа беше негова желба, Реал не е подготвен да го задржи во тимот.

Трансферот не се исплатеше како што очекуваа. Неговата прва сезона беше многу добра, но потоа имаше пад на формата, што кулминираше со сериозна повреда на коленото.

Оваа информација ја потврди новинарката Родра во објава на социјалните мрежи: „Планот на Реал Мадрид е Давид Алаба да замине следната година. Ова е неговата последна сезона во клубот.“

И покрај сè, Реал е убеден дека постапил правилно кога го довел како слободен агент. Никој не можеше да ја предвиди сериозната повреда на коленото и компликациите што следеа, па затоа не жалат за трансферот. Високата плата е резултат на бонус за потпишување распределен во текот на годините од неговиот договор.

Останува помалку од една година до неговото заминување, и се очекува дека Алаба ќе помага на тренинзите со своето искуство и лидерски вештини. Сепак, на теренот, Чаби Алонсо веројатно нема да го користи премногу, освен во итни ситуации кога нема други алтернативи.

Фото/ Принтскрин

Англиските медиуми сè уште вадат цитати од од гостувањето на Вејн Руни во подкастот на поранешниот соиграч, Рио Фердинанд.

Поранешниот англиски напаѓач зборуваше за борбата со алкохолизмот додека сè уште беше активен играч и за неговиот комплициран однос со Немања Видиќ, но и за тоа зошто го претпочита Лионел Меси пред Кристијано Роналдо, иако Португалецот му беше соиграч во Манчестер Јунајтед.

Многумина мислат дека на овој начин Руни сака да му се освети на Кристијано поради неговите потези на Светското првенство во 2006 година, кога Португалецот бараше од судијата да му покаже црвен картон на Руни поради остриот старт врз Паулета.

„Луѓето мислат дека го мразам Роналдо. Но, го сакам. Мислам дека е апсолутен гениј и сè што прави е неверојатно. Го сакам Кристијано и обожавав да играм со него. Не мислам дека луѓето знаат колку сме блиски двајцата. Само затоа што мислам и велам дека, според мене, Меси е подобар од Роналдо, луѓето веруваат дека го мразам Кристијано“, рече Руни.

А кога станува збор за Аргентинецот…

„Апсолутно го обожавам Меси. Обожавам да го гледам како игра и тоа е единствената причина зошто мислам дека Лео има повеќе во однос на начинот на кој игра, како ги прави своите соиграчи подобри“, нагласи Вејн Руни.

Фото/ Принтскрин