Манчестер Сити го продолжи договорот на средниот играч Нико О’Рајли, соопшти клубот. Договорот со 20-годишниот фудбалер е продолжен до летото 2030 година.

„Никогаш нема да го заборавам овој ден. Во Сити сум од осумгодишен и да стигнам до првиот тим и да играм за него е остварување на сон. Потпишувањето на нов договор е навистина нешто посебно“, изјави О’Рајли.

„Многу сум горд на себе, како и мајка ми! Таа многу жртвуваше за да стигнам до позицијата на која сум сега, па радоста е и нејзина, исто како и моја“, додаде младата ѕвезда.

„Искрено, ова е само почеток. Има долг пат зад мене, но сакам да продолжам напред, да се усовршувам секој ден и да станам подобар играч. Тука, во Сити, под водство на Пеп, знам дека можам да го постигнам тоа. Ова е најдоброто место за еден фудбалер“, истакна О’Рајли.

„Сакам да им се заблагодарам на сите во академијата, на моите соиграчи, на Пеп, на тренерскиот тим и на навивачите на Сити, бидејќи без сите овие луѓе кои ме поддржуваа, ништо од ова не би било возможно“, додаде тој.

О’Рајли е производ на младинската школа на Манчестер Сити и има одиграно 27 натпревари за првиот тим на „граѓаните“, постигнувајќи пет голови и остварувајќи две асистенции.

Манчестер Јунајтед повторно разочара, овојпат со пораз од Брентфорд (3-1) во Лондон, во меч од шестото коло на Премиер – лигата. Херој на домаќините беше Бразилецот Игор Тијаго со два погодоци уште во првите 20 минути.

Јунајтед се врати во игра преку новајлијата Бењамин Шешко, кој го постигна дебитантскиот гол и намали на 2-1, но тоа беше максимумот што „црвените ѓаволи“ го покажаа. Во второто полувреме гостите доминираа, но најголемата шанса ја прокоцка капитенот Бруно Фернандеш, откако неговиот пенал го одбрани Каомин Келехер.

И покрај офанзивните измени на Рубен Аморим, Јунајтед не најде решение во нападот, а во длабокото судиско продолжение Матијас Јенсен ја запечати победата на Брентфорд.

Ова е нов тежок удар за Манчестер Јунајтед, кој и натаму ја разочарува својата навивачка армија со нестабилни настапи и порази.



Израел презема сè можни мерки, па дури и најдрастични, за да го спречи исфрлањето од УЕФА и ФИФА, пишува британски „Тајмс“. Реагираа и израелскиот премиер Бенјамин Нетанјаху и американскиот претседател Доналд Трамп.

Според наводите на Times, премиерот Нетанјаху лично телефонски разговарал со фудбалски функционери од УЕФА и ФИФА за да спречи забрана за учество на Израел во сите меѓународни натпреварувања.

УЕФА идната недела ќе одржи итен состанок на сите федерации за да гласа за потенцијалната суспензија на Израел. Јавноста верува дека големо мнозинство од европските фудбалски сојузи се согласни за исклучување на Израел поради геноцидот врз народот на Газа.

Нетанјаху, наводно, се обидел да ги убеди високите фудбалски функционери да не преземаат вакви мерки.

Се додава и дека американскиот претседател Доналд Трамп го предупредил претседателот на ФИФА, Џани Инфантино, на последиците од таков потег.

„Апсолутно ќе работиме на тоа целосно да го запреме секој обид да ѝ се забрани на израелската фудбалска репрезентација учество на Светското првенство“, изјави претходно портпаролот на Стејт департментот за „Скај Њуз“.